I noqu Kalou! I noqu Kalou! E dina sara, ni o ira na dauveiqaravi oqo era sa vakanamata tiko yani vei Kemuni, ka veivakasaqarai tiko yani ki na Nomuni matanitu ni yalololoma. E dina sara, ni ra sa vakauqeti e na Nomuni lagilagi ka vakacaudrevi e na bukawaqa ni Nomuni loloma, ka vakasaqara tiko na veivakadeitaki e na Nomuni matanitu totoka, ka ra vakanuinui tu ni ra na yacova yani na Nomuni i tikotiko vakalomalagi. E dina sara, era gadreva tu na kena soli mai na Nomuni veivakalougatataki, ka gadreva me ra serauni e na Nomuni Matanisiga ni Veidinadinati. O i Kemuni na Kalou! Ni qisi ira me ra sa cina serau, me ra i vakaraitaki ni yalololoma, vunikau vuavua vinaka ka ra kalokalo serau. Me ra sa lako yani ki liu e na Nomuni cakacaka ka ra semati vata kei Kemuni e na i vau ni Nomuni loloma, ka me ra gadreva na rarama ni Nomuni veivakalougatataki. I Turaga! Ni qisi ira me ra i vakaraitaki ni Nomuni veituberi, i vakatagedegede ni Nomuni matanitu tawamudu, ua ni wasawasa ni Nomuni loloma, ka ra iloilo ni Nomuni cina vakaturaga.

E dina sara, O i Kemuni na Dauveivukei. E dina sara, O i Kemuni na Dauveinanumi. E dina sara, O i Kemuni na Ka Talei, na Dauloloma.

Mai na wai drodro vakaisaluaki ni Nomuni bula tawamudu, Ni solia me u gunu mada kina, O i Kemuni na noqu Kalou, kei na vuanikau ni Nomuni Kau bula, vakarawarawataka me u tovolea mada, O i Kemuni na noqu i Nuinui! Mai na Tovure savasava ni Nomuni loloma, vakabobulatakiau me u gunu kina, O i Kemuni na noqu Ka Lagilagi, e na ruku ni yaloyalo ni Nomuni solisoli sega ni vakaiyalayala, laivi au me u vakararavi kina, O i Kemuni na noqu iSerau! E na lomanibai drokadroka ni tiko veivolekati kei Kemuni, e na Nomuni iSerau, vukei au me u rawa ni gade voli kina, O i Kemuni na noqu Daulomani, e na yasai matau ni Nomuni dabedabe ni veivosoti, vakatikori au, O i Kemuni na noqu Vu ni gagadre. Mai na i boi talei ni mudre ni cagi ni Nomuni marau, laiva e dua na icegu oqori me liwa baleti au, O i Kemuni na noqu i Naki vuni, ka me u curuma na i tutu cecekia e na parataisi ni Nomuni veika dina, O i Kemuni au taleitaka Duadua ga! E na memela ni rorogo ni domo ni ruve ni Nomuni Duavata, vakabulabulataki au me u vakarorogo kina, O i Kemuni sa Vakaturaga Duadua ga, ka vakusakusataki au e na yalo tabu ni Nomuni kaukauwa kei na Nomuni i gu, O i Kemuni na Noqu Dauveivakarautaki! Ni maroroi au me u tudei e na lomadonu ni Nomuni loloma, O i Kemuni na Dauveivukei e na gauna ni noqu leqa, e na gaunisala ni Nomuni gagadre uasivi, vakataudeitaka na noqu i lakolako, O i Kemuni O ni a buli au. E na loma ni were ni Nomuni veika bula tawamudu, kei na ruku ni Nomuni serau me u sa tiko ga kina ka tawamudu, O i Kemuni na Dauveivosoti e na vukuqu, e na dela ni i tikotiko ni Nomuni i tutu lagilagi, vakadeitaki au, O i Kemuni O ni sa lewai au! Ni laveti au cake ki na lomalagi ni Nomuni dauloloma kei na yalovinaka, O i Kemuni na Dauveivakatotolotaki, Mo ni tuberi au ki na iVola Siga ni Nomuni veiliutaki, O i Kemuni na noqu Dauveivakayarayarataki! Ni kacivi au me u tiko e na gauna e vakaraitaki kina na Nomuni yalotabu vuni, O i Kemuni na noqu i Tubutubu ka noqu Gagadre Cecere duadua, ki na itutu talei ni Nomuni serau, o koya O ni na vakaraitaka votu, vakalesui au tale kina, O i Kemuni na noqu Kalou!

Sa tu vei Kemuni na kaukauwa kei na qaqa Mo ni vakayacora kina na ka e taleitaka na Lomamuni. E dina ga, sa i Kemuni, na dau Vakacerecerei Duadua, na Vu ni Lagilagi, na Vu ni Cecere.

O i Kemuni na Kalou! Ni vakabulabulataka mada ka vakamarautaka tale ga na yaloqu. Mo ni vakasavasavataka na utoqu. Mo ni vakalougatataka na noqu sasaga. Au sa vakotora na veika kece me baleti au e Ligamuni. O i Kemuni ga na noqu Dauniveivakasalataki ka noqu i Drodro. Au na sega tale ni dau yalorarawa se loma bibi, au na reki ka bula mamarau tiko ga. O i Kemuni na Kalou! Au sa na sega tale ni vakasinaita wale tu ga na yaloqu e na loma ocaoca, se vakalaiva na leqa me rawai au. Au na vakanadakuya na veika kece sa sega ni kilikili e na bula oqo.

O i Kemuni na Kalou! O ni sa noqu i tokani voleka cake sara ka yawa o i au ki vei au vakataki au. Au sa soli au vakatabakidua yani vei Kemuni, O i Kemuni na Turaga.

I noqu Kalou! I noqu Kalou!

O i au e dua na gone yalowai. Ni vakani au mai e na lomasareni Nomuni veinanumi, susugi au e na uto ni Nomuni loloma titobu, vakavulici au e na koronivuli ni Nomuni veituberi, ka vakatuburi au e na ruku ni yaloyalo ni Nomuni loloma soli wale. Ni kauti au tani mai e na butobuto, ka qisi au me u sa bau dua na cina ramase, vagalalataki au mai e na bula rarawa, ka lesi au me u dua na senikau e na loga ni seni rosi; vakabobulataki au me yaco me u Nomuni tamata e na mata ni katuba ni Nomuni vale ka Mo ni solia vei au na i vakavau ni yalo sa tu vei ira na tamata yalododonu; vakarautaki au me u sa dua na i vakaraitaki ni solisoli uasivi ki na bula vakatamata oqo, ka vakaisalataki au e na i sala vakaturaga ni bula tawamudu!

E dina ga, ni O i Kemuni sa kaukauwa, na iGu Cecekia, na Dauveirairaici, na Dauveirogorogoci.

NA VEISIGA NI VEIVAKARAUTAKI KA VIRIKOTORI ME DA VAKANANUMA E NA VEIYABAKI

*(INTERCALARY DAYS)

*(Na Veisiga ni Veivakarautaki oqo, 26 ni Fepurueri ki na i matai ni Maji, e dodonu me ra siga ni vakavakarau ki na Lolo, ka me siga tale ga ni veisikovi, soli ka kei na soli loloma.)

Noqu Kalou, noqu Bukawaqa, ka noqu Rarama! Na veisiga O ni a vakayacana e na Nomuni i Vola me ‘Ayyam-i-Ha1 e sa tekivu, O i Kemuni O ni sa Tui ni veiyaca, kei na lolo sa roro tiko mai, ka vakarota na Nomuni Peni cerecere duadua me vauci vata kina o ira kece era tiko e na matanitu ni Nomuni veikabuli me ra vakarokorokotaka. Au kerei Kemuni, O i Kemuni na noqu Turaga, e na veisiga oqo kei na veigauna tale sa vo me ra tautauri matua koto ga e na i vau ni Nomuni vakaro, ka vaqaqacotaki koto ga na vakabauti ni Nomuni vakavuvuli, me vakadeitaki kina e na yalo ni tamata yadudua ni sa vakarautaki tu e dua na tikina me nodra e na Nomuni lomanibai ni lawa, ka vaka tale ga kina e dua na i tikotiko me vakaraitaki kina na totoka ni rarama ni Kemuni ituvaki.

Oqo, O i Kemuni na noqu Turaga, o ira na Nomuni dauveiqaravi ka ra sega ni vakataotaki mai na dua na vakanananu ni veirawai me baleta na veika O ni solia sobu mai e na Nomuni iVola. Era cuvaki sobu e na vuku ni Nomuni i Naki, ka ciqoma na Nomuni iVola e na yalo ni veivakabauti me vaka sa vure mai vei Kemuni, ka ra dikeva na veigaunisala ni bula mai na veika O ni vola koto mai vei ira, ka digitaka me ra muria na veika O ni sa solia sobu mai.

O ni raica, Oi Kemuni na noqu Turaga, ni ra sa qai vakila mai ka vakadinadinataka na veika O ni vakatakila e na Nomuni iVola Tabu. Ni solia mada me ra gunuva O i Kemuni na noqu Turaga, mai na liga ni Nomuni veivakalougatataki na wai ni Nomuni bula tawamudu. Mo ni qai vola, mada vei ira, na veivakalougatataki ka vakataubeni vei koya e nunuva na wai titobu ni Nomuni i tikotiko, ka tovolea rawa na waini digitaki ni tiko veivolekati kei Kemuni.

Au masuti Kemuni, O i Kemuni na Tui ni tui, ka Dauloloma vei ira na dau vakalolovirataki. Mo ni bulia mada vei ira na veika vinaka ni vuravura oqo kei na vuravura sa bera mai. Ni vola tale ga vei ira, na veika era sega ni bau kunea rawa na Nomuni tamata, ka me ra okati vata kei ira sa tiko wavoliti Kemuni tu, kei ira tale ga era veitosoyaki voli e na Nomuni itutu vakatui e na vuravura kece ni Nomuni veivuravura.

Sa i Kemuni, e dina, na Vu ni iGu Cecekia, na Vu ni Vuku, na Vu ni Vakatakila.

*1. Na Ayyam-i-Ha e kena i balebale na Veisign ni Veivakarautaki.

Au a duri cake e na mataka e daidai e na Nomuni loloma, O i Kemuni na noqu Kalou, ka u a biuta na noqu vale e na noqu vakabauti Kemuni e na vu ni yaloqu taucoko, ka soli au tu ki na Nomuni veitaqomaki. Mo ni solia sobu, mada mai, vei au, mai na lomalagi ni Nomuni yalololoma, e dua na i votavota ni veivakalougatataki sa mai vei Kemuni, ka vukei au me u na lesu tale ki vale e na bula vinaka me vaka ga na Nomuni a tuberi au yani e na Nomuni veimaroroi ka sa dei tu ga kina na vakanananu ni lomaqu vei Kemuni.

Sa sega tale ni dua na Kalou Oi Kemuni ga, na Duabau, O Koya e Sega ni Vakatautauvatataki rawa, na Vu ni Kilaka, na Vu ni Vuku.

Noqu Kalou ka noqu i Vakavuvuli! O i au na Nomuni tamata ka u luve ni Nomuni tamata. Au sa qai duri cake mai oqo e na noqu i davodavo e na kida ni mataka ni sa vakaraitaki tu mai oqo na i Vola Siga ni Nomuni Duavata e na vuku ni kaukauwa ni Tovure ni Siga ni Nomuni lewa, ka sa qai cila yani oqo e na kena i serau e na dela i vuravura raraba me vaka ga e sa yalataki oti tu e na i Vola ni Nomuni Lewa.

Noqu Kalou, keimami sa vakacaucautaki Kemuni, ni keimami sa qai yadra mai e na matalau ni rarama ni Nomuni kilaka. Ni solia sobu mai vei keimami, na noqu Kalou, na ka e na rawa kina vei keimami me vagolei keimami tiko ga kina kivei Kemuni, ka me vagalalataki vei keimami na ka kece keimami vauci tu kina ka vakavo ga O i Kemuni na Kalou. Ni vola tiko ga mai vei au kei ira na noqu i tokani lomani, ka vaka tale ga kina o ira na wekaqu, na tagane kei na yalewa na vinaka ni vuravura oqo kei na vuravura sa bera mai. Ni maroroi keimami vakavinaka, e na kaukauwa ni Nomuni veitaqomaki, O i Kemuni sa taleitaki vei ira na ibulibuli kece ga ka Gagadre voli ni vuravura kei lomalagi, mai vei ira O ni sa vakavuna me vakaraitaki mai kina na Dauvakasolokakana Yalo Velavela, o koya e vakasolokakana tiko e na kedra maliwa na tamata. O ni sa kaukauwa Mo ni vakayacora na ka e marautaka na Yalomuni. Sa i Kemuni ga na Vu ni iGu Cecekia, na Dauveivukei e na Gauna ni Leqa, ka Bula Vakataki Koya ga.

Ni vakalougatataki ira, Turaga na noqu Kalou, o Koya O ni sa solia vua na Nomuni Yacabuli cecere duadua, kei Koya O ni sa wasea tani mai vei ira sa sega ni kilai Kemuni, ka mai vukei keimami mada me keimami vakayacora na veika O ni marautaka ka gadreva. Mo ni vakalougatataki ira tale ga, vaka kina, O i Kemuni na noqu Kalou, na Nomuni Gusunivosa kei na Nomuni Matanivola, kei ira era sa vakanamata tiko yani vei Kemuni,kei ira era sa tavuki oti tu yani vei Kemuni, ka vakarorogo ki na Nomuni Kaci.

O i Kemuni, dina, na Turaga kei na Tui ni matatamata kece ga, ka kaukauwa vei ira na ka kece ga.

O i Kemuni na Turaga yalololoma! O ni sa buli ira na tamata mai na dua vata ga na i vurevure. O ni sa vakarota me ra sa okati me duabau ga na matavuvale. E na Nomuni Tutu Tabu era sa Nomuni dauveiqaravi kece ga, ka ra vakarurugi kece ga na tamata e na ruku ni nomuni iVakaruru Tabu; era sa soqoni vata kece e na Nomuni Teveli ni Sautu; era sa vakararamataki kece e na i serau ni Nomuni Veivakarautaki.

Isa Turaga! O ni sa lomani ira kece ga, O ni sa dau solisoli vei ira kece ga, O ni sa vakarurugi ira kece ga, ka solia na bula vei ira kece ga. O ni sa sovaraka na taledi kei na kilaka cecekia vei ira na tamata kece ga, ka ra luvuci tu e na Wasawasa ni Nomuni Loloma.

O i Kemuni na Turaga yalololomal Ni vakaduavatataki ira na mata tamata kece ga. Ni lewa mada mai na kena duavata na veimatalotu kece ga me yaco kina me duabau ga na veimatanitu, ka me okati me ra duabau ga na vei matavuvale ka me sa dua ga kina na i tikotiko e na vuravura oqo. Me ra sa bula veilomani kece ga e na vu ni veimaliwai uasivi duadua.

Isa Turaga! Ni laveta cake me cecebuya na drotini ni veivakaduavatataki ni matatamata.

Isa Turaga! Tauyavutaka mada na Veisaututaki Levu Duadua.

Ni dregata mada, O i Kemuni na Kalou, na utodra na tamata kece ga.

O i Kemuni na Tamai keimami dauloloma, na Kalou! Ni vakamarautaka mada na utoi keimami e na i boi taleitaki ni Nomuni loloma. Ni vakararamataka na matai keimami e na i Serau ni Nomuni Dauveituberi. Vakamarautaka na daligai keimami e na rorogo ni Nomuni vosa, ka vakarurugi keimami kece e na Baivatu ni Nomuni Dauveitaqomaki.

Sa i Kemuni na iGu Cecekia kei na kaukauwa, sa i Kemuni na Dauveivosoti ka sa i Kemuni Duabau ga na dau rai sivita na nodra malumalumu na tamata kece ga.

Mo ni sa vakalagilagi ga O i Kemuni Turaga na noqu Kalou! Au masuti Kemuni e na vuku ni Vakatakilakila ka vukica na butobuto me rarama, o koya e vakavuna me tara kina na Vale ni Soro Dau sikovi, ka vakavotukanataki kina na Masu Vakarautaki, ka cereki mai kina na iVola Vivigi, me sovaraki mai vei au, kei ira era tu vakavolivoliti au me rawa kina ni keimami torovi Kemuni yani e na Nomuni itikotiku tabu mai lomalagi, me savati keimami mai kina e na neimami dau vakatitiqa me vaka e dau vakataotaki ira na so e na nodra curuma yani na Valelaca Tabu ni Nomuni duavata.

O au e dua, O i Kemuni na noqu Kalou, ka tatakube matua tu e na Nomuni luloma, ka u kubeta koto na bele ni Nomuni loloma kei na veinanumi. Ni bulia vei au kei ira na noqu i tokani lomani na veika vinaka ni vuravura oqo kei na vuravura sa bera mai. Ni sobuti ira e na Nomuni Loloma Vuni O ni dau solia vei ira ka O ni dau digitaka e na kedra maliwa na Nomuni ibulibuli.

Oqori, I noqu Turaga, na veisiga O ni sa vakarota vei ira na Nomuni dauveiqaravi me ra qarava kina na lolo. E sa kalougata o koya e qarava vakavinaka na lolo e na Vukumuni, kei na nona vagalalataki koya mai e na veika kece sara ka vakavo ga O i Kemuni. Ni vukei au ka vukei ira tale ga, I noqu Turaga, me keimami vakarorogo vei Kemuni ka maroroya na Nomuni veivakaro. O i Kemuni, e dina sara, sa kaukauwa me vakayacora na ka O ni digitaka.

Sa sega tale ni dua na Kalou sa i Kemuni ga, na Vu ni Kilaka, na Vu ni Vuku. Mo ni vakalagilagi na Kalou, na Turaga ni vei vuravura kece ga.

NA MASU VAKAROTI BALAVU

Long Obligatory Prayer

• ME CAVUQAQATAKI VAKADUA GA E NA LOMA NI 24 NA AUA

• O koya e gadreva me cavuta na musu oqo, me tucake ka vakanamata vua na Kalou, ia, ni sa tucake rawa tu e na nona i tutu, me qai rai ki na i matau ka rai ki na i mawi, me vaka e waraka tiko na loloma ni nona Turaga, na Dauveivosoti Duadua, na Yalololoma. Me qai kaya:

O i Kemuni na Turaga ni veiyaca kece ga ka O ni a bulia na lomalagi! Au masuti Kemuni e na vukudra na Tovure ni Siga ni Utomuni Bula sa sega ni laurai rawa, o Koya sa vakacerecerei Duadua, na Vu ni Lagilagi, me cakacaka e na noqu masu me sa vaka na bukawaqa o koya me qai vakama laivi na i lati ka sogoti au tani tu e na wasawasa ni veivolekati kei Kemuni.

• Me sa qai laveta ruarua na ligana ka vakamamasu vua na Kalou — me vakalougatataki ka vakacerecerei o Koya — ka kaya:

O i Kemuni na nodra Gagadre na lewe i vuravura kei na nodra Daulomani na veimatanitu. O ni sa raici au ni u sa vakanamata tiko yani vei Kemuni, au sa vagalalataki au mai na veika taucoko ka vakavo ga O i Kemuni, ka u sa taura matua tiko ga na Nomuni vakasala, ka dau vakavuna me vakayavalata na veika buli kece ga. O i au na Nomuni tamata, O i Kemuni na Turaga, ka luve ni Nomuni tamata. Mo ni raica ni u sa tu vakarau me u vakayacora na Lomamuni kei na Nomuni gagadre, ka sega ni gadreva tale e dua na ka ia na Nomuni marau ga. Au sa masuti Kemuni e na wasawasa ni Nomuni loloma kei na iVola Siga ni Nomuni yalololoma Mo ni sa vakatulewa vei koya na Nomuni tamata me vaka sa Lomamuni ka Nomuni lewa, E na Nomuni kaukauwa sa uasivita na veika kece ga e cavuti rawa kei na veivakacaucautaki! Na veika kece ga sa vakavotui mai vei Kemuni sa i koya na gagadre ni utoqu ka dau vakamareqeti ki na yaloqu. O i Kemuni na Kalou, na noqu Kalou! Mo ni kakua ni okata na noqu vakanananu vakatamata kei na veika au vakayacora, ia Mo ni raica ga na Nomuni ivakaro o koya sa robota tu na lomalagi kei na vuravura. E na Yacamuni Levu Duadua, O i Kemuni na Turaga ni veimatanitu kece ga! Au sa gadreva wale ga na veika O ni sa gadreva, ka lomana na veika O ni sa lomana.

• Me sa qai tekiduru, cuva, ka kaya:

O ni sa Cecere sara O i Kemuni ka sa sega tale ni dua e uasivi cake na kena i vakamacala mai vei Kemuni, kei na cecere ni kilaka e sega tale ni sivia e dua O i Kemuni ga.

• Me sa qai tucake ka kaya:

Mo ni sa vakarautaka na noqu masu, O i Kemuni na noqu Turaga, me sa i vurevure ni wai ni bula o koya me u bula kina me vaka ga na kena bula tu na Nomuni i tutu ni veiliutaki vakaturaga, ka me rawa ni u tukuni Kemuni e na veivanua e na Nomuni vuravura.

• Me sa qai laveta tale na ligana e na vakamamasu, ka kaya:

O i Kemuni o Koya ka sa vu ni waicala ni uto kei na yalo e na nodra tawase tani mai Vua, kei na katakata ni Nona loloma e sa caudre kina na vuravura! Au sa masuti Kemuni e na Yaca e sa vakamalumalumutaka na veika buli kece ga, me kakua ni bureitaki vei au na ka sa tu vei Kemuni, O i Kemuni sa daulewa na tamata kece ga! O ni sa raica O i Kemuni na noqu Turaga, na tamata vulagi oqo ka vakusakusa tiko yani ki na nona i tikotiko cecere sara e na ubi ni Nomuni itutu vakaturaga e na lomanibai ni Nomuni loloma; na tamata i valavalaca oqo sa vakasaqara tiko na wasawasa ni Nomuni veivosoti, kei na tamata lolovira oqo e sa vakasaqara tiko na buturara ni Nomuni lagilagi; na tamata dravudravua oqo e sa vakasaqara tiko na Nomuni vutuniyau. Sa Nomuni ga na kaukauwa Mo ni vakatauca na veika O ni sa lewa kina. Au sa vakadinata ni sa i Kemuni ga Mo ni vakacaucautaki e na Nomuni cakacaka, ka Mo ni sa rogoci e na Nomuni vakatulewa, ka tudei tiko ga e na Nomuni ivakaro.

• Me sa qai laveta cake na ligana, ka cavuta veitarataravii na `Allah’u’Abha’. Me qai tatabaki na ligana e duruna ka cuva vua na Kalou — me sa vakacaucautaki ka vakacerecerei o Koya — me qai kaya:

O ni sa raica, O i Kemuni na noqu Kalou, na kena sa vakayavalata na yaloqu, na yavaqu, ligaqu kei na veitikina kece sara e yagoqu, e na kena gadrevi tiko na sokalou vei Kemuni, kei na kena gadrevi tiko Mo ni nanumi O i Kemuni ka Mo ni vakacaucautaki tale ga; na i vakarau ni kena vakadinadinataki na veika sa vakadinadinataka na Gusu ni Nomuni iVakaro e na matanitu ni Nomuni vosa kei na lomalagi ni Nomuni kilaka. Au gadreva, e na tiki ni gauna oqo, O i Kemuni na noqu Turaga, me u kerea vei Kemuni na veika kece sara e tu vei Kemuni, me u rawa ni bau vakaraitakarakarataka kina na noqu dravudravua, ka vakalevulevuya na Nomuni loloma solisoli wale kei na Nomuni vutuniyau, ka me u vakatusa na noqu malumalumu, ka vakaraitaka na Nomuni kaukauwa kei na Nomuni igu.

• Me sa qai tucake ka laveta vakarua na ligana e na vakamamasu, ka kaya:

Sa sega tale ni dua na Kalou sai Kemuni ga, na Vu ni iGu Cecekia, na Vu ni Yalololoma kece ga. Sa sega tale ni dua na Kalou O i Kemuni ga, na Dauveibuli, e na i vakatekivu ki nai vakataotioti. O i Kemuni na Kalou, na noqu Kalou! Na Nomuni loloma sa vakayaloqaqataki au, kei na Nomuni veivosoti sa vakaukauwataki au, kei na Nomuni kaci sa vakayadrati au, kei na Nomuni totoka sa laveti au cake ka tuberi au yani vei Kemuni. O cei beka o i au, me u mai duri rawa voli e na matamata ni koro levu ka volekati Kemuni, se me u vakanamata ki na rarama ka cila tiko mai e na lomalagi ni Nomuni lewa? O ni sa raica, O i Kemuni na noqu Kalou, na tamata vakaloloma oqo ni sa tukituki tiko e na mata ni katuba ni Nomuni loloma, kei na yalo veilecayaki oqo ni sa vakasaqara na uciwai ni bula tawa mudu mai na Ligamuni loloma solisoli wale. Sa Nomuni na lewa e na veigauna kece ga, O i Kemuni na Turaga ni veiyaca kece ga, ka sa noqu na vakacegu kei na vakarorogo ki na Nomuni lewa, O i Kemuni ka bulia na lomalagi.

• Me sa qai laveta vakatolu na ligana, me qai kaya:

Sa Levu duadua ga na Kalou mai na veika lelevu kece ga!

• Me sa qai tekiduru, cuva ki na qele ka kaya:

O ni sa rui tiko yawa sara mai na nodra veivakacaucautaki o ira era voleka vei Kemuni me rawa ni ra bau cabe yani ki na lomalagi ka volekati Kemuni, se vei ira na manumanu vuka ka ni ra gadreva vakalevu o ira era sa yalodina vei Kemuni me ra bau yacova rawa yani na matamata ni Nomuni katuba. Au sa vakadinadinataka ni O ni sa vakatatabutaka na i tovo taleitaki kece ga ka tabu vaka kina e na dela ni veiyaca kece ga. Sa sega tale e dua na Kalou sa i Kemuni ga, o Koya sa Vakacerecerei Duadua, na Vu ni Lagilagi.

• Me sa qai dabe sobu ka kaya:

Au sa vakadinadinataka mai na vanua sa vakadinadinataki kina na veika buli kece ga, kei na Yalotabu Vakalomalagi, kei ira kece ga na lewe i Parataisi cecere mai cake, kei na kena vuabaleta na veika kece oqo na Gusu ni veivakaturagataki mai na Vunilagi sa vu ni lagilagi, ni sa i Kemuni ga na Kalou. ka sa sega tale ni dua na Kalou sa i Kemuni ga, ka ni O Koya ga ka tadu mai e sa i Koya na Veivakurabuitaki Vuni, na i Vakatakarakara Mareqeti, mai vei Koya ga e rau sa qai biu vata rawa kina na S kei na A (SA) me rau semavata vakavinaka. Au sa vakadinadinataka ni sa i Koya ga e na vuku ni Yacana e a sa volai oti tu mai e na Peni nei Koya sa Cecere Duadua, ka sa vakarogoi tale ga e na Nona i vola na Kalou, na Turaga ni iTikotiko vakatui mai cake kei na vuravura tale ga e ra.

• Me sa qai tucake vakadodonu ka kaya:

O i Kemuni na Turaga ni veika bula kece ga ka i Taukei ni veika kece ga e laurai kei na veika e sega ni laurai! O ni sa vakila na kena drodro na wainimataqu kei na noqu tagilagalaga ka rogoca na noqu vutugu kei na noqu qoqolou kei na yaluma ni utoqu. E na vuku ni Nomuni i gu! Na noqu dau lako sese sa tarovi au tiko e na noqu toro voleka yani vei Kemuni; kei na noqu i valavalaca sa tosoi au tani ka u sa yawa sara mai na rara ni Nomuni yalotabu. Na Nomuni loloma, I noqu Turaga, sa vakavutuniyautaki an, kei na tawase tani mai vei Kemuni sa vakarusai au, kei na yawa tani mai vei Kemuni sa kani au. Au sa vakamasuti Kemuni mai na we ni Yavamuni e na veikauloa oqo, kei na veivosa “O i Au Oqo. O i Au Oqo,” o koya ka ra a vosataka na Nomuni Digitaki e na vanua tawa vakaiyalayala oqo, kei na cagi malumu ni Nomuni iVakatakila, kei na cagi mudre malua ni Cadracadra ni Nomuni iLumuti, Mo ni vakalougatataka me u bau rai rawa vakadodonu ki na Nomuni matavinaka ka dikeva na veika kece sa tu e na Nomuni iVola.

• Me sa qai cavuta veitaravi vakatolu na Yacatabu Levu Duadua o ya na ‘Allah’u’Abha’, cuva sobu tabaka toka na duruna, ka kaya:

Mo ni sa vakacaucautaki, O i Kemuni na noqu Kalou, ni O ni sa vukei au me u nanumi Kemuni ka vakacaucautaki Kemuni, kei na Nomuni sa vakayacora rawa me u kilai Koya O Koya na Tovure ni siga ni Nomuni vakatakilakila, ka O ni sa vakavuna me u cuva sobu e Matamuni Vakaturaga, ka vakamalumalumutaki au e mata ni Nomuni iTutu vaKalou, ka me u vakadinata na ka e sa vosataka mai na Gusu ni Nomuni veivakaturagataki.

• Me sa qai duri cake ka kaya:

O i Kemuni na Kalou, na noqu Kalou! Sa vakalairoro mai na dakuqu e na bibi ni colacola ni noqu ca, kei na noqu talaidredre sa vakarusai au. E na veigauna kece au dau vakananuma kina na noqu caka cala kei na Nomuni yalovinaka, e sa dau waicala ga e lomaqu na utoqu, ka laki buebue kina na noqu dra e na veisala ni dra e yagoqu. Mai na Nomuni lagilagi, O i Kemuni na Gagadre kei vuravura! E sa wadadamu na mataqu e na noqu madua me u tucake yani vei Kemuni, ka sa madua vaka kina na ligaqu e na kena gagadre me bau dodo yani ki na lomalagi ni Nomuni loloma soli wale. O ni sa raica, o i Kemuni na noqu Kalou, ni tarovi au tiko na wai ni mataqu e na noqu nanumi Kemuni ka vakacaucautaka na Nomuni yalo veivosoti, O i Kemuni O Koya na Turaga ni iTikotiko vakatui mai cake kei na vuravura oqo e ra! Au sa vakamasuti Kemuni mai na i vakatakilakila ni Nomuni Matanitu kei na veika veivakurabuitaki ni Nomuni Lewa me vakayacori vei ira na Nomuni tamata na veika sa veiganiti kei na Nomuni loloma soli wale, O i Kemuni na Turaga ni veika bula kece ga, ka veiganiti kei na Nomuni veivakalougatataki. O i Kemuni na Tui ni veika e laurai rawa kei na veika e sega ni laurai rawa.

• Me sa qai cavuta vakatolu na ‘Allah’u’Abha’, ka tekiduru sobu, cuva ki na qele, ka kaya:

Mo ni vakacaucautaki, Oi Kemuni na neimami Kalou, ni O ni sa dau vakauta sobu tiko ga mai vei keimami na veika e dau vakavuna me keimami torovi Kemuni vakavoleka tiko ga yani kina, ka solia tiko ga mai vei keimami na veika vinaka kece ga sa tau mai vei Kemuni e na Nomuni iVola Tabu. Mo ni taqomaki keimami tiko, ia keimami masuti Kemuni, O i Kemuni na noqu Turaga, mai vei ira na i vavakoso vakasavuliga, ka dau vakanananu tawayaga. Sa i Kemuni, dina ga, na iGu Cecekia, na Vu ni kilaka.

• Me sa qai tucake, dabe sobu, ka kaya:

Au sa vakadinata, O i Kemuni na noqu Kalou, na veika era sa vakadinadinataka na Nomuni Digitaki, ka vakadinata na veika era sa vakadinata o ira na lewe i Parataisi mai cake kei ira era vakavolivolita na Nomuni iTikotiko cecere. Sa Nomuni na veimatanitu e vuravura kei lomalagi, O i Kemuni na Kalou ni veivuravura kece ga!

NA MASU VAKAROTI KA VAKARAUTA GA NA KENA BALAVU

Medium Obligatory Prayer

• ME DAU CAVUTI E NA VEISIGA, E NA MATAKA, SIGALEVU, KEI NA YAKAVI

Ke vaka e dua e gadreva me masu, me savata na ligana, ia ni sa vuluvulu tiko me qai kaya:

Mo ni vakaukauwataka mada na ligaqu, I noqu Kalou, ka me rawa kina ni tara na Nomuni iVola, e na yalo sa dei sara ka me kakua ni dua e na vuravura oqo me uasivita na kena kaukauwa. Mo ni taqomaka, gona kina, mai na kena veitosoyaki vakaveitalia e na loma ni veika sa sega ni kilikili ka sega ni okati vata kaya. O i Kemuni dina ga na Vu ni iGu Cecekia, na kaukauwa Duadua ga.

• E na gauna sa savata tiko kina na matana, me qai cavuta:

Au sa vagolea yani na mataqu vei Kemuni, I noqu Turaga. Vakararamataka mada e na i serau ni Nomuni veinanumi. Ni taqomaka, mada, me kakua ni gole tani mai ka me gole vakatabakidua ga yani vei Kemuni.

• Me qai tucake, ka qara ki Akka e na i Tikotiko Dokai na Bahji, (Qiblih), me qai cavuta:

Sa vakadinadinataka na Kalou ni sega tale e dua na Kalou ia o Koya duadua ga. Sa Nona kece na matanitu ni Vakatakila kei na veika buli kece ga. O Koya, e dina, sa vakaraitaki mai kina o Koya na Tovure ni Siga ni Vakatakila, o Koya sa vosa oti mai Sainai, e na vuku i Koya sa vakacaudrevi kina na Maliwa lala Cecekia o ya, kei na Vuni Lote ka tiko e delana ka sega ni lako siviti rawa me vaka sa tukuni oti tu, ena vuku i Koya sa vakadewai yani kina na kaci vei ira kece sara mai lomalagi kei vuravura. “Ni rogoca, sa lako mai o Koya na Vu ni Veitaukeni e vuravura kei lomalagi, na lagilagi kei na matanitu e Nona na Kalou, na Nodra Turaga na tamata kece ga, ka Taukena na i Dabedabe vakatui e na lomalagi e cake kei na vuravura e ra!”

• Me su qai cuva sobu, vakatavara toka na ligana e duruna, ka kaya:

O ni sa vakacerecerei e na dela ni noqu veivakacaucautaki kei na nona veivakacaucautaki e dua tani tale, e na dela ni noqu veivakamacalataki kei na nodra i vakamacala o ira kece ga mai lomalagi kei ira kece ga e vuravura!

• Me qai tucake vakadodonu ka dodoka ruarua na ligana ka me donumaka na matana me qai cavuta:

Ni kakua ni vakayalolailaitaki koya, I noqu Kalou, na liga malumalumu oqori, ka ni vakararavi matua tu e na Nomuni veivosoti kei na Nomuni veinanumi, ni O i Kemuni duadua ga mai vei ira era dau vakaraitaka na vosota sa i Koya na Dauniveivosoti Levu Duadua!

• Me sa qai dabe sobu, ka cavuta:

Au sa kune i vakadinadina e na Nomuni duavata kei na Nomuni duabau, ka ni O ni sa Kalou, ka ni sega tale ni dua na Kalou e tiko veitikivi kei Kemuni. Ni O ni sa vakaraitaka vakaidina, na Nomuni i Naki ka vakavotukanataka na Nomuni Veiyalayalati, ka dolava vakarabailevu tale ga na Nomuni katuba ni loloma vei ira kece na tiko e lomalagi kei vuravura. Na veivakalougatataki kei na bula veilomani, na veikidavaki kei na lagilagi, me vakacegui ira era sa soli ira vakatabakidua tu, e na nodra vakanuinui ni ra na ciqoma na veika sa mai vei Kemuni. O i Kemuni, e dina sara, na Dauveivosoti e Veigauna kece ga na Vu ni Loloma solisoli wale.

*(Ke vaka e dua e digitaka me cavuqaqataka me i sosomi ni masu balavu na kena oqo: ‘E vakadinadinataka na Kalou ni sega tale e dua na Kalou ia o Koya duadua ga, na Dauveivukei e na Gauna ni Leqa, na Bula Vakai Koya,’ e sa rauta vakavinaka oqori. E vaka kina, se daumaka cake sara ke vaka, me dabe tiko, ka digitaka me cavuqaqataka na veivosa oqo: ‘Au sa kune i vakadinadina e na Nomuni duavata kei na Nomuni duabau, ka ni O ni sa Kalou, ka ni sega tale ni dua na Kalou e tiko veitikivi kei Kemuni.’)

NA MASU VAKAROTI LEKALEKA

Short Obligatory Prayer

• ME CAVUQAQATAKI VAKADUA GA E NA LOMA NI 24 NA AUA, E NA SIGALEVU TUTU

Au sa vakadinata, O i Kemuni na noqu Kalou, ni O ni sa buli au mai me u kilai Kemuni ka dau qaravi Kemuni. Au sa vakila tu e na gauna oqo ni u sa malumalumu O ni sa kaukauwa, ni u sa dravudravua O ni sa vutuniyau.

Sa sega tale ni dua na Kalou ia o Kemuni ga, na Dauveivukei e na Gauna ni Leqa, O i Kemuni na Kalou Bula Vakai Koya ga.

Mo ni sa vakalagilagi O i Kemuni, l Turaga na noqu Kalou! Ni kakua ni guilecavi koya sa laveti cake e na vuku ni kaukauwa ni Nomuni itutu dei vakatui ka sa tawa cava; ka Mo ni kakua ni tosoi koya vakayawa mai vei Kemuni o koya O ni solia me curu yani ki na Nomuni vale laca tabu ni bula tawamudu. E na rawa beka Mo ni vakasava tani, I noqu Kalou, o koya O ni dau vakaruruga e na Nomuni iTutu Vakaturaga, e na rawa tale beka ga Mo ni vakatalai koya tani mai vei Kemuni, O i Kemuni na noqu gagadre, me vaka ni o koya e dau vakarurugi mai vei Kemuni?

Mo ni sa vakalagilagi, ka vakalagilagi vakalevu sara O i Kemuni! O i Kemuni ga e na veigauna sa oti yani O ni a dau nodra Tui voli mai na veika buli kece ga ka Usutu ni Veiyavalati, me yacova na gauna e sega ni kilai rawa. O ni na nodra turaga tiko ga na veika buli kece sara kei na nodra Dauniveibuli. Mo ni sa vakalagilagi tiko ga O i Kemuni, I noqu Kalou! Ke vaka O ni sa na muduka na Nomuni veivosoti vei ira na Nomuni tamata, o cei, o cei beka, e na lomani ira; ke vaka tale ga O ni sa na sega ni dau vakacegui ira, o cei tale beka e tiko me na qai vakacegui ira?

Mo ni sa vakalagilagi, ka vakalagilagi vakalevu sara O i Kemuni! O ni sa rokovi e na Nomuni dina, e dina sara, keimami sokalou kece tiko yani vei Kemuni, ka O ni sa vakavotui mai e na Nomuni lewa dodonu, e dina sara, e na Vukumuni, keimami sa vakadinadinataka kece. Sa sega tale e dua na Kalou sa i Kemuni duadua ga, na Dauveivukei e na gauna ni Leqa, na Kalou Bula Vakataki Koya ga.

*(Na Masu me baleti ira na mate ka me dau vakayagataki e na vukudra na Bahá’í’ era sa yacova na yabaki 15. “E na veimasu vakaroti kece vakaBahá’í, oqo e dua na kena e rawa ni cavuqaqataka vata na lewe ni vakabauta, e dodonu me cavuta e dua vei ira na lewe ni vakabauta ka me ra tucake kece tiko na lewe ni vavakoso. E sega ni gadrevi e ke me da qarava na Vanua Tabu (Qiblih, o ya mai Isireli) e na gauna e cavuqaqataki tiko kina na masu oqo." - Tauri mai e na iVola Tabu o ya na ‘Synopsis & Codification of the Kitab-i-Aqdas’.)

O i Kemuni na noqu Kalou! Oqo na Nomuni tamata ka luve ni Nomuni tamata, ka dau vakabauti Kemuni kei na Nomuni i vakatakilakila, ka dau vakanamata tu yani vei Kemuni, e na nona vagalalataki koya vakatabakidua mai na veika kece ka vakavo ga O i Kemuni. Sa i Kemuni dina ga, sa dau vakaraitaka na veivosoti, na dauveivosoti duadua ga.

Mo ni lewai koya mada, O i Kemuni na dauvosota na nodra caka ca na tamata ka dau ubia na nodra cala e vuqa, e na ruku ni lomalagi ni Nomuni solisoli kei na wasawasa ni Nomuni loloma. Mo ni vakatara vua me sa curu yani ki na lomanibai ni Nomuni loloma tawa yalani rawa e a tu ni se bera ni buli o lomalagi kei vuravura. Sa sega tale ni dua na Kalou sa i Kemuni ga, na Dauveivosoti e veigauna kece ga, na Daulomasoli Duadua ga.

Me sa qai cavuta vakaono na vosu ni veikidavaki na ‘Allah’u’Abha’, ni oti me sa qai cavuta vakatinikaciwa na veiyatuvosa oqo:

Keimami sa dau sokalou kece, vakaidina, vua na Kalou.

Keimami sa dau vakarokoroko kece, vakaidina, vua na Kalou.

Keimami sa dau soli keimami kece, vakaidina, vua na Kalou.

Keimami sa dau vakalagilagia kece, vakaidina, na Kalou.

Keimami sa dau vakaraitaka kece, vakaidina, na neimami vakavinavinaka vua na Kalou.

Keimami sa dau yalovosota kece, vakaidina, e na vukuna na Kalou.

*(Ke vaka e yalewa o koya e mate me qai vosa o koya e masu tiko ka kaya: Sa i koya oqo na Nomuni vada ka luve ni Nomuni vada, ka qai muria ga na ka sa koto e cake. . . .)

Era lewe vuqa na uto batabata, O i Kemuni na noqu Kalou, e sa vakatakatataki tu e na bukawaqa ni Nomuni cakacaka, ka lewe vuqa era mocelutu tu era sa vakayadrati e na kamikamica ni Domomuni. Sa bau lewe vica mada era sa vakasaqara na i vakaruru e na ruku ni Nomuni vunikau ni duabau, ka lewe levu vei ira na via gunu era sa vakasaqara nai vurevure ni Nomuni wai bula e na Nomuni veisiga!

Sa kalougata o koya, e sa vakanamata vei Kemuni, ka sa vakatotolo yani me yacova na Tovure ni siga ni rarama ni Kemuni iserau tabu. Sa kalougata o koya e na vu ni yalona taucoko sa vuki kina ki na i Cadracadra Tabu ni Nomuni Vakatakila kei na Uluvatu ni Nomuni veivakauqeti. Sa kalougata o koya sa vakarabailevutaka na Nomuni sala kei na veika O ni a lumuta vei ira e na Nomuni loloma kei na Nomuni veivukei. Sa kalougata o koya, e gadrevi Kemuni, ka biuta laivi na veika kece ka vakavo ga O i Kemuni. Sa kalougata o koya sa taleitaka na veikilai vakayalo kei Kemuni, ka sereki koya mai e na i vau ka vauci tu kina ki vua e dua tani tale ka vakavo ga o Kemuni.

Au masuti Kemuni, O i Kemuni na noqu Turaga, e na vuku ni Yacamuni, O Koya, e na kaukauwa ni Nomuni veiliutaki kei na qaqa, sa talave cake kina ki na vunilagi ni Nona vale ni veivesu, ka lesia ki vei ira kece ga na ka e Lomamuni kei na ka e ganita na Nomuni vakalagilagi.

Sa dina ga, na Nomuni kaukauwa, sa vakatautauvatataki kei na veika kece ga.

Mo ni vakalagilagi ga, O i Kemuni na noqu Kalou! O i au e dua vei ira na Nomuni dauveiqaravi, ka u sa dau vakabauti Kemuni kei na Nomuni veivakatakilakila. O ni sa raica ni u sa vakanamata yani ki na katuba ni Nomuni veivosoti, ka vagolea na mataqu ki na gaunisala ni Nomuni dauloloma ka yalovinaka. Au masuti Kemuni, e na Nomuni veiyaca buli uasivi duadua kei na Nomuni i tovo cecere duadua me dolava mada ki na mataqu na toba ni Nomuni i solisoli loloma. Ni vukei au, gona kina, me u vakayacora na veika sa vinaka, O i Kemuni na i Taukei ni vei yaca kece ga kei na i vakarau vinaka kece ga.

Au dravudravua, O i Kemuni Turaga, ia O i Kemuni na Vutuniyau. Au sa vakanamata yani kivei Kemuni, ka kaliraki au tani mai e na veika kece ga ka vakavo ga O i Kemuni. Au vakamamasu vei Kemuni, Mo ni kakua mada ni sogota vei au, na mudre ni cagi ni Nomuni loloma malumu, ka kakua ni O ni vakalatia vei au na ka O ni vakarautaka me nodra o ira era sa digitaki e na kedra maliwa na Nomuni tamata dauveiqaravi.

Ni kauta laivi mada na i ubi mai na mataqu, O i Kemuni na noqu Turaga, ka me u raica ka kila rawa kina na ka O ni gadreva vei ira na Nomuni ka buli, ka kunea rawa, e na i vakatakarakara kece ni cakacaka ni Ligamuni, na i vakatakila kila ni Nomuni kaukauwa tawa yalani. Ni vakacuruma ki yaloqu I noqu Turaga, na Nomuni veivakatakilakila lelevu, ka kauti au laivi mai e na loma ni veika dau veivakamalumalumutaki kece kei na veigagadre ca ni lomaqu. Mo ni vola, mada, vei au na veika vinaka me baleta na vuravura oqo kei na vuravura sa bera mai, O ni sa kaukauwa Mo ni vakayacora na veika e marau kina na Lomamuni. E sega tale ni dua na Kalou ia O i Kemuni ga, na Vu ni Lagilagi, O Koya era sa vakasaqara na tamata kece ga na Nona veivuke.

Au sa vakaraitaka yani na noqu vakavinavinaka, O i Kemuni na noqu Turaga, e na Nomuni sa vakayadrati au mai na moce, vakauqeti au, ka vakavurea vei au e dua na gagadre me u kila na ka era sega ni kila rawa e vuqa na Nomuni Dauveiqavavi. O koya gona, Mo ni vakarawarawataka vei au, O i Kemuni na noqu Turaga, me raici mada, e na vu ni loloma e na Vukumuni kei na vuku ni Nomuni yalomarau, me baleta na veika O ni gadreva ka taleitaka. Sa i Koya ga, e na levu ni Nona kaukauwa kei na Nona i tutu cecere, era sa vakadinadinataka na veika kece ga.

Sa sega tale ni dua na Kalou O i Kemuni ga, na Vu ni iGu Cecekia, na Dauveivakalougatataki.

Me vakacaucautaki na Yacamuni, O i Kemuni na noqu Kalou! Au sa vakadinata ni sega na vakanananu me baleti Kemuni, veitalia na kena lagilagi, e yacova rawa yani na cecere ni Nomuni kilaka, ka sega tale ga ni dua na vakacaucau me baleti Kemuni, veitalia na kena cecekia, e na rawa ni voleka yani ki na maliwa lala ni Nomuni vuku. Mai na bula tawamudu O ni sa tiko yawa sara mai na vanua era na rawa ni kila ka vakasamataki Kemuni kina na Nomuni tamata, kei na Nomuni vakalagilagi sa rawa ga mai na nodra sasaga na Nomuni tamata me ra vakamacalataka na Nomuni veivakurabuitaki. Na kaukauwa cava sa taukena na veika buli e na nodrau veisotari mata kei koya sa Tawabuli?

Au sa vakadinadinataka ni nodra vakanananu lagilagi o ira era sa vakarokorokotaka na Nomuni duavata, kei na nodra vakasama titobu o ira kece era sa kilai Kemuni, e sa i vakaraitaki ni veika sa vakarota na mata ni Nomuni peni kei na Nomuni gagadre, ka vakavurea na Nomuni lewa. Au sa qai vakadinata mai na Nomuni lagilagi, O i Kemuni na Daulomani ni yaloqu ka i Vurevure ni noqu bula. Au sa vakauqeti e na noqu malumalumu me u vakamacalataka ka vakacaucautaki Kemuni e na i valavala sa cecekia sara kina na Nomuni lagilagi kei na uasivi ni Nomuni itutu vakaturaga. E na noqu sa qai vakila na veika oqo, au sa vakamasuti Kemuni, mai na Nomuni loloma e vakavolivoliti ira na Nomuni i bulibuli kece ga, Mo ni ciqoma mai vei ira na Nomuni tamata na veika era na rawa ni vakaraitaka yani e na Nomuni gaunisala. Mo ni qai vukei ira, e na gauna oqori, mai na Nomuni loloma dau veivakaukauwataki, me ra laveta cake na Nomuni vosa ka vakacaudreva na Nomuni vakacaucautaki.

O ni sa kaukauwa Mo ni vakayacora na veika sa Lomamuni. Sa i Kemuni, dina ga, na Lagilagi Kece ga, na Vu ni Vuku.

Me sa vakalevulevui na Yacamuni, O i Kemuni na Turaga na noqu Kalou! Sa i Kemuni o Koya ka ra sa masuta na veika kece ga, ka O ni sa sega ni masuta e dua, O ni sa nodra Turaga na veika kece ga, ka O ni sa sega ni vakararavi vua e dua, o Koya sa kila na veika kece ga ka sega e dua sa kilai Koya. Sa Nomuni gagadre Mo ni kilai vei ira na tamata; sa i koya gona, O ni sa vakayacora kina, e na duabulu ga na vosa mai na Gusumuni, ka sa yaco kina me bula na tamata ka vakaiukuukutaki kina na vuravura. Sa sega tale ni dua na Kalou sa i Kemuni ga, na Daunilewa, na Dauniveibuli,na Cecekia, na kaukauwa Duabau.

Au masuti Kemuni, mai na vosa vata ga oqo o koya sa vakaraitaki mai e na dela ni rarama ni Nomuni lewa, me rawa kina vei au me u gunu vakayauyau e na wai bula o koya O ni sa dau vakamakaretaka kina na utodra o ira na Nomuni digitaki ka soli bula vakatotolo kina e na yalodra o ira era sa lomani Kemuni, me rawa kina vei au, e na veigauna kece kei na kena veivakasama kece, me u sa bau vagolea vakatabakidua na mataqu vei Kemuni.

Sa i Kemuni ga na Kalou ni qaqa, ni lagilagi kei na sautu. Sa sega tale ni dua na Kalou e tiko veitikivi kei Kemuni,na i Liuliu Cecekia Duadua, na Vu ni Lagilagi, na kaukauwa Duadua ga.

NA I MATAI NI SIGA NI DUA NA YABAKI VAKA-BAHÁ’Í

##‘NAW-RÚZ‘

*(Na i Matai ni Siga ni Yabaki vou Vaka-Bahá’í - ‘Naw-Rúz’, o ya e na i ka 21 ni Maji, sa i koya na i matai ni siga e na i vola ni vula Vaka-Bahá’í.)

Mo ni sa vakalagilagi, O i Kemuni na noqu Kalou, ni O ni sa digitaka me siga ni soqo ni marau na i Matai ni Siga oqo (Naw-Rúz) vei ira ka ra dau vakamuria na lolo e na nodra lomani Kemuni ka vakatatabutaki ira mai na veika e tawakilikili vei Kemuni. Ni vakadonuya mada, I noqu Turaga, me vakatakatataka na nodra cakacaka e na Nomuni iNaki na bukawaqa ni Nomuni loloma kei na yameyame ni buka e vakacaudrevi e na vuku ni lolo oqo. O ni sa vakarautaka e na Nomuni veivakalagilagi kei na veivakanananu me baleti Kemuni, Me vaka ni O ni sa vakaiukuukutaki ira, Kemuni na noqu Turaga, e na i ukuuku ni lolo O ni a vakarota, Ni vakaiukuukutaki ira tale ga e na i ukuuku ni Nomuni veiciqomi, e na vuku ni Nomuni loloma kei na Nomuni veivuke levu duadua. Na veika era vakaitavitaki ira kina na tamata e vakatau vakatabakidua ga e na Nomuni lagilagi, ka vakataulewa tale ga kina na Nomuni ivakaro. Ke vaka O ni sa vosota rawa e dua ka voroka na lawa ni lolo me vaka ga e dua ka dau vakamuria na lolo, e na nanumi tale ga o koya e na bula tawamudu me vakataki ira ga na dau vakamuria vali mai na lolo. Ia, ke vaka O ni sa vakarota ni sa voroka na lawa ni lolo e dua e vakayacora na kena i vakarau, e sa na okati o koya me vakaduka na iSulu Vakatui ni Nomuni iVakavuvuli, ka na tosoi vakayawa tale ga mai e na wai makare ni iVurevure ni bula oqo.

Sa i Kemuni ga e na gauna sa laveti kina na Nomuni kuila, ka volai kotu kina vaka oqo, “Sa dodunu Mo ni vakacaucautaki e na vuku ni Nomuni veicakacaka" kei na kena cereki na ivakaro ka volai koto kina, “Mo ni vakarogoci O i Kemuni me vaka na Nomuni lewa.” Mo ni sa vakatakila ni Nomuni na tikotiko oqo, I noqu Kalou, vei ira na Nomuni dauveiqaravi, ka me ra kila tiko ni uasivi ni veika kece sara e vakatau ga ki na Nomuni lewa kei na Nomuni vosa, kei na yalo vosota e na veicakacaka kece e vakatau duadua ga ki na Nomuni galala kei na gagadre lagilagi ni Nomuni lewa, ka me ra raica tale ga ni vurevure ni veika e vakayacora rawa na tamata e sa tu vakatabakidua e na Nomuni veiciqomi kei na Nomuni veivakaroti. Me vakatakilai vei ira ni sega tale ni dua na ka e na vakalati ira mai na Nomuni Totoka, e na veisiga oqo ka vakadeitaka kina na Karisito ka kaya: “Na veimatanitu kece e Nomuni, O i Kemuni ka dau vakavurea na Yalo Tabu(Jisu)"; na Nomuni iTokani o (Mometa) e a kailavaka mai: ‘Me vakalagilagi tiko ga O i Kemuni, O i Kemuni na Daulomani Uasivi Duadua, e na vuku ni Nomuni vakaraitaka na Nomuni Totoka, ka vola vei ira na Nomuni tamata digitaki na veika e na vukei ira me ra yacova rawa kina na i dabedabe ki na ivakatakilakila ni Yaca Tabu Levu Duadua, me vaka era dau tagica o ira kece na tamata ka vakavo ga o ira ka ra vakanadakuya na veika kece vakavuravura ka vakararavi vakatabakidua ga vei Kemuni, ka ra vakarautaki ira tale ga vua, O Koya na Nomuni iLumuti ka Daunivakavuvuli ni Nomuni veika vinaka.’

O Koya na Tabamuni kei ira kece era dau Nomuni i tokani, O i Kemuni na noqu Turaga, era sa tinia e na siga e daidai na nodra lolo, ni oti na nodra vakamuria voli mai e na lomanibai ni Nomuni valenilewa, me vaka na nodra sasaga me ra vakayalomarautaki Kemuni. Ni lewa mada Vua, kei ira kece tale ga, era curuma rawa na Nomuni itikotiko e na veisiga sa oti oqo na veika vinaka kece O ni sa vota tu me vaka sa tu e na Nomuni iVola. Solia gona, vei ira, na veika e na vakasaututaki ira, e na bula oqo, kei na bula e sa bera mai.

Sa i Kemuni, e dina, na Vu ni Kilaka, na Vu ni Vuku.

O i Kemuni na Kalou, O i Kemuni ka vakaivolataki ira na Parofita Lumuti kece ga, na i Vurevure ni vei Vurevure kece ga, na Uluvatu ni i Vola Tabu kece ga, kei na Waivure ni vei Rarama kece ga! Au vakadinata ni Yacamuni ga e vakaiukuukutaka na veikilai vakayalo, ka vuabale kina na titobu ni vosa mana, kei na rabailevu ni Nomuni veitaqomaki e sa kilai raraba vei ira na lewe ni veimatalotu kece ga.

Au sa masuti Kemuni Mo ni sa vakavutuniyautaki au mada me u biuta laivi na veika kece ka vakavo ga O i Kemuni, ka me u vagalalataki mai vei ira kece sara ka vakavo ga O i Kemuni. Sovaraka mada mai vei au, mai na o ni Nomuni yalololoma na veika me na vukei au cake e na vuravura ni Nomuni vuravura kece ga. Ni vukei au, mada, e na Nomuni veivakaukauwataki lagilagi, me u rawa kina ni vakayacora na Nomuni Cakacaka e na kedra maliwa na Nomuni tamata ka me u na vakatakila rawa kina na vu ni noqu na dau nanumi tu e na balavu ni gauna ka na donuya voli na Nomuni matanitu kei na balavu ni gauna e na kaukauwa tiko kina na Nomuni veiliutaki.

Oqo na Nomuni dauveiqaravi, O i Kemuni na noqu Turaga, o koya mai na vu ni yalona taucoko e sa vakanamata tu yani ki na vunilagi ni Nomuni loloma soli Wale, kei na wasawasa ni Nomuni veivukei, kei na i solisoli kece ga vakalomalagi. O koya gona Mo ni vakacolati au mada mai kina e na veika e vu ni Nomuni cecekia, ka Nomuni lagilagi, ka Nomuni veisaututaki, kei na Nomuni loloma.

Sa i Kemuni, dina ga, na Kalou ni qaqa kei na kaukauwa, o Koya sa dau sotava ka sauma na nodra masu na dau masuti Kemuni. Sa sega tale ni dua na Kalou sa i Kemuni ga, na Vu ni Kilaka, na Vu ni Vuku.

• O koya vakayadua e lakova na veikoro lelevu, veikoro lalai kei na veiyasana e na Matanitu oqo ka vakaitavi e na kena cakacakataki me curu maliwa na i tukutuku lagilagi ni Kalou, e dodonu me vakamuria na gaunisala ni veimasulaki oqo e na veimataka:

I noqu Kalou! I noqu Kalou! O ni sa raici au e na noqu i tutu lolovira kei na malumalumu, ka u sa vakaitavi tu e na i colacola levu duadua, ka u sa soli au me u laveta na Nomuni vosa e na kedra maliwa na lewe vuqa ka me u vakatetea na Nomuni i vakavuvuli kivei ira na Nomuni tamata. Au na rawata vakacava ke vaka O ni na sega ni vukei au mai kina e na i cegu ni Yalo Tabu, vukei au mada me u qaqa e na veiqaravi ki na Nomuni matanitu lagilagi, ka vakavolivoliti au e na Nomuni veivakataudeitaki, oqori wale ga e na rawa ni vukica e dua na luve ni ikeli malumalumu me kaukauwa, e dua na turu ni wai somidi me ra uciwai se wasawasa, kei na ka lailai duadua e buli rawa ki na veimataqali rarama kei na veimatanisiga? O i Kemuni na noqu Turaga! Mo ni vukei au mada e na Nomuni qaqa kei na Nomuni kaukauwa mana, ka me u rawa kina ni cavuta na Nomuni veivakalagilagi kei na i solisoli uasivi e na kedra maliwa na tamata kece ga ka sa vakasinaiti na yaloqu e na waini ni Nomuni loloma kei na kilaka.

O i Kemuni sa kaukauwa duadua ga ka Vu ni veika kece ga O ni sa virikotora.

O i Kemuni na Kalou sa sega ni vakatautauvatani rawa! O i Kemuni na Turaga ni Matanitu vaKalou! O ira na yalo oqo era sa Nomuni mataivalu vakalomalagi. Ia, e na Nomuni matanitu vaKalou, Ni vukei ira me ra sa qaqa, ka me rawa kina ni yaco vei ira yadudua me tautauvata na nodra i gu kei na dua na mata sotia ka me kabai ira rawa kina na veivanua oqo e na vuku wale ga ni loloma ni Kalou kei na veivakararamataki ni veivakavuvuli vakayalo.

O i Kemuni na Kalou! Mo ni sa dau taqomaki ira ka dau vukei ira e na loma ni vanua, na veidelana, na buca, na veikauloa, na veiqakilo kei na wasawasa, Mo ni sa nodra i tokani — ka me rawa ni ra qolouvaka yani e na kaukauwa ni Matanitu vaKalou kei na i cegu ni Yalo Tabu!

E dina sara, ni sa i Kemuni ga na kaukauwa, na iGu Cecekia Duadua ka Uasivi Duadua, sa i Kemuni tale ga na Vuku, na Dauveirogorogoci kei na Dauveirairaici.

O i Kemuni na Kalou, na noqu Kalou! Na Nomuni loloma e sa vakayaloqaqataki au, kei na Nomuni lewa dodonu e vakasinaiti au e na rere. Sa ka ni marau vua na tamata me vakaivotavotataki e na Nomuni loloma, ia e na veivutuni o koya e ciqoma na Nomuni lewa dodonu.

Turaga! Au a dro tani mai e na Nomuni lewa dodonu, ka u sa vakataroga lesu tale yani na Nomuni loloma, au a vakanadakuya na Nomuni cudru ia au sa vakasaqara na Nomuni veivosoti. Au sa vakamasuti Kemuni Mo ni vosota na noqu cala. Au kerei Kemuni vakabibi, e na Nomuni kaukauwa, na Nomuni i tutu cecere kei na Nomuni lagilagi vata kei na Nomuni veinanumi Mo ni serauni keimami mai na Nomuni tamata e na rarama ni Nomuni kilaka, me i vakaraitaki ni veika kece ni Nomuni bulibuli, ka me na qai serauna na ka vuni ni Nomuni kaukauwa, me vakaraitaka na rarama ni Nomuni kilaka.

O i Kemuni duadua ga O ni vakavuna na veika kece ga me vakaraitaki ka vakararamataki keimami e nai serau ni Nomuni veitaqomaki kei na Nomuni veivukei.

O i Kemuni dina ga na Vu ni Sautu, na Dauloloma.

O i Kemuni na Turaga! Keimami tamata vakaloloma, solia mada mai kivei keimami na Nomuni veivukei; keimami dravudravua, vakalougatataki keimami mada mai e na dua na i votavuta mai na wasawasa ni Nomuni i yau talei; keimami dau leqa, Mo ni sa vakacegui keimami mada; keimami vakalolovirataki, Mo ni solia mada vei keimami na Nomuni lagilagi. O ni sa dau vakani ira na manumanu vuka ni macawa, kei na manumanu yavaiva e na dela i vuravura e na veisiga, ka ra votai vaka tale ga kina na Nomuni tamata mai na Nomuni veikaroni kei na dauloloma ka yalovinaka.

Mo ni kakua ni vakuai koya na tamata malumalumu oqo mai na Nomuni loloma veivakurabuitaki ka Mo ni vakataubena tale ga vua na yalo malumalumu oqo na Nomuni loloma soli wale.

Mo ni solia mai vei keimami na keimami madrai e na veisiga, ka Mo ni tosoya cake na veika e Nomuni ka gadrevi vei keimami e na bula oqo, ka me keimami kakua ni vakanuinui vua e dua ia vei Kemuni ga, dau veitaratara vakatabakidua kei Kemuni, muria na Nomuni gaunisala ka dau vakatakila na Nomuni veika vuni. O ni sa Vu ni iGu Cecekia ka Dauloloma ka Dausolisoli vei ira kece ga.

O i Kemuni na Turaga, na noqu Kalou ka noqu i Vakavakacegu e na noqu lomabibi! O ni sa noqu i Sasabai ka noqu i Vakavakaruru e na gauna ni leqa ka noqu i Tokani Lomani e na noqu galili! O ni sa noqu i Vakavakacegu e na noqu rarawa, ka noqu i Tokani e na noqu tiko duadua voli! O ni sa dau veivakacegui ka kauta tani na noqu leqa kece ga ka Dauvosota na noqu i valavala ca.

Au sa vakararavi vakatabakidua yani vei Kemuni, ka vakamasuti Kemuni e na utoqu kece ka vaka kina na noqu vakanananu vata kei na yamequ, me taqomaki au mai kina e na veika kece e veisaqasaqa kei na Nomuni lewa, e na tabagauna ni Nomuni veivakaduavatataki vakayalo oqo, ka Mo ni savai au mada e na veika dukadukali kece ka na vakadredretaka na noqu vakasaqara, yani, e na yalosavasava duadua ka serau, na rurugu ni vunikau ni Nomuni loloma.

Ni veivosoti mada, O i Kemuni, na Turaga, vei ira era sa malumalumu, ka vakabulai ira na tauvimate, ka vagunuvi ira tale ga na karamaca.

Ni vakamarautaka na lomadra ka dau caudre kina na Nomuni loloma ka vakaramasetaka e na i Serau ni Nomuni loloma vakalomalagi ka vaKalou tale ga.

Ni ubia mada na veivale ni Nomuni veivakaduavatataki vakayalo e na Nomuni i tutu tabu ka tokara ki uluqu na i sala ni Nomuni veitokoni.

Ni vakararamataka na mataqu e na i serau ni Nomuni cina ni veisaututaki ka vukei au me u veiqaravi e na Nomuni mata ni katuba tabu.

Ni vakavuabaletaka na utoqu e na loloma vei ira na Nomuni tamata ka qisi au me u vakatakilakila ni Nomuni loloma, me u vakaraitaki ni Nomuni dauveivukei, me u vakacerecerea na tiko veilomani e na kedra maliwa na Nomuni daulomani, me u gugumatua e na Vukumuni, ka u kaburaka tiko ga na Kemuni i vakananumi ka guilecava na noqu gagadre ia me u vakananuma vakatabakidua ga na Lomamuni.

O i Kemuni na Kalou,na noqu Kalou! Ni kakua ni tosoi au tani mai na cagi mudre ni Nomuni veivosoti kei na yalololoma, ka kakua ni tawasei au tani mai e na waivure ni Nomuni veinanumi kei na veivukei.

Ni laivi au me u vakacegu e na ruku ni Tabamuni dauveitaqomaki ka Mo ni wanonovi au sobu tale ga mai e na Matamuni sa vu ni dauveitaqomaki.

Ni vakayavalata na yamequ me u vakacaucautaka na Yacamuni e na kedra maliwa na Nomuni tamata, ka me rogo na domoqu e na veisoqo levu ka me taladrodro mai e gusuqu na uasivi ni Nomuni veivakacaucautaki.

Sa i Kemuni, e na dina taucoko, sa Dauloloma, na Lagilagi, na iGu Cecekia, na kaukauwa Duadua ga.

• Na vosa ni yalayala ni vakamau, e na tikina e dodonu me rau dui cavuta yadudua na goneyalewa kei na cauravou e matadra e rauta ni rua na ivakadinadina ka vakadonui oti mai na Matabose Vakayalo, me vaka sa vakamacalataki tu e na iVola Tabu ni Lawa o ya na Kitab-i-Aqdas: “Keimami na vakamuria kece, vakaidina, na Lewa ni Kalou."

Mo ni sa vakalagilagi O i Kemuni, I noqu Kalou! E dina, ni oqo na Nomuni turaga dauveiqaravi kei koya oqo na Nomuni marama dauveiqaravi ka rau sa toso mai ki na ruku ni yaloyalo ni Nomuni veivosoti ka rau sa duavata e na vuku ni Nomuni veivuke kei na loloma. I Turaga! Vukei rau e na Nomuni vuravura kei na Nomuni matanitu oqo ka vota vei rau na veika vinaka kece e basika mai e na Nomuni lomasoli kei na loloma. I Turaga! Vakataudeitaki rau e na Nomuni cakacaka ka vukei rau me rau veiqaravi vei Kemuni. Vakatovolei rau me rawa ni yaco me rau i vakatakilakila ni Yacamuni e na Nomuni vuravura ka taqomaki rau e na ruku ni Nomuni i solisoli sega ni vaka i yalayala e na vuravura oqo kei na vuravura sa bera mai. I Turaga! E rau kerekere tiko yani ki na Nomuni Matanitu ni yalololoma ka rau masuta na tiko veivolekati kei na i tutu lagilagi e sa Nomuni duadua ga. E dina, e rau sa vakamau oqo e na nodrau talai rawarawa ki na Nomuni ivakaro. Ni qisi rau mada me rau i vakatakilakila ni tiko veilomani kei na duavata me yacova na i vakataotioti ni gauna. E dina, sa i Kemuni na kaukauwa duadua ga, na Daurairai vakasauri e na veivanua kece ga, kei na Vu ni iGu Cecekia.

O Koya na Kalou!

O i Kemuni na Turaga sa sega ni vakatautauvatataki rawa! E na vu ni cecekia ni Nomuni vuku O ni vakaukauwataka kina na vakamau vei ira kece na tamata, me rawa ni na veisosomitaki na nodra kawa mai muri e na vuravura vakaiyalayala oqo, ka me vakayacori tiko ga ka tawamudu, ia me ia tiko ga e na veigauna kece me yacova sara na i vakataotioti ni gauna e bula tiko kina na vuravura oqo, e na nodra vakaogai ira tiko e na Nomuni Matamata ni veivakaduavatataki e na veiqaravi kei na sokalou, e na nodra veikidavaki, veivakarokorokotaki, kei na veivakalagilagi tale ga.1 “Au sega ni bulia wale ga na yalo ni tamata, ia me sokalou ga vei au.” O koya gona, Mo ni vauci rau na manumanu vuka oqo e na sova ni Nomuni loloma, e na lomalagi ni Nomuni veivosoti, ka qisi rau me rau i dewadewa ni kena vakayarayarataki mai na i loloma tawa yalani, me vaka ni nodrau vauci vata na wasawasa ni loloma oqo, me tubu mai kina e dua na biau ni dauloloma ka me kureitaka ka talaraka mai kina na vei mataniciva kei na veika talei kece ga e so ki na matasawa ni veivakabulai. “Sa vakalaivi rau na wasawasa o Koya, me rau veisotari: Ki liu, e koto kina e dua na i lati e rau na sega tu ni rawa ni lako sivita. Na veivakalougatataki cava tale beka ni nomuni Turaga o ni na cakitaka, e na vuku ni ka oqo? Mai vei rau ruarua e rawa ni ucuna mai kina O Koya na vei mataniciva lelevu ka lalai tale ga.”2

O i Kemuni na Turaga yalo vinaka! Ni vakalougatataka na vakamau oqo me vure mai kina na lase kei na veimataniciva e so. Sa i kemuni dina ga, na Vu ni kaukauwa, na Ka Levu Duadua, na Dauveivosoti Sega ni vakaiyalayala.

• `Abdu’l-Bahá *1. Qur’an 51:56 *2. Qur’an 55:19-22

E na rawa li vakacava me u digitaka na moce, O i Kemuni na Kalou, na noqu Kalou, ka ni matadra o ira era gadrevi Kemuni era se yadra vinaka tu ga me baleta ni ra tawase tani tu mai vei Kemuni; e na rawa li vakacava me u davo sobu e na vakacegu ni se rarawa tu mada ga ka vutugu na yalodra o ira na Nomuni daulomani e na vuku ni nodra yawa tani mai e na Nomuni i serau?

Au sa laiva vakatabakidua. O i Kemuni na Turaga, na yaloqu kei na noqu bula taucoko ki na liga i matau ni Nomuni igu kei na Nomuni veitaqomaki, ka u sa vakadavora sobu na uluqu e na noqu i lokoloko e na vuku ni Nomuni kaukauwa, ka tacake tale me vaka ga na Nomuni lewa e loma kei na Nomuni gagadre. O i Kemuni ga, e na vu ni dina, na Dauveimaroroi, na Dauveitaqomaki, na Vu ni iGu Cecekia, na kaukauwa Duadua ga.

E na vuku ni Nomuni igu! Au sega ni rawa ni kerea e na gauna ni noqu moce se gauna au lako voli kina, ka vakavo ga na veika O ni dau gadreva.O i au na Nomuni dauveiqaravi ia au sa tu e Ligamuni. Mo ni sa bau yalo vakaturaga ka vukei au me u vakayacora na veika e na yaco kina me kaburaki yani na i saluaki boi vinaka ni Nomuni gagadre lagilagi. Oqori dina sara, na Nomuni i nuinui ka nodra i nuinui tale ga o ira era sa marautaka na veivolekati kei Kemuni. Mo ni sa vakalagilagi ga O i Kemuni, na Turaga ni veivuravura kece ga!

• E volai e na i Vola Tabu ni Lawa (Na Kitab-i-Aqdas): “Keimami sa vakaroti kemuni mo ni masu ka lolo e na gauna e dodonu mo ni sa yalomatua kina (yabaki 15); oqo e sa vakarota na Kalou, na nomu Kalou ka nodra Kalou na nomuni qase…. O ira era lako e na dua na i lakolako yawa, o ira na tauvimate, o ira na vakasucu kei ira na tiko bibi era sega ni okati e na lolo…. Mo kakua ni kana se gunu, mai na cadra ni matanisiga me yacova ni sa dromu, ka qarauna mo kakua ni rawai e na veivakatovolei ni gagadre ni yalomu ka vakaleqa na veivakalougatataki e sa virikotori tu e na iVolatabu oqo."

• Na gauna ni Lolo e dau tekivu e na i ka 2 ni Maji ka cava e na i ka 20 ni Maji.

Au masuti Kemuni, I noqu Kalou, e na Nomuni iVakatakilakila kaukauwa, kei nai vakaraitaki ni Nomuni veiyalayalati loloma e na kedra maliwa na tamata, me kakua ni u wiliki tani mai na matamata ni koro ni tiko veivolekati kei Kemuni, ka me u kakua ni vakamalumalumutaki e na vakanuinui au a virikotora tu me baleta na ivakatakilakila ni Nomuni dauloloma e na kedra maliwa na Nomuni ibulibuli. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na rogo kamikamica duadua ni Domomuni kei na Nomuni Vosa vakacerecerei duadua me kauti au mada vakavoleka ki na katuba ni Nomuni i tikotiko tabu, ka me u kakua ni vakalolomataki e na noqu kau tani vakayawa mai e na yaloyalo ni Nomuni veivosoti kei na veivakarurugi ni Nomuni loloma soli wale. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na lagilagi kei na serau ni bekabeka ni Matamuni kei na rarama ni Nomuni tutu lagilagi, ka cila sobu mai e na lomalagi e cake sara, ka me vakayarayarataki au yani e na i boi talei ni Nomuni ukuuku, ka vakavuna me u gunu e na waini digitaki ni Nomuni sakisaki. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na drau ni Ulumuni ka liwa baleta koto na Matamuni, me vaka kina na kena toso baleta na Nomuni peni uasivi e na vei draunipepa ni Nomuni iVola Tabu, me tabonaka kina na i balebale vuni e na kedra maliwa na veimatanitu ni Nomuni ibulibuli, ka me laveti au me u qarava rawa kina na Nomuni Cakacaka, ia me u kakua ni bale i muri, se me u vakaleqai e na nodra veivakacacani o ira ka ra dau vosa vakacacataka na Nomuni veivakatakilakila ka ra dau vuki tani tale ga e Matamuni. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na vuku ni Yacamuni O ni a bulia me Tui ni Veiyaca kece, ka me ra vakamarautaki kina o ira kece era tiko mai lomalagi kei ira kece era tiko e vuravura, me rawa kina vei au me u vakanamata yani ki na i Vola Siga ni Nomuni iUkuuku, ka Mo ni solia vei au na waini ni Nomuni sakisaki. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na vuku ni Vale Tabu e na Nomuni itutu vakaturaga o koya sa serauna tu na delana cecekia duadua, kei na doka ni Vale veivakarurugi ni Nomuni Veivakatakila e na dela ni veidelana cecekia duadua, me na vukei au vakavinaka sara e na kena vakayacori na veika sa lewai mai me vaka na Lomamuni kei na Nomuni inaki me vaka O ni a vakatakila. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu kalou, e na vuku ni Nomuni Totoka e na kena serauna tu na delana ni bula tawamudu, na i serau ka vakavuna me cuva sobu kina e na vakamamasu na veidelana cecere duadua, ka vakalagilagi e na domo ni lali rogo vinaka, me rawa kina ni ka wale vei au na veika kece au taukena, ia me u bula ga e na veika kece sa mai vei Kemuni. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira e na vuravura oqo kei na vuravura sa bera mai.

Au masuti Kemuni, I noqu Kalou, e na vukudra na iLumuti ni Yacamuni, na Daulomani Duadua ga, e na vuku i Koya e sa vakatakatataki kina na utodra na Nomuni daulomani ka laveti cake tale ga kina na yalodra kece sara na tiko e na vuravura oqo, ka me vukei au gona kina me u nanumi Kemuni e na kedra maliwa na Nomuni i bulibuli,ka me u vakalagilagi Kemuni e na kedra maliwa na Nomuni tamata. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka’u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na yavavala ni Nomuni Vuni Lote Tabu vakayalo kei na rogo malumu ni domo ni cagi ni Nomuni vosa mai na matanitu ni Veiyacamuni e vuqa, ka me kauti au vakayawa mai na veika sa sega ni lomamuni, ka me kauti au vakavoleka ga ki nai tikotiko sa serau tu mai kina o Koya na Tovure ni Siga ni Nomuni veivakatakilakila. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na vuku ni iVola,o koya e na gauna vata ga e vosataki mai kina e na lewa ni Gusumuni, e vakavuna me tubu cake na wasawasa, kei na cagi me mudre mai, na vuanikau me vua vinaka mai, kei na vunikau me tutubu mai vakayauyau, kei na veika makawa kece me takali yani, kei na vei ubi kece me luvati tani, kei ira kece era soli ira vakatabakidua yani vei Kemuni, me ra gole yani ki na rarama ni veivakauqeti ni nudra Turaga, na Dauveivukei, ka me vakaraitaka vei au na ka e vuni koto e na Nomuni iyau talei ni kilaka ka taqomaki au tu e na lomanibai ni Nomuni vuku. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na vuku ni katakata ka vakavuna me ra yadra mai kina o ira era Nomuni tamata digitaki ka Nomuni daulomani, kei na nodra veinanumi kei na veivakacaucautaki e na kida ni mataka caca, me ra wiliki au vata kei ira era sa rawata na veika O ni virikotora e na Nomuni iVola Tabu ka vakaraitaki mai e na Nomuni lewa. Ni raici au mai, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na vuku ni rarama ni Matamuni o koya ka vakauqeti ira era yawa yani vei Kemuni me ra sotava na matanimoto ni Nomuni Lewa uasivi, kei ira era sa dina vei Kemuni me ra sotava na nodra i seleiwau na Nomuni meca e na Nomuni sala, ka Mo ni vola mai vei au e na Nomuni Peni rokovi duadua na ka O ni sa vola me baleti ira na Nomuni tamata nuitaki kei ira na Nomuni tamata digitaki. Ni raici au mai, I noqu Kalou, ni u sa tautauri matua tiko ki na Yacamuni, na ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece era tiko e na vuravura oqo kei na vuravura sa bera mai.

Au masuti Kemuni, I noqu Kalou, e na vuku ni Yacamuni ka O ni sa dau vakarogoya mai kina na nodra kaci na dau taleitaki Kemuni, kei na nodra vuturi o ira era dau gadrevi Kemuni, kei na nodra tagi o ira era dau marautaka na tiko veivolekati kei Kemuni, kei na nodra kudru o ira era sa dina vei Kemuni, me vaka ni O ni sa vakayacora na veika era gadreva tu o ira era sa dau vakanuinui vakatabakidua vei Kemuni, ka ni O ni sa yalataka vei ira na ka era gadreva, e na vuku ga ni Nomuni loloma uasivi kei na Nomuni veivuke, kei na vuku ni Yacamuni e na loma ni wasawasa ni veivosoti e ua baleta yani na Matamuni, kei na o ni Nomuni loloma ka sobuti ira na Nomuni dauveiqaravi, me volai vakayadua kina vei ira era sa vuki yani vei Kemuni, ka ra vakamuria na lolo O ni a virikotora, me saumi kina na nodra cakacaka o ira era sega ni vosa rawa vakavo ga e na Nomuni veitawasei kei ira, ka ra biuta laivi na veika vakavuravura era taukena e na nodra sala vei Kemuni kei na nodra Iomani Kemuni.

Au masuti Kemuni, I noqu Kalou, e na Vukumuni kei na vuku ni Nomuni vakatakilakila, kei na Nomuni veivukei dina, kei na i serau ramase ni iVola Siga ni Nomuni iUkuuku, kei na Nomuni Veitabanikau Tabu, me ra vosoti mada kina o ira era sa taura matua tu na Nomuni lawa, ka vakamuria vakadodonu na ka O ni sa vakarautaka vei ira e na Nomuni iVola. Ni raici au mai, I noqu Kalou, ni u sa tautauri matua tiko ki na Yacamuni, na Ka Tabu Duadua, na Ka Serau Duadua, na Ka kaukauwa Duadua, na Ka Uasivi Duadua, na Ka Vakacerecerei Duadua, na Ka Lagilagi Duadua, ka u tatakube tale tiko ga e na bele ni sulu ka ra kubeta tiko o ira kece sara era tiko e na vuravura oqo kei na vuravura sa bera mai.

*“Na vei masu vakaroti e na veisiga, kei na so tale sa macala vinaka tu na kenu i naki, me vaka na Masu ni Veivakabulai, Na iVola nei Ahmad, e sa vakalougatataka oti tu o Bahá’u’lláh e na dua na i vakatagedegede talei, e kaukauwa ka bibi tale ga, ka dodonu gona kina me ciqomi vakavinaka ka me ra vakayagataka na lewe ni vakabauta e na yalo ni vakanuinui dina kei na tudei ka sega ni dau tarogi lesu, ka me rawa kina vei ira me ra tiko veivolekati sara kei na Kalou, ka me rawa tale ga ni ra kila vakavinaka na Nona lawa kei na Nona i naki.”

*- Mai na dua na ivola e volai e na vukui Shoghi Effendi.

Sa i Koya na Tui, na Vu ni Kilaka, na Vuku!

Isa, raica ni sa tagi toka na Manumanu Vuka ni Parataisi e na taba ni Vunikau ni Bula Tawamudu, e na vu ni yalotabu kei na kamica ni rorogo e vuqa, ka kacivaki tiko kina vei ira na yalo savasava na i tukutuku vinaka ni sa voleka mai na Kalou, ka kacivi ira vata tiko mai na lewe ni vakabauta ki na Duavata Vakayalo e na iTikotiko ni Matai Koya na Daulomasoli Duabau, ka tukuna tiko vei ira era sa tawase tani tu na i tukutuku ka sa vakaraitaki oti mai vua na Kalou, na Tui, na Lagilagi, na Turaga e sega ni dua e rau Lewerua kaya, ka me tuberi ira yani na dauloloma ki na i tikotiko ni yalo savasava kei na i serau Lagilagi oqori.

E dina sara ni sa i koya oqo na Ka Totoka ka Levu Duadua, ka dau tukuni e na nodra i Vola kece na i Talai ni Kalou, mai vei Koya e sa na qai vakadodonutaki kina na veika e dina kei na veika e cala, me yaco kina me vakatovolei na dodonu ni vei lewa kece ga. E dina sa i Koya na Vunikau ni Bula ka kauta cake mai na veivuanikau vaKalou, na Cecekia, na kaukauwa, na Ka Levu.

Isa Ahmad! Mo qai vakadinata sara ni sa i Koya ga na Kalou ka ni sega tale ni dua na Kalou sai Koya duadua ga, na Tui, na Dauveitaqomaki, o Koya sa Sega ni Vakatautauvatataki rawa, na kaukauwa Duadua ga. Ia o Koya na Duabau ka talai yani e na yaca na ‘Ali’ (na Báb) e a lako dina mai vua na Kalou, ka sa i koya na Nona lewa e da sa mai lomavata tiko kina oqo.

Mo cavuta: O i Kemuni na tamata mo ni talairawarawa ki na lewa ni Kalou o koya e sa vakaroti tu e na iVola Tabu na Bayan mai vua na Lagilagi, o Koya na Vuku. E dina sa i Koya na nodra Tui na i Talai ni Kalou kei na Nona iVola sa i koya na Tina ni Veivola Tabu, me vaka O ni sa kila.

Oqori na vuna e vakarogoya tiko yani na Nona kaci na Manumanu Vuka mai na valeniveivesu oqo kivei kemuni. Me rawa kina vua me vakauta yani na i tukutuku macala vinaka oqo. O koya vakayadua e gadreva, ia me vakanadakuya mada na i vakasala oqo kei koya tale ga e gadreva me digitaka mada na gaunisala vua na nona Turaga.

O i kemuni na tamata, ke vaka o ni sa cakitaka na tikina oqo, e na i vakadinadina cava beka o ni sa bau vakabauta oti kina na Kalou? Ni vakaraitaka mada mai, O i kemuni na lewe ni vavakoso dau vakatitiqa.

E dina sara, e na vuku i Koya ka tiko e ligana na yaloqu, era na sega, ka ra na sega sara ni rawa ni ra vakayacora e dua na ka, veitalia Sara ke ra mani duavata me ra veivuketaka.

Isa Ahmad! Kakua ni guilecava na Noqu loloma soli wale e na gauna au yali kina. Mo nanuma na Noqu gauna e na veisiga ni nomu bula, kei na Noqu vakatalai tani tu mai ka vakararawataki tu e na valeniveivesu yawa oqo. Ia mo tu dei tiko ga e na Noqu Loloma me kakua kina ni lomalomarua rawa na utomu, veitalia ga ke vaka e mani miri mai vakauca vei iko na nodra i seleiwau na meca se ra tucake mai e na lomalagi kei vuravura me ra vorati tiko.

Mo sa tautauvata mada kei na yameyame ni buka kivei ira na noqu meca ka vaka na uciwai ni bula tawamudu kivei ira na Noqu daulomani, ka mo kakua ni okati vata kei ira era vakatitiqa.

Ia ke vaka o mani rawai e na veika rarawa e na Noqu gaunisala, se vakalolovirataki e na Vukuqu, mo kakua ni loma leqa kina.

Mo vakararavi vua na Kalou, na nomu Kalou na nodra Turaga na nomu qase. Ni ra sa lako voli na tamata e na veigaunisala ni veilecayaki, ka ra vakaleqai tu e na nodra vakabauta ni ra na raica votu na Kalou e na matadra dina se rogoca vakaidina na Domona e na dui daligadra dina. Ia na veika oqo Keimami sa kunea vei ira. me vaka o ni sa vakadinadinataka oti.

O koya gona sa yaco kina na nodra vakabauta vakaoqu me i lati vei ira kei na dui utodra ka tarovi ira mai na gaunisala vua na Kalou, na Cecekia, na Ka Levu.

Mo vakadeitaka tiko e lomamu, ni o koya dina e na gole tani mai na Ka Totoka oqo e a gole tani tale ga mai vei ira na i Talai ni Kalou e na veigauna sa oti ka ra dau vakaraitaka na nodra dokadoka vua na Kalou e na veigauna oqo ka tawa mudu.

Mo vulica vakavinaka tiko na Masu oqo, Isa Ahmad, cavuta e na veigauna ka mo kakua ni tamusuki iko mai kina. E dina sara, ni na vakalougatataki koya e dau seretaka na masu oqo na Kalou, me vakatautauvatataki kei na nodrai cocovi na lewe duanadrau era mate e na vukuna na Kalou kei na veiqaravi e na vuravura oqo kei na kena sa bera mai. Na veivuke oqo Keimami solia yani me vakasaututaki kemuni ka me ka ni veivakalougatataki mai vei Keimami kei na ka ni veivosoti e na Neimami tiko voli oqo, me yaco rawa kina mo tautauvata kei ira era kila na vakavinavinaka.

E na vukuna na Kalou! Ke vaka e dua e vakaleqai se loma ocaoca se yalo rarawa e wilika na iVola Tabu oqo e na yalona dina taucoko, e kauta tani na Kalou na nona rarawa, ka walia na nona leqa ka vakaseavutaka na nona loma ocaoca.

E dina, sa i Koya ga na Dauveivosoti, na Dauloloma. Me vakacaucautaki tiko ga na Kalou, na Turaga ni vuravura kece ga.

*(Na masu oqo, e vakaraitaki mai vei `Abdu’l-Bahá, ka vakayagataki e na Nona iBulubulu Tabu. E rawa tale ga ni cavuta e dua e na nona masu vakai koya ga, e vale.)

*“O koya yadua e cavuta na masu oqo e na dela ni yalo malumalumu kei na vakabauta, e na vakavurea na reki kei na yalo marau e utodra na Dauveiqaravi (`Abdu’l-Bahá) oqo; me vaka ga na veisotari vata kei Koya."

Sa i Koya ga na Vu ni Lagilagi!

O i Kemuni na Kalou, na noqu Kalou! E na yalomalumalumu kei na mata tagitagi, au sa laveta cake yani na ligaqu lala oqo kivei Kemuni, ka ubia na mataqu e na kuvu ni soso e na Nomuni Loqi Tabu oqori, e uasivita na i vakatagedegede cecere ni nodra kilaka na vuku, kei na nodra vakacaucau o ira kece ga era vakalagilagi Kemuni. Ni yalololoma ka raici ira sobu mada mai na Nomuni tamata, era sa yalomalumalumu ka tiko sese e na Nomuni mata ni katuba, ka ra vakaraica voli yani na i serau ni Nomuni veivosoti, ka Mo ni vakadromuci koya e na Wasawasa ni Nomuni loluma tawamudu.

Turaga! Oqo e dua na Nomuni tamata ligalala ka vakaloloma, ka vakadrukai e na nona gagadre me qaravi Kemuni, sa vesuki e na Ligamuni, ka vakamamasu tiko yani e na yalodina vei Kemuni, ka vakabauti Kemuni, ka tagi e Matamuni, ka kaci tiko yani vei Kemuni e na nona vakasaqarai Kemuni, ka kaya:

O i Kemuni Turaga, na noqu Kalou! Ni solia vei au na Nomuni veivuke me u qaravi ira na Nomuni daulomani, vakaukauwataki au e na noqu veiqaravi vei Kemuni, vakararamataka na vacuvacu ni mataqu e na rarama ni veivinakati e loma ni Nomuni valenilewa tabu, kei na soromasu ki na Nomuni matanitu ni lagilagi.

Ni vukei au me u tu rawa vakataki au e na i curucuru vakalomalagi ki na Nomuni matamata, ka vukei au tale ga me u vagalalataki mai e na veika kece ga e na loma ni Nomuni i tikotiko tabu vakayalo. Turaga! Ni solia mada me u gunu mai na bilo tabu ni tiko taudua; e na kena i ubi Mo ni vakasulumi au kina, kei na loma ni kena wasawasa ni vakadromuci au kina. Ni qisi au me u bau dua na kuvu ni soso e na gaunisala e nodra na Nomuni daulomani,ka vakadonuya mada me u sa bau cabora yani ki cake na yaloqu e na vuku ni kena vakaturagataki na vuravura oqo e na mawe ni yavadra na Nomuni digitaki ka ra lakova na Nomuni gaunisala, O i Kemuni na Turaga ni Lagilagi e na i tikotiko Cecere duadua.

E na masu oqo sa kacivi tiko kina na Nomuni dauveiqaravi oqo, e na kabu ni mataka kei na lomaloma ni bogi. Ni vakavotukanataka mada na gagadre ni lomana, I Turaga! Ni serauna na yalona, vakamarautaka na utona, vakacaudreva na nona cina, me rawa kina ni qarava na Nomuni iNaki kei ira na Nomuni dauveiqaravi.

Sa i Kemuni ga na Dauveisaututaki, na Dauveinanumi, na Dauloloma Soli wale Duadua ga, na Lagilagi, na Dauveivosoti, na Dauloloma.