Prayers & Meditations

Kalaallisut · Bahá'u'lláh

Add range: –

ULLOQ UNNUARLU ATAASIARLUGU TAANEQARTASSAAQ.
Kialuunniit kissaatigissappagu qinnut inna atuassallugu, nikuilli Guutimullu saalluni, taavalu nikorfavimminiitilluni talerpimmut saamimmullu qiviarli soorlulusooq Naalakkaminit nakkinnineq utaqqillugu, tassaasoq Naakkinninnerpaasoq, Misiginneqataasoq. Taavalu oqarli:

Illit-aa Tassaasutit aqqit tamarmik Naalagaat qilaallu Pinngortitsisuat! Suussutsivit ersinngitsup, Qutsinnersaasup Naalannangaartup Qaammalerneri aqqutigalugit torlorfígaakkit qinnutiga tassaaqqullugu Illit kusanassutsinnik assiaqutaasimasunut inneq nungusaasoq, qaamaanerlu Qanissutsivit Imarsuanut aqqutissiuisussaq.

Taavalu assani Guutimut - Taanna pilluaqquneqarli nersornangaarlunilu, qinulluni qullarligit - oqarlunilu:

Illit-aa silarsuup Erinigisaa, inuiaqatigiillu tamarmik Asasaat! Isigaarma Ilinnut saattunga, sumillu allamit Illiunngitsumit kaanngaqqasunga, Allunaasat najummatserfigigiga, taassumap aalaneratigut pinngortitaq tamarmi aalaterneqarsimavoq. Tassaavunga kiffat, Naalagaq-aa, kiffavillu ernera. Isiginnga Kissaatigisat Piumasallu suliarissallugu piareeqqallunga nikorfasunga, allamimmi kissaateqannginnama taamaallaat Nuannaarnerit. Ilungersorlunga qinnuigaakkit Naakkinninnerpit Imaatigut Saammaannerpillu Ulluata Ulloriaa aqqutigalugu, kiffat Piumasat Kissaatigisallu malillugu peqqullugu. Piumasat eqqartuinernit unnersiutigineqarnernillu tamanit qutsinnerpaasoq pillugu! Sunaluunniit Ilinnit saqqummersinneqarsimasoq tassaavoq uummatima kipisaffígisaa tarnimalu asasaa. Guuti-aa, Guutiga! Neriuutikka suliakkalu isiginagit Piumasat qilannik nunamillu tamanit ungusisimasoq taamaallaat isiguuk. Aqqit Sunik Tamanit Anginersaasoq pillugu, Illit-aa inuiaqatigiit tamarmik Naalagaat! Kissaatigisat kisiat kissaatigivara. Asasallu kisiat asallugu.

Taavalu seeqqummerli, qaanilu nunamut tutsilliuk, oqarlunilu:

Kialuunniit Illiungitsup nassuiaaneranit paasinnissinnaaneranillu qutsinnerungaarputit.

Taavalu nikuilluni oqarli:

Qinnutiga, Illit-aa Naalagara, imermik uumassutissalimmik puilasunngortiguk, tassuunakkut uumasinnaaqqullunga Naalagaaffippit ataneratut sivisutigisumik, Illillu Silarsuarpit arlaanniluunniit eqqartorsinnaaqqullutit.

Taavalu qinulluni assani qullarligit oqarlunilu:

Illit-aa, pillutit uummatit tarningillu Ilinnik avissaarsimanertik pillugu suujunnaarsimasut. Asanninnerpillu innera pillugu silarsuaq tamarmi ikuallalersimasoq! Ilungersorlunga qinnuigaakkit Atikkut, taanna aqqutigalugu pinngortitaq tamaat naalatsigilersimasat, Ilinniittut suulluunniit uannit tunuarsimateqqunagit, Illit-aa inunnut tamanut Naalagaasoq! Isigaat, Naalagara-aa, takornartaq manna angerlarsimaffímminut qutsingaartumut Naalannangaarsutsivit issiavissaarsuata qilaannguusaata ataani ittumut, Naakkinnissutsivillu oqartussaaffianut nukingertoq; unioqqutitsisorlu manna Isumakkeerinerpit Imaanik ujarlertoq; pinngortitarlu manna piitsoq Pisuussutsivit Qaamaneranut saattoq. Sukkulluunniit Piumasannik naalakkiinissamut oqartussaassuseq tigummivat. Nalunaajaatigaara sukkulluunniit Iliuutsitit tamarmik unnersiutigineqartussaasut, Peqqussutitillu maleruarneqassasut, Naalakkiinikkullu killeqanngittuaannassasutit.

Taavalu assani qullarligit Aqqillu Anginersaat (Alláh’u’Abhá) pingasoriarluni uterliuk. Taavalu sikili assani seeqquminut tutsillugit Guutip - Taanna pilluaqquneqarli unnersiutigineqarlunilu - saavani oqarlunilu:

Isigaat, Guutiga-aa, anersaara Ilinnik qinnuiginnikkumalluni kipisanermini Ilinnillu eqqaamannikkumalluni unnersiutiginnikkumallunilu ilungersornermini timiga tamakkerlugu qanoq killinneqangaarsimatigisoq; qanorlu ililluni Peqqussutsivit Oqaata Oqalunnerpit naalagaaffiani Ilisimassutsivillu Qilaani nalunaajaatigisaa nalunaajaatigigaa. Taamatut itsillunga, Naalagara-aa, allamik asasaqanngilanga taamaallaat Ilinniittoq sunaluunniit Ilinnut qinnutigissallugu, taamaalillugu piitsuussusera takutinniassagakku Tukkussutsit Pisuussutsillu unnersiutiginiassagakku, taamatullu sanngiissusera nalunaarutigissallugu Pissaanerit Nakuussutsillu ersersinniassagakku.

Taavalu nikuilluni assani marloriarlugit qinuutigaluni kivilligit oqarlunilu:
Allamik Illiunngitsumik Guuteqanngilaq, Ajugaqanngitsoq, sunit tamanit Tukkunerpaajusoq. Allamik Illiunngitsumik Guuteqanngilaq, aallaqqaataani naggataanilu Atortunngortitsisoq. Guuti-aa, Guutiga! Isumakkeerinerpit sapiissusermik tunisimavaanga, Naakkinnissutsivillu nakussatsissimavaanga, Qaaqqusinerpillu itertissimavaanga, Saammaannerpillu qummut kivissimavaanga Ilinnullu ingerlatillunga. Kinaassagaluaramami Qanissutsivit illoqarfiata isaariaata saavani sapiiserlunga nikorfassaguma, kiinaraluunniit Piumassutsivit qilaata qaamanerata qinngornerisa tungaanut saatsissagukku? Isigaat, Naalagara-aa, una pinngortitaq nallinnartoq Saammaannerpit matuanut kasuttortoq, tarnerlu manna qarsupittoq Tukkussutsivit assaanit inuunerup naassaanngitsup kuussuanik ujarlertoq. Naalakkiineq qaquguluunniit Ilinniittuarpoq, Illit-aa Tassaasutit aqqit tamarmik Naalagaat; uangalu pisussaaffigaara asiginnaaneq tunniutiinnarumanerlu, Illit-aa Qilaat Pinngortitsisuat!
Taavalu assani pingasoriarlugit kivilligit oqarlunilu:

Guuti sunit annerusunit tamanit anginersaavoq!

Taavalu seeqqumiarli qaanilu nunamut tutsilliuk oqarlunilu:

Ilinnut qanittuusut unnersiutiginninnerisa Qanissutsivit qilaanut qullarnissaannit Qutsinnerungaarputit, Ilinnulluunniit tunniusimasut uummataasa timmiaasa Isaaffippit kusanartup matuata eqqaanut pinissaannut. Nalunaajaatigaara piginnaassutsit aqqillu tamaasa qaangerlugit Illernartitaagavit. Allamik Illiunngitsumik Guuteqanngilaq, sunit tamanit Qutsinnerpaasoq, sunillu tamanit Naalannarnerpaasoq.

Taavalu ingilli oqarlunilu:

Pinngortitaasimasut tamarmik nalunaajaatigisimasaat nalunaajaatigaara, qutsissumillu Katersaarsuit Paradisimilu qutsinnerpaajusumi najugallit, taakkulu qulaanni Angissutsip Oqaa Killingiusaami qaammarinnerpaasumumiittoq, tassaasutit Guuti, allamillu Illiunngitsumik Guuteqanngitsoq, aammalu Taanna Saqqummersinneqarsimasoq, tassaasoq Paasissaalluanngitsoq Toqqortaq, assersuut Erlinnangaartoq, Taannalu aqqutigalugu naqinnerit P I L E R I T (Pilerit) katitinneqarsimapput qilerneqarsimallutillu. Nalunaajaatigaara, Tassaasoq Taanna, Aqqa Qutsinnerpaap Allaataanik nalunaarsorneqarsimasoq, aammalu Guutip Atuagaanni eqqartorneqarsimasoq, Tassaasoq qutsissup Issiavissaarsuata taassumalu ataaniittup nunap Naalagaa.

Taavalu nikuilluni oqarli:

Illit-aa pinngortitaanerup suulluunniit Naalagaa, ersitsunik ersinngitsunillu tamanik Piginnittoq, Qulliikka anersaaminikkalu malugaatit, kappialanikka, aliasunnera, uummatimalu nimaarnera tusaavatit. Pissaanerit pillugu! Unioqqutitsinimma Ilinnut qanillinissara akornusersimavaat; ajortuliammalu Illernassutsivit najugaanit tunuarsimatissimavaannga. Asanninnerpit, Naalagara-aa, pisuttorsarsimavaanga, Ilinnillu avissarsimanerup suujunnaarsissimavaanga, Ilinnillu ungasissuunerup piuneerutsissimavaanga. Torlulaffigaakkit maani inoqajuitsumi Tumivit eqqaanni, oqaatsillu makku atorlugit “Maaniippunga. Maaniippunga” soorlu Toqqakkavit killeqanngitsumik tamanna oqaatigiuarsimagaat, Saqqummersitavillu anersaartorneri aqqutigalugit Nalunaarutiginninnerpit Qaalernerata anorai sallaatsut pillugit, akuereqquvunga Kusanassusernik isiginnissinnaaqqullunga Atuakkavillu Peqqussutai tamaasa maleqqullugit.

Taavalu Aqqit Anginersaat pingasoriarluni uterliuk, seeqquminullu assani ilillugit sikili oqarlunilu:

Unnersiutigineqarit, Guutiga-aa, Ilinnik eqqaamanninnissannut unnersiutiginninnissannullu ikiorsimagamma, aammalu Taanna Ilisarnaativit Qaalernera uannut ilisaritissimagakku, Angissutsit pillugu pallorfiginnittunngortissimagamma, Nalissaqanngissutsivillu saavani maniguuttunngortissimagamma, Angissutsivillu Oqaanit oqaatigineqarsimasut ilisaritissimagakkit.

Taavalu nikuilli oqarlunilu:

Guuti-aa, Guutiga! Qitiga ajortimma artornartumit peqitinneqarsimavoq, soqutigisaqanngissutsimalu suujunnaarsissimavaanga. Qaqugukkulluunniit iliuusikka ajortut Illillu ajunngissutsit eqqarsaatigillualeraangakkit uummatiga ilunni aakkiartulersarpoq, aagalu taqqanni qalattutut ilersarluni. Kusanassutsit pillugu, Illit-aa silarsuup Erinigisaa! Kiinara Ilinnut saatsikkakku aappillerpunga, assakkalu kipisattut kanngusullutik Saammaannerpit Qilaata tungaanut siaarsimapput. Isigaat, Guutiga-aa, qanoq qullimma Ilinnik eqqaamanninnissara, Piginnaassutsinnilu qutsingaartunik unnersiutiginninnissara akornuseraat, Illit-aa Issiavissaarsuup qutsinnermiittup, taassumalu ataaniittup Nunap Naalagaa! Ilungersorlunga qinnuigaakkit Naalagaaffippit ilisarnaatai tupinnartortaalu pillugit, asasatit Tukkussutsit naapertorlugu peqqullugit, Illit-aa pinngortitat tamarmik Naalagaat, taakkumi Saammaanninnut naleqqulluarmata, Illit-aa ersitsut ersinngitsullu Naalagaat!

Taavalu Aqqit Anginersaat pingasoriarluni utertarliuk, qaanilu nunamut tutsillugu seeqqummerli, oqarlunilu:

Unnersiutigineqarit Guuterput-aa, uagutsinnut aallartitsisimagavit Ilinnut qanillisitsisussamik, ajunngitsunillu tamanik eqqaamasaratsigut Ilinnik aallartitanik Atuakkatit Allagaatitillu aqqutigalugit. Sernissortigut, taamatut qinnuigaatsigit, Naalagara-aa, sinnatuinnaat iluaqutaanngitsut isumapalaallu piunngitsut sakkutoorpassuinit. Illit, ilumut tassaavutit Pissaanilik, sunik tamanik Ilisimasaqartoq.

Taavalu niaqqi qullarliuk, ingillunilu oqarli:

Guutiga-aa, nalunaajaatigaara toqqakkavit nalunaajaatigisimasaat, akuersissutigalugulu Paradisip qutsinnerussaartup innuttaasa Issiavissaarsuarpillu eqqaani kaavissimasut akuersissutigisimasaat. Nunarsuup qilaallu Naalagaaffii Illit pigaatit, Illit-aa silarsuit Naalagaat!

DOR 33

*(Allagaq una Bahá’u’lláh-p Báb-illu ilerrisa eqqaanni atuarneqassaaq. Aamma Taakku eqqaaneqarfiini nalliuttorsiornartitsinermi akuttunngitsumik atorneqartassaaq.)

Unnersiutiginininneq Illit namminiunerpit ataqqinarsisitaangaartup pilerfia, illernassuserlu Illit Kusanassutsinnit akisugunnerpaamit qinngorsimasoq Ilinni illi, Illit-aa Angingaarsutsip Saqqummernera Soraajuitsullu Kunngia, tamanullu qilammiittunut nunamiittunullu Naalagaq! Nalunaajaatigaara, Ilikkut Guutip naalagaanerata Naalagaaffia, Guutillu ataqqinartorsuunera Angissusialu saqqummersinneqarsimammat, aammalu qinngorneq akisuguttoq qangarnisaangaartoq Ullut ulloriaannit pisoq qaamanerminnik qinngortut Illit inatsisivit allanngorneq ajortup qilaanit, Kusanassuserlu Takuneqanngitsoq pinngortitap killingusaata qulaanit qinngorsimasoq. Aammalu nalunaajaatigaara, Illit Allaativit aalariaallannerinnaatigut Peqqusat “Pilerit” aallartinneqarsimasoq, Guutillu isertugaa toqqortaq saqqummersinneqarsimalluni, pinngortitallu tamarmik uummassusilerneqarsimallutik Saqqummersitallu tamarmik aqqartinneqarsimallutik.

Aammattaaq nalunaajaatigaara, Illit kusanassutsikkut kusanassuseq Qinnuigisaasoq uleerneqarsimasoq, Illillu kiinnakkut Kajungerisap kiinaa qinngorsimasoq, Illillu oqaatsikkut ataatsikkut pinngortitat tamaasa akunnequsersorsimagitit, Ilinnullu tunniusimasut illernassutsivit inngiinut qullarsimagitit uppinngitsullu itinersuarmut itinerpaamut nakkartissimallugit.

Nalunaajarpara kina Ilinnik ilisarsisoq, Guutimik ilisarsisimammat, kinalu Illit qanissutsinnut pisimasoq Guutimut qanillisimasoq. Angivoq taamaammat pilluaqqussut Ilinnut Illillu nalunaaqquunnut uppersimasumut, Illillu naalagaaffinnut tunniussimasumut, Ilinnillu naapitsinermik ataqqinaaserneqarsimasumut, Illillu Piumasavit iluarinartuinik angusaqarsimasumut, IIinnillu kaavissimasumut Illillu issiavissaarsuarpit sioraani nikorfasimasumut. Eqqanaq kina Ilinnut ajortuliorsimasoq, Ilinnik upperumanngitsoq, Illillu nalunaaqqutinnik tunuartitsisimasoq, Illillu naalagaaffinnik tusarumasimanngitsoq, Ilinnullu akerliuniarsimasoq, Illillu kiinnavit saani anneruniarsimasoq, Illillu nalunaajaatinnik assortuisimasoq, Illillu inatsisinnik naalagaaninniillu qimaasimasoq aammalu uppinngitsutut naatsorsuussaasimasoq, taakkumi aqqi Illit naalakkiinerpit inuaanit Allakkanni Illernartumi allanneqarsimapput.

Taamaattumik uannut ingerlatikkit, Guutiga-aa Asasaralu, Illit nallittuinerpit Asanninnerpillu assaanit talerpillermit saammaannerpillu illernartup anersaarnera, uannit namminermit silarsuarmillu qimagutsinniassammannga Illit qanissutsivit Illillu najuinerpit inaannut. Illit Pissaaneqarputit, iluarisannik iliornissamut. Illit ilumoortumik tassaasimavutit sunik tamanik qulangiisoq. Guutip eqqaamaneqaataa Taassuma unnersiutaanera Guutillu illernassusia Taassumattaaq qinngorneri akisuguttut Ilinni illik, Illit-aa tassaasutit Taassuma Kusanassusia! Nalunaajaatigaara pinngortitap isaanit kinaluunniit Ilittulli iluaatsuliorfigisaasimanngitsoq. Illit inuunerpit ullui tamaasa anniaatinik kisissaanngitsunit atugaqarfigisimavatit. Ilaanni kalunnernik saviminernik qilersorneqarsimavutit, ulluni allani akeqqavit panaannit sioorasaarneqarputit. Taamaakkaluartorli, tamakku akimorlugit, inuit tamaasa peqquatit Taassumannga Ilinnut maligassaatinneqartut naalaqqullugit, Tamanik Ilisimasumit, Tamanik Nalornisaqanngitsumit.

Qanortoq anersaara pilliutaali Illit iluaatsuliorfigisaaninnut, tarnigalu anniaatinut Illit atukkannut akissaali. Guuti Ilikkut taakkunuunalu kiinaat Taattuit qaamarngata qinngornennit qaammarsagaasutigut aammalu Ilinnut asanninnermikkut imminnut peqqussutaasunik asiginnaasimanngitsutigut qinnuigaakkit saagoq Illit pinngortitavillu akornanniittoq peeqqullugu nunarsuarmilu maani takkuttussamilu ajunngitsunik pilersoqqullunga. Illit tassaavutit ilumoortumik Ajugaqanngitsoq, Naalannarsisitaanerpaaq, Tamanit Illernarnerusoq, Soraajuitsumik Isumakkeerfiginnittoq, Tamanit Misigittarnerpaaq.

Pilluaqqujuk Illit, Naalagaq Guutiga-aa, Orpik Lotusi Nunamiorpalunngitsoq, taassumalu pilutai, avalequtai, avalequteerai, timitaa anneq, timitai saneraanit naasut, taaguutitit pitsaanerpaat atuukkallartillugit, Illit ataqqinangaarsutsinni piginnaasatit soraassanngillat. Illersoruk saassussisup ajortup saalersuussineranit qunutitsisullu sakkutoorpassuinit. Illit ilumut tassaavutit Ajugaqanngitsoq, Pissaaneqarnerpaaq. Aammattaaq Pilluaqqukkit, Naalagaq Guutiga-aa, kiffatit angutit arnallu, Ilinnut anngussimasut. Ilumoortumik tassaavutit Tukkornerpaaq isoqanngitsumik saammaasoq. Guuteqanngilaq Allamik Illiunngitsumik, soraajuitsumik Isumakkeerfiginnittoq, Tukkornerpaaq.

PM 182

Ullut tamaasa oqaatigineqartartussaq, ullaakkut, ullup qeqqanut unnukkullu.

Qinujumasup assani errussavai, errotillunilu oqassaaq:

Assaga nakussatsiguk, Guutiga-aa, Illit Atuagaatinnik ima aalajaatsigisumik tigumminnequllugu, allaat silarsuup sakkutoorpassuinit naalagaaffigineqarsinnaajunnaarlugu. Taamaammat illersoruk imminut suminermilluunniit piginngisaminik sammisaqarsinnaajunnaarlugu. Illit ilumoortumik taannaavutit Tamanik Ajugaqanngitsoq, Tamanik Pissaaneqarnerpaaq.

Ermitsilluni oqassaaq:

Kiinara Ilinnut saatippara, Naalagaq-aa! Illit Kiinannit qaammarsaruk. Illersoruk Illiunngitsumut saanniaqqunagu.

Taava nikuissaaq, kiinnilu Qiblihmut (qinunermi sammivimmut, tassa Bahjímut Akkámiittumut) saatillugu oqassaaq:

Guutip nalunaajarpaa allamik Namminiunngitsumik Guuteqanngitsoq. Saqqummersitsinerup pinngortitsinerullu naalagaaffii taassuma pigai. Taassuma, ilumoortumik, Taanna saqqummersissimavaa, Saqqummersitap Ullaanngua, Sinaimi oqaluttoq, tassuunalu Killingusaaq qatsinnerpaaq qinngortaavoq, Orpillu Lotusi, taassuma ungataani iserfissamik allamik nassaassaqanngilaq, oqalussimavoq, taannalu aqqutigalugu suaarut nalunaarutigineqarpoq tamanut qilammiittunut nunamiittunullu: “Takusiuk, taanna Tamanik-Piginnittoq takkussimavoq.” Nuna qilallu, ataqqisaaneq naalagaassuserlu Guutip pigai, inunnut tamanut Naalagaq qutsissumilu, taassumalu ataani nunami Niaqorummik Piginnittoq.

Taamaalereeruni peqissaaq assani seeqquminut tutsillugit oqarlunilu:

Ataqqinarsisitaavutit Illit unnersiutiga qaangerlugu, uangalu sanikkut allap unnersiutiginninnera qaangerlugu, oqaluttuarinera oqaluttuarinninnerlu tamanik qilammiittunik nunamiittunillu qaangerlugu.

Taamaalereeruni nikuilluni assani isivissimallugit itummanilu kiinnami tungaanut qullarlugit oqassaaq:

Pakatsisinnagu, Guutiga-aa, qinusunik assaqarluni Illit nallittuissutsinnut saammaannerpillu annoraata mersornerinut najummatsertoq, Illit-aa, nalliginninnermik takutitsisuni Tassaavutit tamanit Nalliginninnerpaaq.

Taava ingissaaq oqarlunilu:

Ataasiussutsinnik Ilivitsuussutsinnillu nalunaajaavunga, Illillu Guutiuninnik, allamittaaq Guuteqanngitsoq taamaallaat Illit. Illit ilumoortumik Siunertat saqqummersissimavat, Angerutsit eqquutitissimallugu, Saammaannerpillu matuata mappernissaa tamaat ammarsimavat tamanut qilammi nunamilu najugaqartunut. Illit asasannut pilluaqqusigit eqqissinermillu tunisillutit, naalannarsisitsigit ataqqinarsisitsillutillu, taakkumi Ilinnut saannissaannut silarsuup allanngoraasiisa nalaatsornartuisalu akornusersimanngilaat, pigisatillu tamaasa tunniussimavaat neriuutigalugu Ilinniittoq angussallugu. Illit ilumoortumik tassaavutit Soraajuitsumik Isumakkeerfiginnittoq, Tukkornerpaaq.

*(Kinaluunniit versip taassuma takisuup oqaatiginissaa pinnagu kissaateqaruni oqaatsit uku oqaatigiumallugit: “Guutip nalunaajarpaa, allamik Namminiunngitsumik Guuteqanngitsoq, Ajornartorsiorfimmi Ikiorti, Imminut-Napatittoq” taava tamanna naammassaaq.

Aammattaaq taamatut naammassaaq issialluni oqaatsit uku oqaatigerusukkunigit: “Ataasiussutsinnik Ilivitsuussutsinnillu nalunaajaavunga, aammalu Illit Guutiusutit, allamittaaq Guuteqanngitsoq taamaallaat Illit.”)

PM 45

Ullut Tapiliussat, februarip 26-anniit martsip aallaqqaataanut, ullut taakku ilanngullugit, tassaassapput iisinnginniarnissamut ullut piareersarfissat, ullut, inororsaarfiullutillu ajunngitsuliorfiusut, tunissutinillu tunniussiffiit.

Guutiga, Innera Qaamaneralu! Ullut Illit Atuakkanni Ayyám-I-Há-mik taasimasatit aallartissimalerput, Illit-aa aqqit Kunngiat, iisinnginniarfillu Illit Allaativit akitsisitaangaartup Pinngortitavit naalagaaffianiittunut tamanut maleqqullugu peqqussutigisimasaa qanilliartorpoq. Qinnuigaakkit Naalagara-aa, ullut makku pillugit aammalu kikkut tamat piffissami tassani Illit peqqussutivit allunaasaanut najummatsersimasut Maleruaqqusavillu tigummivianik tigumminnittuinnarsimasut pillugit, tarningit tamaasa Illit ininnut innimingaariikkamut inissaqaqqullugit Kiinnavillu qaamanerata akisunnerata eqqaani issiavissaqaqqullugit.

Makku, Naalagara-aa, tassaapput Illit kiffatit isummat peqquserlukkajuttut suulluunniit Atuakkanni Peqqussutinnit tunutsissimanngisai. Siunertavit saavani sikisimapput, Atuakkallu tigusimavaat aalajangersimassusermik Ilinnit pisumik peqarlutik, Peqqusatillu tunaartarisimavaat Ilinnillu aqqartinneqarsimasut malinniarlugit akuersaarsimapput.

Takuat, Naalagara-aa, qanoq Illit Allagaatinni saqqummiussimasatit ilisaralugillu nassuerutigisimagaat. Immisikkit, Naalagara-aa, Saammaannerpit Assaanit Naassaanngissutsivit imiutaannik. Taamaammat allaassutikkit akissamik Illit qanissutsivit imaanut imminut aqqartissimasup, Ilinnillu naapitsinerup viinnianik toqqakkamut anngussimasup, akissaanik.

Qinnuigaakkit, Illit-aa Kunngit Kunngiat naqisimaneqartunillu Nalliginnittutit, nunarsuup massumap tullissaatalu pitsaasortaanik taakku tuneqqullugit. Aammattaaq allaassutikkit Pinngortitavit suulluunniit siornatigut siumorsimanngisaannik, Ilinnillu qanittuinnarlutik kaajallaasimasunut ilaaqqukkit, Nunarsuannilu tamani suugaluartuni Issiavissaarsuarpit eqqaaniittuinnarsimasuulit.

Ilumoortumik Tassaavutit Ajugaqanngitsoq, Tamanik-Ilisimannittoq, Tamanik-Paasisimannittoq.

PM 126

Illit-aa Guuti asseqanngitsutit! Illit-aa Naalagaaffiup Naalagaa! Tarnit makku tassaapput Sakkutuutit qilammiorpaluttut. Ikiukkit, Katersaarsuillu qutsinnerpaat ataatsimoortitat aqqutigalugit ajugaasinnaanngoqqukkit, taamaalillutik ataasiakkaarlutik amerlasoorsuartut ilerniassammata, nunallu makku Guutip asanninneratigut ilinniutillu guuterpaluttut qaammarsaanerisigut tiguarniassammatigit.

Guuti-aa! Illit tassaagit tapersersortaat ikiortaallu, inoqajuitsumi, qaqqami, qoorumi, orpippassuarni, narsaannarsuarni imarsuarnilu Illit tatigisarilitsit – taamaalillutik Naalagaaffiup pissaaneratigut, Anersaallu Illernartup anersaarneratigut nipitik qullarniassammatigit.

Ilumut, Tassaavutit Pissaanilik, Angisooq tamanit Anginersaasoq, Tassaavutillu Ilisimasoq, Tusaasoq Isigisorlu.

PM 50

Naalagaq-aa, Guutiga naalliunnermit nalaarneqaraangama qimarravigisartagara. Aliasukkuma Eqqornaveeqqutigalugulu Qimarravigisartagara! Eqqissarfiga ajorsaruma Qimarravigisagara kiserliorumalu Aappersuisora. Anniaateqaruma Tuppallersaasiga avinngarusimaninnilu asannitsigalugu Ikinngutigisagara. Aliasuutimma anniaataannik peersitsisartoq ajortuliannillu Isumakkeerisoq. Tamaviaarlunga Illit kisivit saaffigaakkit, uummatikkullu iluunngarlunga, tarninnik oqqannillu qinnuigaakkit Ataasiussutsivit guuterpaluttup piffissarititaani Illit piumasannut akerliusunut tamanut assersimaqqullunga, mingutsisitaanernillu tamanit Saammaannerpit orpiata alannguanut oqquiniarnissamut uannik akornusiisinnaasunut minguiannga, minguitsooqqullunga isornaateqanngitsooqqullungalu. Naalagaq-aa, sanngiitsut nallittukkit, napparsimasut ajorunnaarsikkit qilalersullu immillugit. Uummat, Asanninnerpit innerata aamaartitaa qiimmattarli, Asanninnerpit qilammiorpaluttup Anersaarpillu ikumanerinit ikummarissarneqarli. Iluarsutsip ataasiusutut ataatsimut oqqiorfiat pilluaqqujuk Saammaannerpillu niaqorutaanik niaqorusinnga. Tukkussutsivit seqerngata kiinnakkut qaammarsarlinga saammaallutillu ikiunnga Isaaffippit Iluartup eqqaani Kiffartuussinnaaqqullutit. Uummatiga Pinngortitannut asanningaalersiguk Nallittuingaarninnullu uppernarsaataalanga, Saammaannernullu ilisarnaataallunga, tassaalangalu Asasannut eqqisseqatigiinnermik pilersitsisoq, Ilinnut tunniuttoq, Ilinnik eqqaamannittoq, Illit pinnik tamanik isumaliutiginninnermigut imminut puigortoq. Guuti-aa, Guutiga! Isumakkeerfiginninnerpit Saammaannerpillu anorai sallaatsut uannut tunuteqinagit, Ikiuinerpillu Iluarinninnerpillu puilaffiat uannit peerseqinagu. Suluppit tamanut illersuisuusut ataanni eqqissilangatoq, Isivit naassaanngitsussamut isigisut piggattuarilinngatoq. Innuttavit akornanni oqqannik Illit aqqit unnersiuitigilara katersaarsuit akornanni nipiga tusarneqarsinnaanngortillugu qanortorlu unnersiutiginninnera qaninnit eqqissinermik nassataqarluni aniagili. Ilumut tassaavutit Saammaassisoq, Iluartoq, Pissarsuaq Ajugaqanngitsoq.

PM 43

Guuti, Saqqummersitanik tamanik Pinngortitsisoq, Aallaavinnullu tamanut Aallaavik. Saqqummersitanut tamanut nagguik, Qaamanernullu tamanut Aallarnerfik! Nalunaajaatigaara Atikkut paasinninnerup qilaa pinnersarneqarsimasoq, aammalu oqalunnerup imaa qorlorsimalluni, Isumaginninnerpillu nalunaajaataat siaruarterneqarsimallutik upperisat tamarmik malinnittuinut. Qinnuigaakkit imatut pisuutigileqqullunga sunaluunniit Illiunngitsoq tunussinnaaleqqullugu, sumilluunniit tamanit kiffaanngitsooqqullunga Illiunngitsumik. Tukkussutsivillu nuiaanit siallerfiginnga sumiluunniit silarsuarni iluaqqutigisinnaasannik. Saammaassinernik nakussannartumik ikiunnga Siunertat kiffavit akornanni kiffartuutigeqqullugu, taamaalillunga uannik eqqaamanninneq ingerlaqqullugu Naalagaaffippit ataneratut sivisutigisumik. Tassaavoq kiffat, Naalagaq-aa, pissutsini tamaat atorlugu Tukkussutsivit killingiusaanut, Saammaassinerpit imaanut Tunissutsivillu qilaanut saassimasoq. Angingaarsutsit, Alutornangaarsutsit, Tukkussutsit, Saammaasinerillu malillugit pinnga. Ilumut Illit pissaanerup piginnaanerullu Guuteraatit, Tassaasoq qinusumik Akisussaq eqqortoq. Allamik Illiunngitsumik Guuteqanngilaq. Nalusaqanngitsoq, Ilisimatungaartoq.

PM 3

Illernarsisitaagit Illit, Naalagaq Guutiga-aa! Qinikkakkut tatigisakkullu Taassumuunalu Siumut Isigisuit Nalunaarutinnilu aatsisuit Naqitsisaatigut qinnuigakkit, Illit eqqaaneqarnerit ingerlatsisorissagiga, Kiinnat anguniagarissagiga, Aqqillu qaammaqqutigissagiga, Kissaatillu pilerisarissagiga, Iluarinninnerillu nuannaarsaatigissagiga. Ajortuliortuuvunga, Naalagara-aa, Illillu soraajuitsumik Isumakkeerfiginnittuuvutit! Ilisarigakkilli miserratigiunnaarniariarlutit tuaviulerpunga isumaginninnerpit asannittup najugaa qutsissoq angujumallugu. Isumakkeerfiginnga, Naalagara-aa, ajortuliamma, Nuannaarnerpit aqqutaani ingerlaarsinnaanissannut assersimammanga Ataasiussutsivillu imaata sissaanut tikiunnaveersillunga. Allamik peqanngilaq, Naalagara-aa, uannut saammaannermik iliorsinnaasumik, kiinnama saaffigisinnaasaanik, allamillu peqanngilaq uannik nalliginnissinnaasumik, nallittuinissamut qinnuteqarnissannik pilersitsisumik. Ajattoqinanga, taanna pillugu qinnuigakkit Illit saammaannerpit najuunneranit uannillu tunuarsimateqinagit Illit pisuussutivit tukkussutsivillu sarfaat. Uannut aalajangeruk, Naalagara-aa, Illit asasinnut aalajangersimasat, uannullu allakkit Illit toqqakkannut allassimasatit. Isiginera tamatigut Illit saammaallutit isumassuinerpit killingusaanut nakkussiuarsimavoq, isikkalu saamallutit nallittuissutsivit inaanut nakkussiuarsimallutik. Qanoq iliorfiginnga Illit iluarisat malillugu. Allamik Guuteqanngilaq Illit peqartinnak, pissaanerup Guutia, naalannssutsip Guutia, ikiuinissaa tamarmik torlorfigisaat.

PM 29

Ilisimanngilara, Guutiga-aa, Inneq sunaanersoq Illit Nunanni ikissimasat. Nunarsuup taassuma akisunnera assersinnaanngilaa, erngulluunniit ikumanera qamissinnaanagu. Nunarsuup innuttaasa Taassumap pissaanera qanoq ilisikkulluunniit akiorsinnaanngilaat. Tassunga qanillisumut, sakkortungaarneranillu tusarsimasumut pilluaqqusaaneq annertoqaaq. Ilaannik, Guutiga-aa, Illit naakkinnissutsit nukittortitsisoq aqqutigalugu qanillisinnaanngortitsivutit, allalli tunuarsimatippatit Illit ullunni assaasa allassimasaat peqqutigalugit. Kinaluunniit tassunga nukingerluni ornigussimasoq qanillisimasorlu Illit kusanassutsinnut takunnikkumaarnermigut kajungerluni inuunini Illit Aqqutsinni tunniussimavaa, Ilinnullu qullarsimalluni, sunit tamanit Illiunngitsumit atanngilluinnarluni. Qinnuigaakkit, Naalagara-aa, Innerup massuma pinngortitaanerup nunarsuaani naaralalluni ikualaneratigut, assiaqutit Ataqqinangaassutsivit issiavissaarsuata saavanut anngunnissannut Isaarissavillu matuata eqqaani qeqqinnissannut akornutaasimasut peeqqullugit. Nalagara-aa, Illit Atuakkanni ajunngitsoq sunaluunniit saqqummiussat uannut peqqujuk, Saammaannerpillu paaqqinninneranik ungasissuutinnangatoq. Illit iluarisannik sumilluunniit pinissamik Pissaaneqarputit. Illimmi ilumut Tassaavutit Tamanut Pissaanilik, Tamanik tukkunerpaaq.

PM 10

Unnersiutigisaagit Illit, Naalagaq Guutiga-aa!

Qinnuigaakkit Illit, Saqqummerneq una aqqutigalugu, taarneq qaamanermut sangutitaareermat, taannalu aqqutigalugu Illernartoq tamanit ornigarneqarumanerpaaq sananeqarsimasoq Allagaq Naqissimasoq tassuuna saqqummersissimasoq Allagarlu imusaq siaarneqarsimasoq qulaagaasimasoq, uannut ingiortinnullu tunniuteqqullugu, Illit qilammiorpaluttumik illernassutsivit qilaanut immitsinnut qaffatsitsisussaq aammalu qularnermit, Illit ataasiussutsivit Illernartuanut isernissamut pasinnikkajuttut isernissaraluannik assiisimasup, minnerpaalluunniit eqqiaatissaanik. Uanga taannaavunga, Naalagara-aa, Illit isumassuinerpit asannittup allunaasaanik tigumminnittuinnarsimasoq aammalu Illit nallittuissutsivit saammaannerpillu annoraavata mersorneranik najummatsertoq. Uannut asasannullu Aalajangeruk silarsuarmi maani takkuttussamilu, ajunngitsoq. Pinngortitavit akornanni toqqakkannut Tunissummik Isertortumik aalajangiussannik pilersukkit.

Uku tassa, Naalagara-aa, Ullut Illit kiffannut iisinnginniarfiup naalannissaanut peqqussutigisatit. Pilluaqquneqarli taanna Illit kisivit pillutit iisinnginniarfimmik maleruaasoq aammalu Illiunngitsumik allanut tamanut qilerussaarsimasoq. Ikiunnga ikiukkillu, Naalagara-aa, Illit naalaqqullutit peqqussutinnullu maleruaqqulluta. Ilumummi Illit nammineq piumasat malillugu qanoq iliorsinnaavutit.

Allamik Guuteqanngilaq taamaallaat Illit, Tamanik Ilisimasalik, Tamanik Ilisimasoq. Unnersiutiginninneq tamaat Guutip pigaa, silarsuarnut tamanut Naalagaq.

PM 181

Guuti-aa nalunaajaatigaara Illit pinngortikkimma Ilinnik ilisimannileqqullunga Ilinnillu pallorfiginnittooqqullunga. Maannakkorpiarlu nalunaarutigaara sanngiissusera Illillu Sanngissutsit, piitsuussusera Illillu Pisuussutsit.

Allamik Illiunngitsumik Guuteqanngilaq, ulorianartumi ikiortaasoq, Imminut napatittoq!