Prayers & Meditations

Du namma lea mu buorideapmi, O Ipmil, ja Du muitin lea munnje dálkkas. Lagašvuohta Dutnje lea mu doaivu ja ráhkisvuohta Dutnje lea mu guoibmi. Du árbmu mu guovdu lea mu buorideapmi ja mu dorvu sihke dán máilmmis ja dan máilmmis, mii boahtá. Duođalaččat, Don leat buotveagalaš, buotdiehtti, buotviissis.

Du njálgga hájat agálašvuođa rávnnjiin atte mu juhkat, O Ipmilan, ja Du leahkima muora heđemiid divtte mu smáhket, O Doaivun. Du ráhkisvuođa kristállagálduin divtte mu juhkat, O Gudnán, ja Du agibai’ bisti láđisvuođa suoivanii divtte mu ásaiduvvat, O Čuovgan. Du lagašvuođa niittuin, Du leahkima ovddas divtte mu nagodit vádjolit, O Ráhkásan, ja Du árpmu ruvnnu olgešgieđa bealde atte munnje čohkkánsaji, O Hállun. Du njálggahájat ilu vuoiŋŋanasaid divtte bossut badjelasan, O Ulbmilan, ja Du duohtavuođa paradiissa allodagaide divtte mu beassat sisa, O mu Hervošeami mearri. Du oktavuođa duvvá šuoŋaid atte mu gullat, O Don guhte leat čuovgi, ja Du fámu vuoiŋŋa ja mávtta bokte ealáskahte mu, O Sállejeaddján. Du ráhkisvuođa vuoiŋŋain doala mu nanusin, O mu Biebmi ja Du miellabuori bálgá alde daga lávkkiidan sihkkarin, O Sivdnideaddján! Jápmemeahttunvuođat šaddogárddis, Du čábbodaga ovddas, divtte mu orodit agibeaivve, O Don guhte leat árbmugas munnje, ja Du gudni čohkkánsaji ala bija mu, O Don guhte leat mu Oamasteaddji. Du ráhkisteaddji láđisvuođa albmái bajit mu, O mu Ealáskahtti, ja Du oahpistusa guovssonásttiin láide mu, O Don mu Geasuheaddji. Atte mu leat Du oaidnemeahttun almmustusa ovddas, O Don guhte leat mu álgu ja stuorimus doaivva, ja Du čábbodaga njálgga hájaid sisa, maid Don almmustuhtát, divtte mu máhccat, O Don guhte leat mu Ipmil. Fámolaš leat Don dahkat dan, maid háliidat. Don leat duođalaččat Rámiduvvon, Šearradamos, Buot Alimus.

O Ipmilan! O Ipmilan! Ovttas bálvaleaddjiidat váimmuid ja almmut sidjiide Du stuorra ulbmila. Čuvvoset sii Du báhkkomiid ja elloset Du lága mielde. Veahket sin, O Ipmil, sin figgamušain ja atte sidjiide nanusvuođa bálvalit Du. O Ipmil! Ale guođe sin okto, oahpis sin lávkkiid Dieđut čuovggain ja ilosmahte sin váimmuid ráhkisvuođainat. Duođalaččat, Don leat sin Veahkeheaddji ja Hearrá.

Duođaštan, O Ipmilan, ahte leat sivdnidan mu dovdat Du ja bálvalit Du. Buvttán ovdan dán bottus iežan geahnohisvuođa ja Du fámolašvuođa, iežan geafivuođa ja Du riggodaga. Ii leat mihkkige eará Ipmiliid, go Don, Veahkki heađis, Iešalddes bissovaš.