The Hidden Words

• 1 - O KOM ARMIJ RO EWOR AIR KOLMENLOKJEN IM LOJILNIER NON AIR RON! Kir eo moktata an eo Jitenburu ej in! O bao-nightingale eo etino! Jab jokwe jabrewot jikin ak ilo wot jikin kallip in ut-rose eo an jitob. O dri jilok kin yokwe eo an Solomon! Kwon jab bar bukot juon jikin likebijnan ijellokin wot ibben Sheba eo ej jitenburu, im O bao-phoenix eo enaj mour indreo! Jab jokwe ilo jabrewot jikin ak ion wot tol in mol im tiljik. Iloan ijin ej ijo jikum, elane ba ko bein jitob eo am renaj kelinlok non ijo ejelok jemlokin im jibarok lok mejen kajik eo am. Bahá’u’lláh

• 2 - O NEJIN JITOB! Bao eo ej bukot el eo an; ak bao-nightingale ej bukot aibuijuij eo an ut-rose eo; bao ko, einwot buruon armij, rej bo buruier kin binal eo ej jako lok, im jebwebwe tolok jen el in mour indreo, im kin mej ko mejeier rej oktak lok non men ko rewan im rej jako lok im rej jab maron loe aibuijuij im kwojarjar im bed eo an. Ejerata wot! Ekabilonlon im kaburomijmij wot; bwe kin jidrik wot cup ebool, ekoman bwe ren ellok im likjab jen lometo ko rellab an ijo eutiej tata, im bed wot ilo air etollok jen turin lan eo eromak. Bahá’u’lláh

• 3 - O JERA! Ilo jikin kallip eo ilo buruom kwon kalbin wot ut-rose in yokwe eo, im jen yokwe im konan eo an bao-nightingale kwon jirok bin. Kwon kaurok ro jimjera rejimwe im wenik im ilok jen am koba lok ibben ro rejab wenik. Bahá’u’lláh

• 4 - O NEJIN JIMWE! Ia eo juon dri yokwe enaj ilok nane elane ejab nan ailin eo an dri yokwe eo an? Won juon dri kabukot enaj maron in kakije ilo an ettolok jen konan eo an buruon? Nan juon dri yokwe eo emol, ibben dron ej mour, im jibel jen dron ej mij. Ion ubon ejelok kijenmij im ilo buruon ejelok ainemon. Elon mour ko enaj kojekdroni nan an mokaj lok nan ijo dri yokwe eo an ej bed ie. Bahá’u’lláh

• 5 - O NEJIN BINAL! Emol ij ba non yuk: Armij eo ejatiljok tata ian aolep armij ej eo im ej iakwelel wan im bukot bwe en utiej lok jen eo jein ak jatin. Jen ba, O ro motta! Komin kebelbel kom kin jerbal ko im jab kin naan ko ami. Bahá’u’lláh

• 6 - O NEJIN LAL! Komin jela bwe buru eo ewor wot jidrik malkan ebanban ie ejamin tobar ailin eo ejelok jemlokin, ak jamin nemak nem eo emalu jen ailin eo Ao ekwojarjar. Bahá’u’lláh

• 7 - O NEJIN YOKWE! Juon wot bunten ne etollokim jen ijoko reutiej im aibuijuij ilon im jen wijki in yokwe eo jen lan. Kwon bok juon bunten ne manlok im kin bunten ne kein karuo kwon drelone loan melan imon kebed eo ej bed non indreo. Kwon ronjake men eo emoj an walok tok jen pen in aibuijuij. Bahá’u’lláh

• 8 - O NEJIN AIBUIJUIJ! Mokaj ilo ial in kwojarjar, im drelon ilo lan im komao Iba. Kareoik buruom kin kein karreo an jitob, im mokaj lok non loan jikin eo eutiej tata. Bahá’u’lláh

• 9 - O ANNAN EO EIDRIN AN JAKO! Kwon ella lok jen mour in berre im walintak non ijoko reutiej im mol. Kebelok mejen mol, bwe kwon maron loe Aibuijuij eo ejab nojak im ba; Ekwojarjar en bed Ibam Iroij, Eo eweppen tata ian aolep dri komanman otemjij. Bahá’u’lláh

• 10 - O NEJIN KONAN! Kwon ronjake menin: Mejen armij ejamin kile aibuijuij indreo, ak buru eo ejelok mour ie ejamin lo monono ak ilo wot men eo ej aimerlok. Bwe men ko eierwot juon rej bukot dron, im monono ilo air bed iben dron. Bahá’u’lláh

• 11 - O NEJIN BINAL! Kiil mejam, bwe kwon maron lo aibuijuij eo Ao; Kiil lojilnim bwe kwon maron ronjake Ainikio eaibuijuij; lutoklok aolepen jelalokjen eo am, bwe kwon maron bok jelalokjen eo Ao; im kareoik yuk jen mweie ko, bwe kwon maron bok kij in jeramon eo am ejelok jemlokin jen lometo in kejraman eo Ao ej bed non indreo. Kiil mej ko mejam jen aolep men otemjij, ijellokin wot aibuijuij eo Ao; kiil lojilnim jen aolep menotemjij ijellokin wot nan eo Ao; lutoklok jen kwe aolep jelalokjen otemjij ijellokin wot jelalokjen eo kin Io; bwe kin mej ko relolokjen, juon buru eo erreo im lojilni ko rebellok, kwonaj maron drelone loan woror eo Ao ekwojarjar. Bahá’u’lláh

• 12 - O ARMIJ EO RUO AN LOLOKJEN (VISION)! Kiil juon mej im kebellok eo juon. Kiil juon jen lalin im aolep men ko ie, im kebellok eo juon nan aibuijuij ekwojarjar an eo Jitenburu. Bahá’u’lláh

• 13 - O AJIRI RO NEJU! Imijak, elane inaj likjab in ronjake ainikien bao-mule eo jen lan, im naj rumulok ilo annanin mij im jako im jamin bar lo aibuijuj in ut-rose eo, im jeblak nan dren im bwirij (clay). Bahá’u’lláh

• 14 - O RO JERA! Jab jolok aibuijuij eo ej bed nan indreo kin aibuijuij eo enaj jako, im jab likit buruom ilo binal in lalin. Bahá’u’lláh

• 15 - O NEJIN JITOB! Ej itok wot ien eo nan an bao-nightingale eo ekwojarjar jamin bar kwalok men ko remilal im ittino im komman bwe komin jab likjab jen ami ron ainikien eo eaibuijuij jen lan im ainikien eo jen ijo eutiej. Bahá’u’lláh

• 16 - O UNJEN JERWAN! Elon wot loo ko rej walok ainikier ilo juon wot naan, im elon wot men ko retino im nojak rej walok kin juon wot ainikien eaibuijuij; ak men eo in, ejelok lojilni nan ronjake ak buru nan melele kake. Bahá’u’lláh

• 17 - O RO MOTTA! Kejem ko im rebellok ilo Jikin eo ilan rebellok leplep im jikin jokwe an eo jitenburu emoj kebelbele kin botoktok in dri yokwe ro, ak jen rein rellon wot, jet wot iaier renaj tobar jikin in eutiej ilan, im jen rein reiot wot, emoj an alikar bwe jet wot iaer erreo buruier im kwojarjar jitobier. Bahá’u’lláh

• 18 - O RO REJ JOKWE ILO PARADISE EO EUTIEJ TATA! Kwalok nan ajiri ro im kaineman ir bwe ilo melan ko rekwojarjar, ko im rebake lok paradise ilan, emoj an walok juon jikin kallip ekal, ijo dri amnak an jikin eo ilan im ro rej jokwe ilo paradise eo ej bed nan indreo, rej jebole. Kin menin, kwon jibadrek ijin, bwe kwon maron tobar jonan en, nan am maron loe men ko retino kin yokwe jen wut-bao-jen-mar(wind-flower) im jela kin loletet eo elikio, ekwojarjar im ittino walok jen le-ko-leen rej bed nan indreo. En ainemon mejen ro rej drelon im jokwe ijin! Bahá’u’lláh

• 19 - O RO JERA! Ta emoj ami meloklok jibonin eo ealikar an romak, ilo melan ko rekwojarjar im reobrak kin jeramon, ilo ami kar koba tok Ibba iumin ailulur in wijki in mour eo im emoj katke ilo paradise eo eaibuijuij tata ke? Kom ar bwilon im lokjen ami ke Iar kwalok naan kein jilu rekwojarjar tata: O ro jera! Jab likit konan ko ami ion konan ko Ao, komin jab konan men ko im Ijab kelet non kom, im jab wonmaik Io kin buru ko remij, jab katoni kin konan im mom ko an lal. Ne kom naj kar kareoik jitob ko ami, ilo awa in kom naj kar kememej tok jikin eo im men ko ibelakin, im mol in konono ko Ao naj kar komman bwe ren alikar nan kom aolep. Bahá’u’lláh

• 21 - O ANANIN BINAL EO EJ EMAKITKIT! Ikonan koba waj ibbam, ak ejelok am liki Io. Jaje in jumae eo am emoj an juoke wijki in kejatdrikdrik eo am. Ilo aolep ien, Ij bed ebake yuk, ak kwoj kotolok yuk jen Io. Emoj Ao kelet nan kwe aibuijuij eo ejamin jako, ak emoj am kelet menin kajokok ko ejelok jonair nan kwe make. Kio ke eja wor wot ien, kwon jeblak tok, im jab kejool ien in ebelok nan yuk. Bahá’u’lláh

• 22 - O NEJIN KONAN! Dri kabel im dri meletlet ro elon yio in air kotobar im jab tobrak iman mejen Eo eaibuijuij potata; rar jolok mour ko air im bukbukot E, ak rar jab maron loe aibuijuij in turin Mejen. Kwe kin ejelok kate, kwar maron tobar jibarbar eo am, im ilo am jab kar bukote, kwar lo men eo kwoj bukote. Mekarta kwar bed im lokjak kin konan ko am make, im mejam ear jab maron loe aibuijuij eo an Dri yokwe eo, ak peim ear jab unir jabon nuknuk eo An. Kom ro ewor mejami komin loe menin im bwilon. Bahá’u’lláh

• 23 - O RO DRI AMNAK ILO JIKIN KWELOK IN YOKWE! Ainikien kajur ko an lal rar kune candle eo eromak eo ej bed nan indreo, im aibuijuij eo an Jodrikdrik eo jen lan ej libobo ilo marok in binal. Iroij in king in yokwe emoj an armij ro relej na ruon im bao- mule ekwojarjar ej babu im kalibuj ikotan akin neen bao-owl ko. Ro rej jokwe iloan imw-ajur eo eaibuijuij, ej ijo dri kwojarjar ro ilan rej jan im liejlol ie, ak komij kiki ilo ailin in jerwan, im kautiej kom make ke komij ro jeran. Ejelok wot jonan ami bed kin lomnak waan ko ami make! Bahá’u’lláh

• 24 - O KOM RO DRI JAKBWEL, AK KOMIJ LIKITI KOM DRI MELETLET! Etke emoj ami kejakolkol kom im konak nuknuk in shepard ko, ak tuloa komij kiru-wolf, kajeon abedi im kakuri bwij-jin sheep ko ao? Komij einwot iju eo ej tak mokta jen jimerok im mene einwot eromak im meram, ak ej tel dri ito-itak ro ilo jikin kwelok eo Ao nan jabwebwe im nan loan ial in jorren. Bahá’u’lláh

• 25 - O KOM EINWOT DRI JIMWE AK ITU-LOA EKAJOJO IM ETTON! Komij einwot dren eo erreo ak ilo mol emmeo, Ilo kalimjek jen tulik erreo im alikar ak ilo an Dri kakolkol eo jen lan erejone, ejamin ilim juon bilin. Aet, koon al ko rej rome binal im kilaj(mirror) ko jimor, ak einjuon air romak jen dron im einwot bar meram in iju jen lal: jab, jejab maron keiri meramier nan dron! Bahá’u’lláh

• 26 - O JERA ILO NAN! Kolmenlokjen mok kake menin. Konanin kar ron ke eo jimjera im eo dri kejdrat rej jokwe ilo juon wot buru? Inem kwon kadiwoj lok eo driwaimejet, bwe eo Jimjera en drelone jikin jokwe eo An. Bahá’u’lláh

• 27 - O NEJIN BINAL! Aolep men ko ilo lan im ilo lal emoj Ao likit bwe en am, ijellokin wot buruon armij, eo emoj Ao koman bwe en jikin jokwe an aibuijuij im woleo eo Ao; ak emoj am lelok mweo Imo im ijo Jiku nan bar juon Ijelloku; im ilo jabrewot ien aibuijuij eo Ao ej bukot ijo Jikin ekwojarjar, Ej lo driwaimejet eo ie, im, kin an jojoler ej mokaj lok nan jikin kone an Dri yokwe eo. Mekarta, emoj Ao noj menin itino in am ilo Ao jab konan bwe kwon jook kake. Bahá’u’lláh

• 28 - O UNJEN KONAN! Elon wot jimarok ko Iar driwoj lok jen jikin ko ilan im jibarok waj jikin jokwe eo am, im lo am jokane ion kinem im boub ibben ro jet Ijelloku. Kin menin, einwot meram in jitob eidrin, Iar jeblak nan ailin ko reaibuijuij ilan im jab kennan kake menin nan jerlebju in dri kwojarjar ro ilo jikin kakije ko Ao ilan. Bahá’u’lláh

• 29 - O NEJIN JERAMON! Jen kobij im jen ejelok, kin bidrij(clay) in kakien eo Ao Iar ejake yuk bwe kwon walok, im moj likit bwe kwon ekatak kake kajojo atom ilo mour in im mol eo ilo aolep menin komanman ko. Kio, mokta jen am walok tok jen lojien jinom, I ar keboj ruo jikin am idrak milk, mej ko nan am lale im kejabarok yuk, im buro ko nan yokwe yuk. Jen yokwe im jouij eo Ao, iumin ailurlur in tiriamo eo Ao Iar najidrik yuk, im kejbarok yuk kin jouij im kejramon eo Ao. Im unin Ao kar komman eindrein bwe kwon maron tobar ailin eo Ao ejelok jemlokin im maron bok leen kejraman ko Ao retino. Ak kwoj bed im mour ilo am jebwebwe im jajelokjen, im kio ke kworito, emoj am kajejtokjen aolep menin kejramon ko Ao im boub make kin lomnak ko am rewan, nan juon jonan eo im kio emoj am erom juon eo emelele, im oktaklok jen aur ko an eo Jimjera im jokwe iloan oror ko an eo Ao dri kejrat. Bahá’u’lláh

• 30 - O DRI KAMAKOKO AN LAL! Elon wot jimarok ko kitwon yokwe im joij eo Ao emoj an book waj yuk im lo am kiki im jajelokjen ion kinem. Inem ejan im liejlol kin wewen in kwoj ber ie im bar jeblak nan ijo ear itok jene. Bahá’u’lláh

• 31 - O NEJIN LAL! Elane kwoj bok Io, jab bar bukot juon Ijelloku; im elane kwoj kalimjak wij eo Ao, kil mejam non lalin im men ko ie; bwe Ankilao im kilan bar juon Ijelloku, einwot kijeek im dren, rejab maron bed ibben dron ilo juon wot buru. Bahá’u’lláh

• 32 - O JERA DRI WAIMEJET! Candle eo ilo buruom ej urur im ebbol kin bein kajur eo Ao, jab kune kin kituon jumae an mour in konan im mom. Unokan aolepen naninmij ko am ej ilo am ememej Io, jab meloklok menin. Likit yokwe eo Ao bwe en menin aurok eo am im tiljok kake einwot am kejbarok mejam im mour eo am. Bahá’u’lláh

• 33 - O JEIU IM JATU! Ronjake naan in kamonono ko jen Loou etonal, im ilim dren ko rekwojarjar tortok jen Tiio etonal. Katok inen meletlet ko Ao jen lan ilo bwirej eo erreo ilo buruom, im utdrikdriki kin dren in mol eo, bwe ut in jelalokjen im meletlet eo Ao ren maron walok lintak ilo air kal im maroro ilo jikin kwelok eo ekwojarjar ilo buruom. Bahá’u’lláh

• 34 - O RO REJ JOKWE ILO PARADISE EO AO! Kin ba ko bein jouij im yokwe, emoj Ao katoke ilo jikin kallip eo ekwojarjar ilo paradise, wijke jidrikdrik in am yokwe im jimjera, im emoj wutdrikdriki kin dren ko rerreo kin jouij im meanwod eo Ao; kio ke ejejjet awa in an kalle, kajeon kejbaroke, bwe en jab bwil im jako ilo kijeek in konan im mom. Bahá’u’lláh

• 35 - O RO JERA! Komin kune lamp in bwir im jebwebwe, im kaurur ilo buruomi kijeek in tel eo jen lan ejelok jemlokin. Bwe ejab etto drietale lokan jerbal an armij ro, renaj, ilo bed eo ekwojarjar an eo jej kabun non E, jamin bok jabrewot ijellokin wot mwil ko rerreo im jerbal ko rewenik im kwojarjar tata. Bahá’u’lláh

• 36 - O NEJIN BINAL! Armij kabel im meletlet rej ro im rejamin konono mae ien emoj air ronjake, einwot an dribok cup eo, jamin lelok cup eo mae ien enaj lo juon eo dri aikuij, im driyokwe eo ejamin jan jen ijo emilal tata iburuon mae ien eo enaj kalimjok aibuiuij an eo ejitenburu ibben. Kin menin katok inen meletlet im jelalokjen ko ilo bwirej eo erreo ilo buruom, kejbaroki im noji, mae ien eo ut-hyacinth in meletlet ko jen lan renaj jebar im waloktok jen buruom im jab jen bwirej im bedkat. Bahá’u’lláh

• 38 - O NEJIN JITOB! Rube im driwojtok jen worwor eo kwoj lokjak iloan, im einwot bao in yokwe(phoenix), kwon kelonlok nan ijo ekwojarjar ilan. Karmejete yuk make, im kobrak yuk kin jitobin tiriamo, im jokwe ilo ailin eo ekwojarjar ilan. Bahá’u’lláh

• 39 - O DIKTAK IN BINAL! En jab jokane buruom kin emon eo an juon ran eo ej jako lok, im kwon jab likjab jen kakije eo ejelok jemlokin. Jab wia kake jikin kallip in monono eo ejellok jemlokin kin juon ejouj in binal in lalin. Diwojtok jen jikin kalbuj eo am im kelinlok non melan ko reaibuijuij ilan, im jen lokjak ko an lal, kwon kelonlok nan paradise eo ej bed i Lan. Bahá’u’lláh

• 40 - O AO DRI JERBAL! Kanemkwoj yuk jen likjab ko an lalin, im korollok jitob eo am jen jikin kalbuj eo iloam. Bok ien in emon nan kwe, kinke ejamin bar iwoj nan kwe tokelik. Bahá’u’lláh

• 41 - O NEJIN DRI JELKA KORA! Elane kwar lo mour im utiej eo ejellok jemlokin, kwonaj kar jibadrek bwe kwon ella jen lalin emokaj an jako. Ijoke nan noj juon ian men kein jen kwe im kwalok eo juon ej menin ittino eo ejellok en emelele kake ak eo wot erreo buruon. Bahá’u’lláh

• 42 - O AO DRI JERBAL! Kareoik buruom jen mour in kejrat im lej, im bareiwnot jen mour in ebanban, im drelone worwor eo ekwojarjar ilan. Bahá’u’lláh

• 43 - O RO JERA! Komin etetal ilo ial in ainemon im monono an eo Jerar, im jela bwe ainemon im monono eo An ej bed ilo ainemon im monono an menin komanman ko An. Bwe ej einwot in: en ejelok juon armij en drelone mweo imon eo jeran elane ejab jen melim eo an, ak jab anemkoji men ko mweien, ak komman bwe en lab lok kilan jene, ak bareinwot kakure ilo an bok jeramon jene. Kolmenlokjen mok kin menin, kom ro im ewor lolokjen ibbeier! Bahá’u’lláh

• 44 - O EO EJ MOTTAN THRONE EO AO! Jab ronjake men ko renana, im jab kalimjeki bareinwot, jab kottaik yuk make, ak jab jan im burumoj. Jab konono kin men ko renana, bwe kwon jab maron ron air konono kaki non yuk, jab kolablok bwir ko an ro jet bwe bwir ko am make ren jab walok air lab im naj alikar; im kwon jab kojol im kottaik ro jet, bwe en jab walok am etta im jol. Innem kwon mour ilo ran in mour kein am, bwe rekadu wot im idrin air jemlok, kin kolmenlokjen erreo, buru eo eweppen, lomnak ko rerreo, im mour ekwojarjar, im kin anemkoj im jokane, kwon maron utik enbwin eo am, im ilok nan paridise eo ettino im jokwe ilo ailin eo ejelok jemlokin eo ej bed nan indreo. Bahá’u’lláh

• 45 - K OMIN EKKOL! O RO REJ YOKWE MOUR IN LAL IN! Einwot mokaj im idrin in jarom, emoj ami itok im ella jen Eo Jitonburo, im emoj ami ukot lok buruomi non lomnak ko an satan. Komij bukelolo im kabun im kautiej lomnak ko ami rewan, im likit bwe rej jet lomnak ko remol. Emoj ami ukot lok mejami non mar-wan eo eliklik im likit bwe ej juon ut. Ejanin wor juon naan erreo emoj ami menonoiki im kwalok e, im bareinwot ejanin wor juon koto erreo ej tor tok jen tu- milal in buruomi im ej kalikar ami ellok jen mour in lal in. Emoj ami jolok im kajejtokjen naan in yokyokwe im kakabiloklok an eo Jitenburu im jerrilok men kein jen tablet ko iloan buruomi, einwot menin mour ko ion melaj ko, komij emakit im mour ilo melaj in konan im mom. Bahá’u’lláh

• 46 - O JEIU IM JATU ILO IAL EO! Etke emoj ami ellok jen ami kwalok etan eo Jitenburu, im kottonlok kom jen bed eo An ekwojarjar? Unjen aibuijuj ej bed iloan imon kabbed eo ejelok einwot im ej bed ion throne eo eaibuijuij, ak komij bed im boub kin lemnak ko ami rewaan. Nem ko renaaj im kwojarjar rej tortok im menwan tiriamo ej lutoktok, ak komij bed bajjok ilo ami entan im jab bok jeramman jeni. Iburomij kin kom im kin ro rej lor kom im anek jenkwan nemi! Bahá’u’lláh

• 47 - O AJIRI IN KONAN! Utik im jolok nuknuk in kabwil im likemejeje, im bareinwot utik im jolok jen kom nuknuk in jejjej im utiej buru. Bahá’u’lláh

• 49 - O AJRI IN BINAL! Jiron dri mweie ro kin ainikien jan im owar an dri jeramol ro ilo lukon-bon, ilo air ellok im jab eoron menin, renaj bed ilo ial in jerata im jorren, im naj bok ir jen wijki in jeraman eo. Non lelok jiban im mour in joij ej kadkad in mour ko Ao; en jeraman eo im ej kebelbel e make kin mour ko Ao remman. Bahá’u’lláh

• 50 - O RO REJ BED ILO MOUR IN KONAN! Utiki im jolok mour in ebanban im konan im bukot mour in ainemen im jokane; kinke mour in ebanban im konan renaj koman likjab, im mour in aineman im jokane rej menin yokwe im nebar. Bahá’u’lláh

• 51 - O NEJIN DRI JELKA KORA! Kwon jab inebata ilo am jeramol ak jab kejjat ilo am mweie, bwe jeramol enaj lore jeraman im jeraman enaj loran jeramol. Ak jeramol ilo aolep men otemjej ijellokin wot Anij ej juon menin letok eo eweppen, inem jab kajejtokjen menin, bwe eliktata enaj koman bwe kwon mweie ilo Anij, im kwonaj jela kin melelein nan kein, “Emol kwoj juon dri jeramol,” im bareinwot ilo nan kwojarjar kein, “Anij emweie kin men otemjej,” einwot an al tak ilo jibon im romak im aibuijuij iturin lan iloan buruon dri yokwe eo ej jokwe ilo jokane ion throne in mweie im jeraman eo. Bahá’u’lláh

• 52 - O AJIRI RO NEJIN JERWAN IM MOM! Emoj ami kadrelon eo ej kejdrate Io nan loan mweo Imo, im kadriwoj lok eo Jera, kinke emoj ami kejbarok yokwe eo an bar juon Ijelloku ilo buruomi. Komin ronjake men ko im eo Jitenburu ej jiron kom kaki im oktak lok nan paradise eo An. Ro jeran lalin, rej bukot wot men ko remman nan ir make, einwot ne rej lukun yokwe dron, ak Jerar eo emol, Ej eo ellukun mol an yokwe kom; emol, emoj An iion elon wot menin entan im jorren nan An tel kom. Komin jab etaoiki im ellok jen eo Jerar, ak komin oktak lok im mokaj lok nan Ibben. Enin ej ijuran in naan im tomak eo emol, emoj an tak im walok iturin lan in pen eo an Iroij in aolep et. Kobelok lojilnimi bwe komin maron ron naan eo jen Anij, Dri jiban ilo ien uota, Eo ej mour kin E make. Bahá’u’lláh

• 53 - O KOM RO KOMIJ UTIEJ BURU KIN MWEIE KO AN LAL! Komin jela mol in ke mweie ej menin kabanban eo elap tata ikotan eo ej dri kabukot im eo buruen eaikuji, dri yokwe eo im eo ej jitenburu ibben. Dri mweie ro, ijelokin wot jet iaier renaj jamin maron drelone worwor in bed eo An, ak jikin jokane im ainemon eo An. Inem en jeramon dri mweie eo im mweie ko an rej jab drebiji jen ailin eo ejelok jemlokin, ak koman an likjab jen lal eo ejamin jako. Kin Et Eo Elaptata! Romak eo an in emweie enaj rome ro rej joke ilo lan einwot an al romak ion armij ro rej joke ilo lal! Bahá’u’lláh

• 54 - O RO DRI MWEIE ION LAL! Dri jeramol ro ibwiljimi rej Ao dri jolet; kejbarok dri jolet rein Ao, im jab lemnak wot bwe en emon kojeiemi. Bahá’u’lláh

• 55 - O NEJIN KONAN IM MOM! Karreoik kom jen etton ko an mwie im kin jokane im mour erreo drelon im bed ilo mour in jeramol; bwe jen ijo unjen mour in karmijete ej waloktok jene, kwonaj maron ilim wine in mour indreo. Bahá’u’lláh

• 56 - O NEJU MAN! Kobalok im bed ibben dri jerawiwi ej kolablok buromij, ak bed im mour ibben ro dri wenik ej karreoik im jolok ejjo ko ilo buru. Eo ej bukot an konono ibben Anij, en mokta koba lok ibben dri yokwe ro An; im eo ej jibadrek bwe en ron naan ko an Anij, en mokta ronjake naan ko an dri kelet ro An. Bahá’u’lláh

• 57 - O NEJIN BINAL! Kwon ekkol! Jab etetal iben ro dri jerawiwi im jab koba lok ibbeier, bwe ilo am naj koba lok ibbeier enaj ukot romak in buruom nan kijeek in mij indreo. Bahá’u’lláh

• 58 - O NEJIN DRI JELKA KORA! Elane kwoj bukot kejramon eo an jitob kwojarjar, drelon im kobatok ibben eo dri wanik, bwe emoj an ilim cup in mour indreo jen ba ko bein Eo ej kabjer Cup in mour indreo einwot an meram in mekar ilo jibon kemour im rome buruon ro dri mij. Bahá’u’lláh

• 59 - O DRI KIBLIA! Jab lomnak bwe itino ko iloan buru ko renojak, aet, kwon jela mol in bwe mwil kein emoj jei im kalikari iman Mejen Eo ekwojarjar. Bahá’u’lláh

• 60 - O RO JERA! Emol Ij ba nan kom, jabrewot men eo emoj noj ilo buru ko buruomi nan Kim ebelok im alikar einwot ran; ak men eo etino ej jen joij im konan eo Amw, im rejekar nan ami melele kaki. Bahá’u’lláh

• 61 - O NEJIN ARMIJ! Juon bilinlin in molawi jen lometo in tiriamo eo Ao emulal emoj Ao jere ion armij in lal, botab ejelok juon ear oktak tok nane, einwot ke aolep armij emoj air oktak lok jen wine in buru-juon eo jen lan nan men ko rekajojo im etton an mour in im boub wot kin cup in mour eo enaj jako im jolok cup eo eaibuijuij im ej bed nan indreo. Reboub wot kin men ko retton im kajjojo. Bahá’u’lláh

• 62 - O NEJIN BINAL! Mejami en jab ellok jen wine eo etonal im ejelok einwot an eo Jitenburu indreo, im jab drelok nan men ko rekajjojo im nana an lalin. Komin bok jen bein Dri bok Cup eo jen lan, cup in mour indreo, bwe meletlet otmjij ren ami, bwe komin maron ron ainiken eo jen lan ej ikkir tok jen ailin eo etino. Komin owar im kajitok, kom ro etta jibarbar ko air! Etke komij ellok jen wine eo Limo ekwojarjar im ej nan indreo im idrak jen dren eo enaj maat? Bahá’u’lláh

• 63 - O KOM ARMIJ IN LAL! Komin jela bwe mol juon joren lablab komij jab loe ej lor kom, im menin kaje ko rellab rej kottar kom. Jab lomnak bwe komman ko renana ami emoj jerilok jen iman Meja. Kin aibuijuij eo Ao! Aolepen komman ko ami emoj an pen eo Ao jei ion tablet in dreka-chrysolite. Bahá’u’lláh

• 64 - O KOM RO DRI JIBED ARMIJ ION LAL! En bwijrak beimi jen jerbal in kakure, emoj Ao jek Ibba make bwe Ijamin jolok bwid an ro rej jab jejjot im jimwe air jerbal. Enin ej Bujen eo Ao ejamin oktak im emoj Ao keean kake im likit ilo tablet eo im kabin kin seal eo Ao. Bahá’u’lláh

• 65 - O DRI JUMAE! Ao lojokmen im kemmanwa ekoman bwe komin beran ilo nana, im Ao bed im intan im jab elwaj ekoman bwe komin jerwan im jab mijak, jonan komij wonmanlok wot kin jerbal ko rekakjekek im tar jen jonan an mour in kaniek, ko im rej tel nan ial in jorren im kakure. Ta komij lomnak Ijaronron im jab jela kaki ke? Bahá’u’lláh

• 66 - O DRI ITO-ITAK IKOTAN LAL KO! Iar eik loom bwe kwon kwalok kin Io, inem kwon jab kattone kin men wan. Elane kijeek in konan im mour in mom renaj jelmae yuk, kwon kememej wot bwid ko am make im jab ko an menin komanman ko Ao, einwot ke kajojo iami elablok an jela kin e make jen an jela kin ro jet. Bahá’u’lláh

• 67 - O RO NEJIN MOUR IN ANTON! Komin jela bwe mol, ilo ien eo meram in jorantak enaj tak iturin lan eo ekwojarjar indreo, jerbal ko retino an satan im rej komman ilo marok jilonlon renaj walok im alikar iman mejen aolep armij in lal. Bahá’u’lláh

• 68 - O MAR WAAN EO EJ JEBAR TOK JEN BINAL! Etke kwojela bwe pa ko peim retton ren jab jibwe mokta nuknuk eo am im etke kwojela bwe buruom etton kin konan im mom waan ko ak kwoj bukot wot bwe kwon konono Ibba im konan drelon jikin eo Ao eutiej im kwojarjar? Elukun lab wot em lab am etollok jen konan in an buruom. Bahá’u’lláh

• 69 - O AJIRI RO NEJIN ADAM! Naan ko rekwojarjar im weppen im jerbal ko rewanik rej walinlok nan ijo eutiej im aibuijuij ilan. Kate kom bwe jerbal ko ami ren erreo jen binal in konan, im jen mour in ettao bwe ren maron tobar im drelone melan eo aibuijuij ilan; bwe ejjab etto, dri etale jerbal ko an armij naj, iman mejen Eo jej kabun nan E, jamin bok ijellokin wot mwil ko rewanik im jerbal ko reweppen. Enin ej iju ran in maletlet im menin ittino eo jen lan eo emoj an romak iturin lan in Ankilan. En jeramon ro rej oktak lok nane. Bahá’u’lláh

• 70 - O NEJIN RO REJ YOKWE MOUR IN LAL IN! Mour eo ilo lal in emman, botab elane kwonaj tobrak lok ijen, eaibuijuij lok mour eo ilo lal eo ejelok jemlokin, ne kwonaj ilok jen mour in; kwonaj lukkun lanlin im monono ilo am naj idrak dren eo etonal ilo cup eo ba ko bein Jodrikdrik eo jen lan ej lewoj. Elane kwonaj tobar jonan in, kwonaj anemkoj jen menin jorren im mij, jen entan im jerawiwi. Bahá’u’lláh

• 71 - O RO JERA! Komin kememej bujen eo kom ar kommane Ibba ion Tol Paran, eo ej bed iloan melan eo ekwojarjar ilo Zaman. Emoj Ao bok bwe en dri kamol dri kwojarjar ro ilan im ro rej jokwe ilo jikin kwelok eo ej nan indreo, ak kio ejelok en Na ij lo an mol nan bujen in. Ilo mol, utiej buru im jumae emoj air jeerilok jen buru ko, ilo juon jonan eo ejelok malkan ej bed. Bwe jekdron ne Iar jela menin, Iar kottar wot im jab kwalok. Bahá’u’lláh

• 72 - O AO DRI JERBAL! Kwoj einwot juon jajje eo emoj eiki ilo an bin im ekkan, im nojak na iloan men eo nien im aurok im ettino jen jelalokjen an dri kapeel an jerbal in pa. Kin menin driwoj tok jen ijo kwoj nojak ie, eo ej mour in konan im mom, bwe aurok eo am en maron romak lok im alikar nan aolepen lal. Bahá’u’lláh

• 73 - O JERA! Kwoj iju-ran in lan eo Ao ekwojarjar, jab kotloke bwe men ko retton ilo mour in ren binej yuk jen am romak. Kwon kekel im jolok ronol in kibilia, bwe kwon maron waloktok jen likin koro ko ilo am romak lok im kainoknoke aolep men otemjij kin balin mour. Bahá’u’lláh

• 74 - O AJIRI IN UTIEJ BURU IM KABBWIL! Kin juon utiej eo emokaj im idrin an jako, emoj ami jolok bed eo Ao ejelok jemlokin im kebelbele kom kin uj wan an mour in, im jejjej kake. Kin aibuijuij eo Ao! Inaj kobaik aolep iumin juon wot color in binal im jeerlok aolep color ko jet ijellokin wot ro rej kelet color eo Ao, eo erreo jen aolep color. Bahá’u’lláh

• 75 - O AJIRI IN JOL! Jab yokwe utiej im mour ko an lalin im jab monono kaki. Komij einwot juon bao eo ejajelokjen im ej bed kin kejatdrikdrik im al ion ran wijki eo; mae juon ien eidrin, Mij ebunti im jolok na ion binal, im ainikien, jokjokin im unokan aolepier em jako, likit ejelok juon malkan. Kin menin komin ekkol, O kom ro dri kamokoko an konan im mom. Bahá’u’lláh

• 76 - O NEJIN DRI JELKA KORA! Kakabiloklok ear iwoj mokta ilo naan, botab kio ej iwoj kin komman. Kajojo armij ej aikuij kwalok tok jerbal ko rerreo im kwojarjar, kinke naan ej mwein aolep armij, ak jerbal rot in ej an ro wot Jitenburuom. Komin kate kom kin aolepen buruomi im aolepen ami bwe jerbal ko ami ren kojenelok kom. Eindrein Kemij kakabilokloke kom kin tablet in ekwojarjar im romak. Bahá’u’lláh

• 77 - O NEJIN JIMWE! Ilo lukon bon, aibuijuij eo An ej bed non indreo emoj an jeblak lok jen jikin eo eutiej eaurok im erreo nan Sadratu’l-Muntahá, im Ej jan im liejlol im dri kwojarjar ro im ro jet rej jokwe ilo lan rej limo elap kin An buromij im liejlol. Kin menin ear walok juon kajitok, ta unin buromij im liejlol? E ar uak: Ekkar nan kabbe eo, Iar kottar ilo kojatdrikdrik ion tol in mol im tomak, ak Iar jab nemak nan jidrik melu in mol im erreo jen ro rej jokwe im amnak ion lal. Innem eitok kir eo bwe in bar jeblak, im Ij reilok im lo jet bao-mule kwojarjar rej bed im entan ikotan akkin pein kiru ko ion lal. Im elkin, Dri jilok- kora eo jen lan Ej mokaj im driwoj im walok tok jen ijo Jikin eromak lok, im Ear kajitok won ir, im ar walok etan aolep ijellokin wot juon. Im ke Ear bar kajitok, jeje eo kein kajuon ear walok ilo ainikien, im ilo ien eo, ro rej jokwe ilo moko imwier ilan rar iruj im jede tok jen ijoko jikier reaibuijuij. Im ke rar kojella kin jeje eo kein karuo, rar aolep bedro ion bidij-in-binal. Ilo ien eo rar ron juon aniken ej itok jen loan ijo ekwojarjar (shrine): “Bojrak im jab raktok.” Emol emoj Amw loe men eo rar komane im rej kio komane wot. Bahá’u’lláh

• 78 - O NEJIN DRI JELKA KORA! Idrak jen loon tiriamo eo ej tor tok jen ijoko retino ilan, im kwon reilok im kalimjoke tor tok in naan ko jen lan rej kwalok romak lok in iju ran in meletlet. Katok inen meletlet ko Ao jen lan ilo bwirej eo erreo ilo buru, im utrikriki kin dren in mol, bwe ut-hyacinths in jelalokjen im meletlet ren maron edrok im walok im emorur im maroro ilo jikin eo ekwojarjar ilo buru. Bahá’u’lláh

• 79 - O NEJIN KONAN! Ewi toon am naj ekkeke ilo melan ko an konan? Emoj Ao lewoj ba ko beim, bwe kwon maron kelok nan melan ko rettino im kwojarjar im jab nan jikin mour in satan. Iar, bareinwot, lewoj kum(comb) eo bwe kwon kumi Bora kake im jab kein am mwijit Buruo. Bahá’u’lláh

• 80 - O DRI JELKA! Komij wijki ko ilo jikin kallib eo Ao; komin kwalok tok leen ko reman im kabilonlon, bwe kom im ro jet ren maron jeraman jeni. Kin menin edro eo ebed ion kajojo bwe ren jerbale menin kapeel an pa im jerbal in meletlet ko jet, bwe ilo men kein ebed menin jeraman ko retino, O kom armij in jelalokjen! Bwe kin tokjen ko air ej walok wot ilo ad jerbali, im jouij an Anij enaj kabwe aikuij ko ami. Wijki ko rejab kalle rej im rekkar nan kijeek. Bahá’u’lláh

• 81 - O DRI JELKA! Ro dri jowan ej ro im rejab kwalok le ko leier ion lal. Armij rot in emoj watok ir bwe dri mij, aet, emman lok ro dri mij iman mejen Anij jen ro dri jowan im armij ro ejelok tokjeier. Bahá’u’lláh

• 82 - O DRI JELKA! Armij ro reman tata ej ro rej bukot air mour ilo air jerbal im niknik im bok air jeramon nan ir im ro nukier kin air yokwe Anij, Eo ej Iroij in aolep lal. Bahá’u’lláh

E Aibuijuij ion Aibuijuij otemjij

Enin ej men eo emoj an wonlaltak jen ailin in Aibuijuij, konono kin loon kajur im maron, eo emoj kar kwalok nan Dri kannan ro mokta. Emoj Amw bok melele ko remwilal jene im kanuknuk kin balin ekadru, einwot juon menin lelok nan ro dri wenik, bwe ren maron jutak bin ilo Bujen eo an Anij, maron mour ekkar nan Ankilan, im ilo ailin eo an Jitob ren bok dreka aurok an mour in ailin in Lan.

• 1 - O NEJIN JITOB! Kokabiliklik eo Ao moktata ej enin: Bok juon buru eo erreo, ejouij im romaklok, bwe buruom ej juon kajur eo jen etto, eo eban jako a ej bed non indreo. Bahá’u’lláh

• 2 - O NEJIN JITOB! Men eo eaurok tata iman Meja ej Jimwe; jab oktak lok jen e elane kwoj aikuiji Io, im jab kejekdron e bwe In maron in liki yuk. Bwe kin tokjen eo an enin bwe kwoj aikuij loe kin mejam make im jab kin mejen ro jet, im jela kin jelalokjen eo am make im jab kin jelalokjen eo an ro iturum. Likiti menin ilo buruom; elukun ekkar bwe kwon eindrein. Emol jimwe ej menin lewoj eo Ao non kwe im kokalle in yokwe im jouij eo Ao. Kwoj aikuij in likit iman mejam. Bahá’u’lláh

• 3 - O NEJIN ARMIJ! Nojak ilo bed eo Ao jen jinoin, eo ejelok jinoin, im ilo mour eo Ao jen etto, enin bwe Iar jela kin yokwe eo Ao non yuk; kin menin Iar komane yuk, im likit nememe eo Ao iom im kwalok nan kwe aibuijuj eo Ao. Bahá’u’lláh

• 4 - O NEJIN ARMIJ! Iar yokwe komanman eo am, im enin ej unin ao kar komanman yuk. Kin menin, kwoj aikuij yokwe Io, bwe In maron likit et eo etam im likit ilo jitob eo am jitob in mour eo. Bahá’u’lláh

• 5 - O NEJIN MOUR! Yokwe Io, bwe in maron yokwe yuk. Elane kwoj jab yokwe Io, inem yokwe eo Ao ejamin maron tobrak waj ibam. Jela menin, O dri jerbal. Bahá’u’lláh

• 6 - O NEJIN MOUR! Peretaij eo am ej yokwe eo Ao; ej jikim ilan; ilo am koba tok Ibba. Drelon tok im jab rumij. Enin ej men eo emoj keboj non kwe ilo ailin eo Amw ilan im ijo Jikim eutiejtata. Bahá’u’lláh

• 7 - O NEJIN ARMIJ! Elane kwoj yokwe Io, innem kwon ellok jen yuk make; im elane kwoj bukot ainemon eo Ao, inem jab lomnak kin ainemon eo am make; bwe kwon maron mij ilo Na im In maron mour ibam non indreo. Bahá’u’lláh

• 8 - O NEJIN JITOB! Enaj ejelok ainemon non yuk ak ilo wot am naj ellok jen yuk make im oktak tok non Io; bwe ejimwe im jejet bwe kwon aibuijuij ilo Eta, im jab kin etam make; im likit am kejatdikdik ilo Na, im jab ibbam make, bwe konan eo Ao in bwe kwon yokwe Io im en ejellok bar juon Ijelloku. Bahá’u’lláh

• 9 - O NEJIN MOUR! Yokwe eo Ao ej Ao jikin likebijnak; eo enaj drelone e enaj mour im jokane, im eo enaj oktak lok jen e, emol enaj jebwebwe im jako. Bahá’u’lláh

• 10 - O NEJIN KONONO! Kwoj Ao jikin likebijnak; drelon tok bwe kwon maron bed ilo jokane. Yokwe eo Ao ej ilo kwe, kwon jela menin, bwe kwon maron lo Io iturum. Bahá’u’lláh

• 11 - O NEJIN MOUR! Kwoj Ao lamp im Ao meram ej ilo kwe. Kwon bok am romak jene im jab bar bukot juon Ijelloku. Iar komane yuk bwe kwon mweie im lutok iom kejramon ko Ao. Bahá’u’lláh

• 12 - O NEJIN MOUR! Kin pa ko pein kajur Iar kommane yuk im kin addi ko addin maron Iar komanman yuk; im ilo kwe Iar likit unjen meram eo Ao. Eaikuij bo buruom kake im jab bar bukot juon men ijellokin, bwe kinke jerbal eo Ao eweppen, im kakien eo Ao ejamin oktak. Jab kajitikini ak bere bareinwot. Bahá’u’lláh

• 13 - O NEJIN JITOB! Iar komanman yuk ilo mweie, ta unin am boklal tak yuk non jeramol? Iar komane yuk ilo utiej, im ta unin am kottaik yuk make? Jen unjen jelalokjen Iar lewoj non yuk mour, im ta unin am bukot jelalokjen jen jabrewot Ijelloku? Jen bwirij in yokwe Iar eiki yuk, etke kwoj boup iben bar juon? Kalimjek yuk make, bwe kwon maron lo Io Ij jutak ilo kwe, kin maron, kin kajur im juon eo ej mour kin e make. Bahá’u’lláh

• 14 - O NEJIN ARMIJ! Kwe ej Ao maron im maron eo Ao ejamin jako, kin menin kwoj mijak bwe kwonaj jako ke? Kwoj Ao meram im meram eo Ao ejamin kun, im ta unin am mijak elane enaj kun? Kwoj Ao aibuijuij im aibuijuij eo Ao ejamin jako; kwoj Ao nuknuk im nuknuk eo Ao ejamin mor. Kin menin kwoj aikuij mour ilo yokwe eo am non Io, bwe kwon maron lo Io ilo ailin in aibuijuij eo. Bahá’u’lláh

• 15 - O NEJIN KONONO! Ukot tok mejam nan Meja im ellok jen jabrewot men otemjej ak Na wot; kinke utiej eo Ao ejelok jemlokin im ailin eo Ao ejamin jako. Elane kwoj bukot bar juon Ijelloku, aet, mol kwonaj etale lan im lal nan indreo, ak kwojamin loe men eo kwoj bukote. Bahá’u’lláh

• 16 - O NEJIN MERAM! Meloklok jabrewot ak Na wot im koba tok ilo jitob eo Ao. Enin ej aurok in kakien eo Ao, kin menin oktak tok non e. Bahá’u’lláh

• 17 - O NEJIN ARMIJ! En bo buruom kin Io im jab bar bukot juon dri jiban Ijelloku. Bwe ejelok bar juon enaj kabwe am akikuij Ijelloku. Bahá’u’lláh

• 18 - O NEJIN JITOB! Jab kajitok Ibba men ko Kemij jab konan non kwe, ak en bo buruom kin men ko emoj Amw kelet non yuk, bwe enin ej men eo enaj kejramon yuk, elane menin enaj bo buruom kake. Bahá’u’lláh

• 19 - O NEJIN LOLOKJEN EO EKABILONLON! Iar uk waj non yuk menwan jitob eo Ao, bwe kwon maron juon Ao dri yokwe. Ta unin am ellok jen Io im bar bukot juon am dri yokwe Ijelloku? Bahá’u’lláh

• 20 - O NEJIN JITOB! Maron eo Ao iom elab, ebin melokloke. Jouij eo Ao non kwe elab wot, eban nojak. Yokwe eo Ao ej jokwe ilo kwe, eban benjak. Meram eo Ao ej romak ilo kwe, eban tinar. Bahá’u’lláh

• 21 - O NEJIN ARMIJ! Ion wijki in aibuijuij eo eromak emoj Ao likit ion leen ko reno tata non kwe, inem etke kwoj oktak lok im bo buruom kin men eo ejab lukun emon? Kin menin kwon jeblak tok nan men eo emon lok nan yuk ilo ailin eo eutiej. Bahá’u’lláh

• 22 - O NEJIN JITOB! Ilo utiej Iar komanman yuk, ak emoj am kottaik yuk make. Kin menin kwon boklintak yuk non unin komaman eo am. Bahá’u’lláh

• 23 - O NEJIN UTIEJ! Ij kir yuk non mour indreo, ak etke kwoj jibadrek wot men ko renaj jako. Ta eo ekoman bwe kwon oktaklok jen konan eo Amw im jibadrek konan eo am make? Bahá’u’lláh

• 24 - O NEJIN ARMIJ! Jab ellalok ion maron ko am, ak kelet men ko im rejab ekkar non kwe. Kwon kottaik yuk iman mejen am Anij, Eo ej Iroij in maron im kajur. Bahá’u’lláh

• 25 - O NEJIN JITOB! Kwon jab kautiej yuk make ion eo dri jeramol, bwe Ij tel e ilo ial eo an im likit yuk make ilo ial in jerata im jerawiwi im kojbwebweik yuk indreo. Bahá’u’lláh

• 26 - O NEJIN MOUR! Ekijkan am maron meloklok bwir ko am make im koman bwe kwon boup kin bwir ko an ro jet? Eo ej komane menin enaj lia jen Io. Bahá’u’lláh

• 27 - O NEJIN ARMIJ! Jab menonoik jerawiwi ko an ro jet elane kwe make kwoj juon dri jerawiwi. Elane kwonaj ellalok jen kakien in, kwonaj lia, im Inaj kamol menin. Bahá’u’lláh

• 28 - O NEJIN JITOB! Kwon jela bwe mol: Eo ej jiron armij bwe ren jimwe im e make dri bwir im jerawiwi e ejab jen Io, mene e make ej bok et eo Eta. Bahá’u’lláh

• 29 - O NEJIN MOUR! Jab kwalok non bar juon armij kin ta eo im kwoj jab maron komane non yuk make, im jab konono kin juon men eo im kwar jab komane. Menin ej kakien eo Ao non yuk, kwoj aikuij lore. Bahá’u’lláh

• 30 - O NEJIN ARMIJ! Jab kajejtokjen Ao dri jerbal ilo an kajitok jabrewot jen kwe, kinke mejen ej Meja; kwon eliklik kin menin iman Meja. Bahá’u’lláh

• 31 - O NEJIN ARMIJ! Kwon etale leen jerbal ko am ilo ran otemjij bwe naj kajitikini yuk kaki; kinke mij edrin eo ejelok kojella kake, enaj iwoj wot non yuk im ilo ien eo naj ekajete tokjen jerbal ko am. Bahá’u’lláh

• 32 - O NEJIN EO EUTIEJ! Iar komane mij bwe en men eo ej bokwaj monono non yuk. Kin menin etke kwoj buromij? Iar komane meram bwe en bunleplep iom kin romak eo an eaibuijuij. Etke kwoj binej yuk make jene? Bahá’u’lláh

• 33 - O NEJIN JITOB! Kin nan in monono ko an meram, Ij ba: kwon lanlin! Non loan jikin in ekwojarjar Ij kir tok yuk none; bwe kwon jokwe im mour ilo aineman non indreo. Bahá’u’lláh

• 34 - O NEJIN JITOB! Jitob in kwojarjar eo ej bokwaj non yuk naan in kamonono ko kin koba ibben dron; kin menin etke kwoj buromij? Jitob in kajur eo ej bareinwot kabin yuk ilo katak eo An; im etke kwoj binej yuk make jene? Meram eo ej itok jen turin Mejen ej tel yuk; im ekijkan am maron jebwebwe? Bahá’u’lláh

• 35 - O NEJIN ARMIJ! Am buromij wot ej ilo am toolok jen Kim. Am monono wot ej ilo am ebak im jeblak tok non Kim. Bahá’u’lláh

• 36 - O NEJIN ARMIJ! Kwon lanlin ilo monono an buruom, bwe en ekkar am maron ion Io im kwalok tok aibuijuij eo Ao. Bahá’u’lláh

• 37 - O NEJIN ARMIJ! Kwon jab utik jen yuk nuknuk eo Ao eaibuijuij, im jab likjab jen kij eo am eo ej lutok tok jen dren in jeramon eo ekabwilonlon, bwe elane eindrein inem kwonaj maru non indreo. Bahá’u’lláh

• 38 - O NEJIN MOUR! Kwon mour kin kien ko Ao bwe ej yokwe eo am non Io im karmejete yuk jen konan ko am elane kwoj bukot monono eo Ao. Bahá’u’lláh

• 39 - O NEJIN ARMIJ! Jab kejekdron kien ko Ao elane kwoj yokwe aibuijuij eo Ao, im jab meloklok kokabileklek ko Ao elane kwoj bok monono eo Ao. Bahá’u’lláh

• 40 - O NEJIN ARMIJ! Ne kwar ettor im dribuki belak in mejetoto ilikin lan, kwojamin bok kakije mae ien kwonaj bokake kien ko Amw im kottaik yuk make iman Mejam. Bahá’u’lláh

• 41 - O NEJIN ARMIJ! Kolaplok naan eo Ao bwe in maron kwalok non yuk itino ko kin utiej eo Ao im kemram yuk kin meram eo non indreo. Bahá’u’lláh

• 42 - O NEJIN ARMIJ! Kottaik yuk make iman Meja bwe In maron jouij im lowaj yuk. Jutak lontak non am anjo kin naan eo Ao, bwe ilo am bed ion lalin kio kwon maron bok anjo eo. Bahá’u’lláh

• 43 - O NEJIN MOUR! Kwon ba kake Io ilo lalin Ao, bwe ilo lan eo Ao In maron kememej yuk, im naj koman bwe mej ko Meja im ko mejam ren kainemon dron. Bahá’u’lláh

• 44 - O NEJIN TRON! Ronjake eo am ej ronlokjen eo Ao, en eindrein wot am ronjake. Lolokjen eo am ej lolokjen eo Ao, en eindrein wot am lolokjen kake, bwe ilo jitob eo am etino tata kwon maron kamol kin ekwojarjar eo Ao eutiej, im ilo Na Make In maron kamol kin juon bed eo eutiej tata non yuk. Bahá’u’lláh

• 45 - O NEJIN MOUR! Kwon bukot bwe kwon mij ilo ial eo Ao, en bo buruom kin ainemon eo Ao im kamolol kin ta eo emoj Ao kelete non yuk, bwe kwon maron kakije Ibba iumin kejbarok jen ijo eutiej ilikin lokatok in aibuijuij eo. Bahá’u’lláh

• 46 - O NEJIN ARMIJ! Kwon etale mok im kolmenlokjen kake menin. Ej konan eo am in ke bwe kwon mij ion kiniem, ak kotor lok botoktokim ion binal, im juon eo ej mij ilo ial eo Ao, im kin menin naj juon eo ej dri kalikar kien im dri kwalok meram eo Ao ilo paradise eo eutiej tata? En jejet am etale menin, O dri jerbal! Bahá’u’lláh

• 47 - O NEJIN ARMIJ! Kin aibuijuij eo Ao! Ilo am birare wot jidrik kolan boram kin botoktokim ej juon men eo elablok iman Meja jen komanman eo an lan im lal im meram in lal kein ruo. Kin menin, kotobar non am bok wewen in, O dri jerbal! Bahá’u’lláh

• 48 - O NEJIN ARMIJ! Non kajojo men otemjej ewor air kokalle. Kokallen yokwe ej kijenmij iumin kakien eo Ao im entan iumin melejon ko Ao. Bahá’u’lláh

• 49 - O NEJIN ARMIJ! Dri yokwe eo emol ekonan bwe en ber iumin entan einwot an juon rijumae bukot jolok bwir im juon dri jerawiwi bukot tiriamo. Bahá’u’lláh

• 50 - O NEJIN ARMIJ! Elane jorren enaj bunit yuk ilo ial eo ejab jen Ankilao, enaj kijkan am maron etetal ilo ial ko an ro im rej bo buruier kin air monono ilo Na? Elane menin melejon ko renaj kakure yuk ilo am jab kijoror in iion Io, ekijkan am naj maron in bok meram in yokwe eo am kin aibuijuij eo Ao? Bahá’u’lláh

• 51 - O NEJIN ARMIJ! Ao jorren im entan ej Ao jeramon, ilo kalimijek jen tulik ej kijeek im menin jumae, ak jen tuloa ej meram im tiriamo. Mokaj tok non e bwe kwon maron erom juon meram eo ejelok jemlokin im juon jitob eo enaj mour indreo. Enin ej kakien eo Ao non yuk, kwoj aikuij bokake. Bahá’u’lláh

• 52 - O NEJIN ARMIJ! Elane jeramon enaj bun iom, kwon jab monono, im elane jerata im jool naj ioon yuk, kwon jab buromoj, bwe aolep men kein ruo renaj jemlok im jako. Bahá’u’lláh

• 53 - O NEJIN MOUR! Elane kwonaj ion mour in jeramol, kwon jab buromij; bwe ejab etto im Iroij in mweie enaj lo waj yuk. Kwon jab mijak mour in jerata im jool, bwe juon ien mour in jeramon im monono naj iwoj non yuk. Bahá’u’lláh

• 54 - O NEJIN MOUR! Elane kwonaj likit buruom ilo jikin eo ej ber non indreo, im ilo mour eo jen etto ejelok jemlokin, kwon ellok jen utiej ko an mour in, ko im emokaj air jako. Bahá’u’lláh

• 55 - O NEJIN MOUR! Kwon jab boub kin mour in lalin, bwe kin kijeek Kemij melejon dreka-gold, im kin dreak-gold eo Kemij melejon e dri jerbal ro Amw. Bahá’u’lláh

• 56 - O NEJIN ARMIJ! Kwo-konan dreka-gold ak I konan bwe kwon anemkoj jene. Kwoj lemnak bwe kwonaj mweie kake, ak Ij kile bwe mweie eo am ej ilo am erreo im kwojarjar jene. Kin mour eo Ao! Enin ej jelalokjen eo Ao, ak kwoj lomnak wan bajjok; inem ewi wewen an konan eo Ao im eo am erra ibben dron? Bahá’u’lláh

• 57 - O NEJIN ARMIJ! Kejramon dri jermol ro Ao kin mweie eo Ao, bwe ilo lan kwon maron bok jene menin jeramon ko rekabwilonlon im bareinwot menin aurok ko reaibuijbuij rejamin jako. Bwe kin mour eo Ao! Nan am ajelok jitob eo am ej juon men eo eaibuijuj lok elane kwonaj kar maron loe kin mej eo Meja. Bahá’u’lláh

• 58 - O NEJIN ARMIJ! Tempol in mour eo ej tron eo Ao; kareoiki jen aolep men otemjij, bwe ijin In maron bed im amnak ie. Bahá’u’lláh

• 59 - O NEJIN MOUR! Buruom ej ijo Jiku; kareoik nan Ao iwoj im joke ie. Jitob eo am ej ijo jikin kalikar Io; karreoiki nan Ao maron alikar. Bahá’u’lláh

• 60 - O NEJIN ARMIJ! Likit beim ion Ubo, bwe In maron jutak lontak iom, kin romak im aibuijuij. Bahá’u’lláh

• 61 - O NEJIN ARMIJ! Wanlintak non lan eo Ao, bwe kwon maron bok am monono ilo am koba tok, im jen cup in aibuijuij eo eban jako, ilim wine in ejelok einwot. Bahá’u’lláh

• 62 - O NEJIN ARMIJ! Elon wot ran remotlok ak elab wot am boub kin lomnak waan im anton ko am make. Ewi wot toon am naj bed im kiki ion kiniom? Ruj tok jen am kiki, bwe Al emoj an tak iolab, im emaron romak iom kin meram in aibuijuij. Bahá’u’lláh

• 63 - O NEJIN ARMIJ! Meram eo emoj an romak tok iiom jen turin lan in Tol eo ekwojarjar im jitob in kemram emoj an nemak Sinai in buruom. Kin menin, kwoj aikuij kanemkoj yuk make jen lemnak waan im anton ko am im drelon tok melan ijo Jiku, bwe kwon maron bed ilo mour eo ejellok jemlokin non am maron iion Io. Inem mij eban anjo iom im bareinwot mour in mojno im jorren. Bahá’u’lláh

• 64 - O NEJIN ARMIJ! Bed eo Ao ejellok jemlokin ej menin komanman eo Ao, Iar komane non yuk. Kommane bwe en nuknuk in tempol eo am. Juon wot eo Ao ej eltan Beiu; Iar kommane non yuk; kwon kanuknuk yuk make kake, bwe kwon maron bed indreo im kwalok kin bed eo Ao ejellok jemlokin. Bahá’u’lláh

• 65 - O NEJIN ARMIJ! Utiej in aibuijuij eo Ao ej menin lewoj eo Ao non yuk, im maron eo Ao ej menin kwalok tiriamo eo Ao non kwe. Men eo ekkar im ej jen Ankilao ejellok juon enaj melele kake ak maron kemleleiki. Emol, menin emoj ao likiti ilo jikin kejbarok ko rettino im ilo menin aurok ko an kakien eo Ao, einwot juon kokolan yokwe im joij eo Ao non dri jerbal ro Ao im menin Ao tiriamo non armij ro Ao. Bahá’u’lláh

• 66 - O AJRI IN AILIN EO ETINO! Elon renaj kaban kom jen ami yokwe Io im elon jitobin armij renaj bobraik kom jen ami kwalok kin Io. Bwe kelmenlokjen an armij rej jab maron melele kin Io im buruier rej jab maron bok Io. Bahá’u’lláh

• 67 - O NEJIN WOLEO! Kin jitob eo Ao im kin joij eo Ao! Kin tiriamo eo Ao im kin woleo eo Ao! Aolep men otemjij emoj Ao kwalok nan yuk kin loon kajur, im emoj je nan kwe kin pen in maron, rar koman ekkar nan jonan am maron boki im melele kaki, im rej jab kwalok kin Jona im emon in Ainikio. Bahá’u’lláh

• 68 - O AJIRI RO NEJIN ARMIJ! Ta komwij jab jela unin Amw kar komanman kom aolep jen juon wot binal ke? Kinke en ejelok juon ej kautieje ion ro jet. Lemank im likit ilo buruomi ien otemjij wewen komanman eo ami. Einwot ke Kim ar komanman kom aolep jen juon wot binal ekkar im jejjot bwe komin einwot juon wot jitob, etetal kin juon wot ne, mona kin juon wot loni im bed im joke ilo juon wot ene, bwe jen ijo emilal tata ilo kom, kin jerbal im koman ko ami, ren kalikar kokkalen ami juon wot im ami ellok jen mour in lalin. Enin ej kakabiloklok eo Ao nan kom, O kom armij in meram! Bokake kakabiloklok in bwe komin maron bok leen wijki eo ekwojarjar jen wijki in mour eo eaibuijuij. Bahá’u’lláh

• 69 - O NEJIN JITOB! Kwoj menin aurok eo Ao, bwe ilo kwe emoj Ao kakkon dreka- pearl ko an menin ittino ko Ao im dreka aurok in jelalokjen eo Ao. Kejbaroki jen driwaimejet ro ilubiljin dri jerbal ro Ao, im jen ro dri jumae Anij ilubiljin armij ro Ao. Bahá’u’lláh

• 70 - O NEJIN EO EJ JUTAK KIN E MAKE ILO AILIN IN MAKE EO AN! Kwon jela, bwe emoj Ao jeerwaj iom aolep melu in kwojarjar ko, emoj Ao kalikar non yuk naan eo Ao, im kweppen non kwe jouij eo Ao, im emoj Ao kelet non kwe ta eo emoj Ao bareinwot kelet non Io make. Kin menin en bo buruom kin monono eo Ao im letok kamolol nan Io. Bahá’u’lláh

• 71 - O NEJIN ARMIJ! Je aolep men otemjij im emoj Amw kalikar non kwe kin inik in meram eo na ion tablet in jitob eo am. Elane menin ejab jen kajur eo am, innem kwon kojerbal inik eo eaurok ilo buruom, ak ne kwojab maron komane, innem kwon je kin inik eo ebiroro im emoj an lutok ilo ial eo Ao. Emol menin ej juon menin kamononoik Io elab jen aolep men otemjij, bwe meram eo an en maron bed non indreo. Bahá’u’lláh