Ridván Messages

O le o'o mai o le Tupu o Fa'amanatuga, ua mae'a ai fo'i le periota o tapenaga mo le isi Peleni fa'ale kelope o le a soso'o ai nei; ma ua matou vala'auina ai uo a le Atua i le lima tausaga o se fa'atoina fou atu o le loto tele, agaga maumaututu, ma tamaoaiga maua.

Ua fa'apena nei i vaega 'au a Bahá'u'lláh ona tutulala'i mai fa'asaunini ma le fa'amaoni. O mafutaga sa faia i le loaloa o le lalolagi i masina talu ai nei, sa fa'asalalauina mai ai pea lava pea ni fa'ailoga ua fa'aalia ai le agaga naunauta'i o le fa'alapotopotoga e amata lenei galuega, e tulaga 'ese lona malosi. O tulaga mo'omia o lenei galuega e pei ona fa'ailoa atu i le feau i le Koneferenisi a Konesula, ua fa'apena lava ona fa'aliliuina i ni peleni o galuega o le a fa'atinoina. O tauiviga fa'atoamanumanu sa fa'atinoina i le faitausefulu o tausaga ua mavae atu ua fa'apena lava ona tapenaina mai ai le fa'alapotopotoga, ma ua latou maua ai se fuataga o agava'a fa'amaoniaina mo le fa'afaileleina o le ola tuputupu a'e, ma ua fa'au'ameaina ai ona malosi'aga, mo lenei vaitaimi taua tele. Aemaise o le luasefulu o tausaga na se'i fa'atoa mavae atu nei, lea sa fa'ateleliseina ai i se tulaga iloga le si'itia maualuga o agava'a mo le fa'atinoina vave o lenei galuega.

O totonu fo'i o lenei periota, sa mafai ai e uo e ala i lo latou fa'aogaina o se faiga fa'avae tuputele mo le fa'atinoga o galuega, ona fa'afaileleina ma fa'aatoatoaina le lelei i se tulaga auiluma manuia ni tomai ma ni agava'a autu, e amata mai i ni auaunaga faigofie, ona fa'apena lea ona o'o atu i ni galuega tetele, e mo'omia ai ona si'itia ia tomai ma agava'a ia mafai ona tauaveina ai ni galuega, i ni tulaga e sili atu ona lavelave ma faigata tele. O lenei auala, ua mafai ai ona amatalia se gaioiga taga tasi e atia'e ai aufaigaluega ma fa'alapotopotoga i le faitauafe o kalasa - ma, o le tele o nei kalasa, ua o'o atu lo latou atina'ega i ni tulaga iloga le maualuga o le tulaga auiluma manuia. Ua le na o tagata ta'ito'atasi fo'i sa avea ma manulauti o lenei taumafaiga, po'o le fa'alapotopotoga, po'o tinopulea fo'i a le Fa'atuatuaga; 'ae o le aufaigaluega auai atoa uma ma le le vaevaeina o le ola tuputupu a'e o le Pule'aga Fou mo le Lalolagi, sa fa'aosofiaina fa'atasi i ni malosi'aga fa'aleagaga ua fa'asafuaina mai a'o fa'asolosolo ona tatala mai le Fuafuaga Fa'ale Atua. Ma o fa'ailoga ua fa'amaoniaina ai le auiluma manuia fa'atasi o nei aufaigaluega auai e to'atolu, o lo'o fa'apena lava pea lava pea ona saga fa'aalia maninoina mai i itu nei: e ala i le agaga mautinoa ua mauagava'a ai le to'atele ma le to'atele o tagata talitonu e fa'asoa atu ai le tala'aga o le soifuaga o Bahá'u'lláh, ma fa'amalamalama le uiga ma fa'amoemoega o Lana Fa'aaliga ma Lana Feagaiga lefa'atusalia; e ala i aofa'iga tuputele o vaega 'au o agaga ua avea nei talanoaga anoa ma tagata talitonu ma afua'aga o lo latou tosinaina mai i Lana Fuata'iga, ma lo latou faisaofaga atu i le fa'atinoina o Lana va'aiga mamao mo le aufa'atasiga o le lalolagi; e ala i agava'a o Bahá'í ma a latou uo i totonu o fa'alapotopotoga i nu'u e fa'amatala i ni fa'aupuga anoa ma manatuganatuga loloto o latou iloa ma tomai, ua maua mai le gaioiga tau atia'e o lo'o liuaina ai uiga ma amioga, ma aumaia ai ni suiga fou i le soifuaga lautele o tagata; e ala i ni aofa'iga tetele o tagatanu'u moni o se atunu'u, ua avea lo latou auai i totonu o tinopulea ma matagaluega a le Fa'atuatuaga, ma auala ua latou ta'ita'ia ai mataupu a latou fa'alapotopotoga; e ala i foa'i i

Teugatupe ua fa'atinoina i se tulaga fa'atuatuaina, matamau ma le agaga faitaulaga fa'atoina, o se itu e taua tele i le gafatiataulimaina o le auiluma manuia o le Fa'atuatuaga; e ala i le tuputele i se tulaga iloga o tauiviga ta'ito'atasi ma taumafaiga tu'ufa'atasi o lo'o lagolagoina ai le fa'atinoga o galuega mo le atina'ega o fa'alapotopotoga; e ala i le agaga filifiliga o le to'atele o agaga fa'atoina o lo'o i le tauosoosoga o lo latou malosi fa'atupulaga talavou, ua fa'aalu lo latou malosi i so'o se galuega, aemaise o galuega mo le a'oa'oina fa'aleagaga o augatupulaga e i lalo ifo o i latou le matutua; e ala i fa'atamaoaigaina o le agaga tatalo o le fa'alapotopotoga ua mafai ona ausia i ni mafutaga faifai pea fa'atapuaiga; e ala i le si'itia o agava'a i so'o se itu o taupulega Fa'a-Bahá'í; e ala i le tapenaga a tinopulea, matagaluega, ma tagata ta'ito'atasi ua sauniaina ai i latou e mafaufau ma fuafua a latou galuega ia o gatusa ma gaioiga taga tasi, e iloilo toto'a taualumaga lata mai o a latou taumafaiga ma fuatia le maualuga o tamaoa'iga ma meafaigaluega i nofoaga o lo'o latou aumau ai, ma fa'ata'oto ni fuafuaga e fa'avae tonu i luga o nei va'aiga talafeagai; e ala i le gaioiga taga tasi ua latou masani uma ai e pei ona fa'afoeina ai a latou galuega, o le su'esu'e, feutaga'i, ma tomanatu, lea ua mafai ona fa'afaileleina ai se amioga tumaoti, o le agaga lea o le a'oa'o ia fa'amalamalamaina; e ala i le si'itia o le fa'atauaina o le uiga o le fa'atinoga o A'oa'oga, i ni auauanga mo le manuia lautele o tagata; e ala i le fa'atelega o avanoa sa su'eina ma ua fa'aogaina e ofo atu ai se va'aiga Fa'a-Bahá'í i totonu o soalaupulega o lo'o laualuga nei i mataupu a le sosaiete lautele a tagata; e ala i se lagona malosi o le avea ma sui o se fa'alapotopotoga aoao i le kelope, i itu uma o a latou taumafaiga, o se fa'alapotopotoga lea o lo'o fa'ateleliseina le o'o mai o se soifuaga auiluma manuia iloga fa'ale Atua, o le a fa'aaliaina ai le mana mo le atia'eina manuia o sosaiete, o lo'o natia i le Fuata'iga; ma i le meamoni, e ala lea i le tuputele o le agaga malamalama o uo o a latou taumafaiga mo feliuaiga fa'aleagaga, o lo latou fa'alauteleina o le li'o o le aufa'atasiga, o lo latou galulue felagolagoma'i ma isi i matata eseese o auauanga, o lo latou fesoasoani atu i aofa'iga tetele o tagata ia latou tauaveina le atine'ga o o latou lava mana'oga ma fa'amoemoega fa'aleagaga, fa'ale soifuaga lautele ma fa'ale tamaoaiga - ma, i nei taumafaiga uma, latou te aumaia ai le fa'aleleia o le lalolagi - o se fa'ataunu'uga lava lea o sini ma le fa'amoemoega autu, o le tapuaiga.

E ui ina le mafai i se itu se tasi ona fuaina ma maua uma ai le atoaga o le tulaga auiluma manuia ua o'o nei iai le fa'alapotopotoga Bahá'í, ae o le tele o ia itu e mafai ona fa'amaoniaina mai totonu o se numera o kalasa i le loaloa o le lalolagi ua mafai ona fa'avaeina mautu ai polokalame mo le ola atia'e, ma i le agaga fa'afetai i fa'amanuiaga ua foa'iina mai e le Matagofie o Abhá, matou te ta'utino atu ai ma le agaga mautinoa ua silia nei le 5,000 le aofa'i o kalasa fa'apena ua mafai ona ausiaina. O le tulaga lautele o le fa'avae ua mafai ona fa'ata'otoina mai i lenei matati'a, ua avea ai ma la'asaga mo'omia muamua e amata ai ona fa'atinoina se galuega tele ua feagai nei ma le lalolagi Bahá'í - o le fa'amalolosiina o le gaioiga o le ola atia'e i kalasa uma ua mafai ona amataliaina ai, ma le fa'alauteleina atu o le gaioiga taga tasi mo le atina'ega o le ola o le fa'alapotopotoga. O se taumafaiga tutumau ua mo'omia e gafatiataulimaina ai lenei fa'amoemoega e matua faigata lava. Peita'i o lona taunu'uga e matua loloto ma tulaga ese lava lona taua tele, ma o se taunu'uga e o'o mai ai se suiga tele fa'a-epoka fou i le fa'alapotopotoga atoa. O ni la'asaga pupu'u, e faia i se tulaga faifai pea ma le televavave, e mafai ona fa'asopoliaina ai se ala umi, o le a savaliaina ai. O le galulue punoua'i i se la'asaga auiluma manuia e tatau ona fa'ataunu'uina i totonu o se kalasa i se periota - e fai ma fa'ata'ita'iga, o ni ta'aviliga se ono e faia a'o le'i taunu'u atu i le ulua'i fa'amanatuga muamua o fa'amanatuga e ta'iluaselau o tausaga - o le a fa'apena ona mafai ai e uo ona fa'alatalataina atu i le i'uga o la latou sini atoa, o le lima tausaga. Aua o nei ta'aviliga o lo'o afifiina ai ni avanoa e vave ona mou atu mo le auiluma manuia, ma o ni vaitaimi e le magafagafaina le taua tele, e le mafai ona toe maua.

Aua paga lea i le sosaiete lautele, ua fa'apena lava i to'atuga o se malaia loloto ua pagatia ai le agaga ona fa'ateteleina pea, ma ua sili atu ona tulaga ogaoga le leaga ua o'o nei iai. E uiga 'ese le eseesega ua va'aia nei, aua a'o fa'apologaina pea tagata o le lalolagi i puapuaga o lo latou fia maua o se vaifofo moni, ma lo latou vevesi solo i le liliu atu i so'o se fa'amoemoega sese e fa'atula'i mai, o lo'o fa'apena lava ia te outou ona saga fa'aleleia atili fa'atasi se meafaigaluega ua mafai ona fa'afeso'ota'i ai agaga ma le Upu a le Atua, e tumau e fa'avavau. E uiga 'ese fo'i le eseesega ua aliali mai nei, aua i le fotua'i mai o talitonuga pulepuletutu ma fa'amoemoega fete'ena'i ua tupu tele lo latou ma'ema'ea i so'o se nofoaga, o lo'o fa'apena lava ia te outou ona galulue ma le loto gatasi i le fa'amaopopoina mai fa'atasi o tagata e fau ni fa'alapotopotoga, o le a avea ma sulufa'aiga o le aufa'atasiga. Ia aunoa lava ona fa'avaivaia outou i nei va'aiga fa'ailogalanu ma fevaevae'iga i le lalolagi, ae ia fa'apena ona outou avea nei taualumaga to'atuga ma fa'amanatu ma taulogologo ia te outou o le tulaga mo'omia vave e agaga o lo'o si'osi'omiaina outou, le vai o fa'amalologa, ua na outou lava e mafai ona tu'uina atu i le lalolagi.

O le fuafuaga mulimuli lenei o le soloa'iga o Peleni Ta'i Lima Tausaga sa tulituliloaina mai. O le fa'aiuga o lenei Peleni, o le a amata ai se isi la'asaga fou i le tatalaina auaua'i mai o le Fuafuaga Fa'ale Atua, ma o le a fa'ata'oto mai ai se tulaga e u'una'iaina ai le fa'alapotopotoga a

Bahá'u'lláh ia taunu'u atu i le amataga o le seneturi lona tolu o le Era Bahá'í. Ia fa'apena ai i le uo a le Atua i so'o se atunu'u lava ona latou fa'atauaina le folafolaga ua tu'uina atu i nei tausaga ititi e lima o lo'o loma nei, lea o le a avea ma tapenaga tele ma le faigata mo isi galuega aupito mata'utia o le a fa'apena lava ona o'o mai i le lumana'i. Matou te fa'atoga atu ai ia te outou, o le aufaigaluega teufatuina pele, ma o le aupele a Ia o Le o le Pele Sili o lalolagi, ina ia outou le fa'ama'imaua so'o se tauiviga lava e tou te mafai ona fa'aaogaina ai mea uma ua outou a'oa'oina nei, ma so'o agava'a ma tomai lava mai le Atua ua outou umiaina, mo le auiluma manuia o le

Fuafuaga Fa'ale Atua i lona la'asaga o le a soso'o ai nei. O le tulaga lautele fo'i o lenei Peleni o le a mafai ai e so'o se tagata e to'atasi ona ia lagolagoina lenei galuega, e tusa lava po'o le a le fa'atauva'a o se sao e mafai ona ia faia iai. Matou te fa'aopopo atu ai i ni a outou talotaloga mo ni fesoaosani fa'alelagi a matou talosaga, ua matou ofoina atu i totonu o Loa Paia, mo i latou uma o lo'o galulue punoua'i mo lenei Fuata'iga, e tulaga aoao i luga o mea uma lava.

Ina va’ai atu ia i le mata’utia o le tula’i mai o le fa’alapotopotoga a le Suafa Silisiliese! I le na o le tasi o le tausaga talu ona amata mai le Peleni fou, ae ua molimau mai lipoti i se fua maoa’e o galuega ua lagaina a’e, ma ua amata ona fa’ataunu’uina. O le si’itia maualuga o le malolosi o le 5,000 o polokalame mo le ola atia’e, ua mo’omia ai se fuataga tele o ni taumafaiga e le’i va’aia muamua. I lo latou taofi mamau i fa’avae autu o le Peleni, ua fa’apena ai i ni aofa’iga tetele o uo ona galulue i ona tulaga mo’omia, i se fa’atinoga malosi i le fa’amaoni ma le agaga fa’atoina i tulaga lelei, o lo’o latou talisapaia ai lenei fuafuaga. E pei ona iai i lenei fa’amoemoe, o nisi o polokalame mo le ola atia’e, ua umi se taimi o gafataulimaina, ua avea nei ma tumu o le poto ma tamaoa’iga mo galuega, ma ua avatu la latou lagolagosua i isi nofoaga o lo’o si’osi’omia ai i latou, ma ua fa’afaigofie ai ona fa’asafua vave atu tomai ma iloa mai le fa’atinoga o galuega. O ni nofoaga autu o galuega malolosi—i mafutaga fa’aletua’oi ma nu’u ua sili atu ona uluola ai galuega, mo le fausiaina o fa’alapotopotoga—ua fa’amaonia lava le avea ma eleele lafulemu, mo le fa’aliliuina o fa’alapotopotoga i ni taualumaga fou. O ni vaega ‘au faitauafe fo’i o Sui Konesula ma a latou fesoasoani, o lo’o fa’aosofiaina nei ni tauiviga a tagata talitonu, ma fesoasoani iai latou ia latou maua se va’aiga mamao, e fa’atatau i auala e auiluma manuia ai le gaioiga o le ola atia’e, i totonu o ni taualumaga eseese, ma le fa’amaoniaina o metotia e talafeagai, ma si’osi’omaga o lo’o iai kalasa ta’itasi. O le lagolagoina fo’i e a latou Fono Fa’aleagaga Tau Atunu’u, ua mafai ai e Fono Fa’aitumalo Bahá’í, ona a’oa’o ma fa’atino auala e fa’ateleliseina ai le fa’atinoga fa’atasi o le Peleni, i totonu o ituaiga eseese o kalasa, ae i atunu’u laiti e leai ni a latou Fono Fa’aitumalo, ua fa’apena fo’i i ni taupulega fou tau atunu’u ona tuliloaina ai, lenei lava fa’amoemoe e tasi. E ui e pei o taunu’uga masani i so’o se gaioiga tuputupu a’e fa’atino atoa, o lo’o molimauina le televave i isi nofoaga, ae fa’atuatuai i isi, ‘ae ua fa’apena lava ona amata ona si’isi’itia pea le aofa’i atoa o polokalame mo le ola atia’e uluola malolosi, i le loaloa o le lalolagi. E le gata i lea, ae ua fa’agae’etia lava i matou i le agaga fiafia tele, e va’ava’ai atu i le si’itia maoa’e o le auai malosi o tagata i galuega o le Peleni, i totonu o ona ulua’i ta’aviliga e fa ua mae’a nei.

O lona uiga, e faigata ona fuatia tonu le tulaga ‘ese o fa’ailoga o ni taunu’uga lelei, o le a o’o nei iai lenei galuega tele i le tausaga a sau. Ma o le a ea se isi taulaga e sili atu ona talafeagai ona ofoina atu i le Matagofie Fa’amanuiaina, i le fa’amanatuga o le luaselau o tausaga o Lona Soifua mai, na i lo tauiviga fa’amaoni a Ana pele, o lo’o fa’alauteleina mamao atu ai Lana Fa’atuatuaga? O le fa’amanatuga muamua o fa’amanatuga ta’ilua senetenari o le a fa’atinoina e le lalolagi Bahá’í, o se avanoa e tumu i ni fa’amoemoega fa’agae’etia agaga iloga. Aua a fuatiaina sa’o le tausaga lenei, ua avea lava ma avanoa e tasi e sili atu ona taua tele, e le’i tupu mai muamua, mo le fa’afeso’otaia o agaga ia Bahá’u’lláh. I masina o lo’o i luma nei, ia matua fa’atauaina lava e tagata talitonu uma le tulaga tautele o lenei vaitaimi, ma ia mataala i avanoa o lo’o i so’o se nofoaga, e fa’amasani atu ai isi tagata i Lona soifuaga, ma Lana misiona iloga. Aua o le avanoa fa’atala’iga ua ta’oto mai nei luma o le lalolagi Bahá’í, e tatau ona tapuaaoina atoatoa, e tatau ona fuafuaina lelei iai ni talanoaga fetala’ai, o le a faia ma so’o se ituaiga lava o tagata. Ma o le fa’asologa o ia ituaiga o talanoaga anoa, o le a fa’apupulaina maualuga ai le iloa, ma tatalaina ai loto—ma i nisi o taimi i ni tulaga e sili atu ona televavave. O lenei gaioiga ta’uaogaina, o le a maua iai e tagata uma lava lo latou vala’auina e auai ai, ma o le agaga fiafia e fa’aosofiaina mai le auai i lenei galuega, e le tatau ona latou fa’amativaina ai i latou lava. Matou te fa’atoga atu ai i le Pelesili, ia fa’apena lava ona fa’atumulia lenei tausaga atoa o le fa’amanatuga o le lua o senetenari, i lena agaga olioli tele e mama a’ia’i, ma suamalie atoatoa: o le ta’uina atu lea i le isi agaga, le tafa mai o ata o le Aso o le Atua.

O tiute fa’apoloa’iga ua tatau nei ona fa’ataunu’uina e le kamupani o le ‘au fa’atuatua, ua matua mo’omia vave atili nei, ona o le fa’ateteleina o le fememea’i, fematea’i, ma le puaoa ua o’o nei iai le lalolagi. Ma o le mea moni, e tatau i uo ona fa’aoga so’o se avanoa lava e fa’asusulu atu ai le malamalama, e mafai ona fa’apupulaina le ala, ma ofo atu le agaga mautinoa i le tagata atuatuvale, le fa’amoemoe i le tagata fememea’i. Ua fa’amanatuina mai fo’i iai matou se fautuaga sa avatu e le Fa’atama i se tasi o fa’alapotopotoga Bahá’í, e foliga mai sa fuafuaina lava mo lo tatou fo’i vaitaimi: “A o’o ina fetosoa’ina solo ma amata ona masaesae le ofu o le sosaiete o lo’o iai nei, i lalo o a’afiaga mamafa ma le fesouaina o fa’alavelave ma mala mata’utia, ma fa’apena fo’i ona fa’ateleina ava o lo’o fa’apogai mai ai le fevaevaea’i o lea malo ma lea malo, o lea vasega o tagata ma lea vasega o tagata, o lea ituaiga o tagata ma lea ituaiga o tagata, ma lea ituaiga o talitonuga ma isi ituaiga o talitonuga, e tatau fo’i la i le aufaigaluega o le Peleni, ona fa’aalia se isi tulaga e sili atu ona malosi o le felagolagoma’i o o latou olaga fa’aleagaga, ma a latou galuega fa’apule’aga, ma fa’atinoina atu se fuataga e sili atu ona maualuga o le galulue i le aufa’atasiga, o le agaga fesoasoania’i ia manuia le isi mai le tasi, ma le atina’ega paleni atoatoa o la latou galuega tele fai fa’atasi.” I lona fa’amamafa mai pea lava pea o le itu taua fa’aleagaga o galuega a le Fa’atuatuaga, ma le agaga naunauta’i loto gatasi o tagata talitonu i le fa’ataunu’uina o o latou tiute fa’apaiaina, sa fa’apena ona lapata’i mai ai Shoghi Effendi, i le le tatau ona auai i finauga, mailei, ma le taufa’aleaga fa’apolokiki. “Ia fa’apena lava iai latou ona tula’i ese mai faiga fa’apitoautasi, ma fuafuaga fa’avaega upufai uma lava,” ua ia augani mai ai i se tasi o avanoa, “i luga a’e o fefinaua’iga i’uvale, femateaiga papa’u, ma lagona femoumoua’i o lo’o fesouaina ai foliga, ma tosoaina atu iai va’aiga, o se lalolagi fesuisuia’i.” Aua o suapeau ma pisiga ia o lo’o pupuna a’e mai lea galu i lea galu, o lo’o fa’atafunaina ai se sosaiete fevesia’i, ma le fevaevaea’i. E matua anoana’i le mau fa’aletonu ua va’aia nei, e le tatau ai ona fa’ama’umau se taimi i nei fevaevaea’iga eseese. E pei ona iloa lelei e so’o se tagata mulimuli lava ia Bahá’u’lláh, o le ola solosolo manuia o le tagata soifua, e fa’alagolago i luga o le fa’apupulaina o ona eseesega, ma le fa’avaeina mautu o lona aufa’atasiga. So’o se sao lava e faia e Bahá’í mo le ola o le sosaiete, ua faia lava mo le fa’afaileleina o le aufa’atasiga; so’o se taumafaiga lava mo le fausiaina o le fa’alapotopotoga, o lo’o tuliloaina ai lava lenei fa’amoemoega e tasi. Aua mo i latou ua lelavava i le pologa i fevaevaeaiga, ua ofoina atu iai latou e fa’alapotopotoga o lo’o i lalo o le fa’apaologa o le Suafa Silisili’ese, se fa’ata’ita’iga mamana o se lumana’i manuia, e mafai ona maua i le aufa’atasiga.

Matou te si’i a’e ai le vi’iga i le Ali’i o Ali’i, i lo matou molimauina o le to’atele o Lana aupele o lo’o fa’atoina atu a latou mea uma lava i so’o se auala, e mafai ai ona sisi’ina a’e tagavai o le tafatasi o tagata soifua i tumutumu maualuluga. Uo fa’apelepeleina e: A’o amata nei se tausaga e tulaga ese le tumu i fa’amanuiaga, pe ua le tatau ea la iai tatou ta’ito’atasi, ona tomanatunatu i ni galuega fa’alelagi, o le a Ia lagolagoina alofa i tatou e fa’atinoina?

1. Matou te ofo alofa atu ia te outou a’o tatou manatuaina pea fa’atasiga iloga ia sa faamanatuina ai le Senetenari sautualua talu ona soifua mai le Matagofie Fa’amanuiaina. Pe a tatou tomanatu i mea na tutupu i na taimi, e tau mai i le taimi nei, ua tatou iloa ai, ua lē tutusa le lalolagi Baha’i nei pe a faatusa atu i le amataga o ulua’i taaviliga e 6 o lenei

Fuafuaga. O le lalolagi Baha’i ua i ai nei, ua sili atu lona faamatuaina i lana misiona nai lo taimi ua tuana’i. Ua maitauina nei se faiga e le’i masani a’i, i le faatuputeleina lea o le agava’a e aumaia ai uo ma e masani ai, e feso’ota’i ma lo latou soifuaga faa faalapotopotoga, ia faaosofia ai tuaoi ma nu’u e galulue mo se sini autasi; e faailoa atu pe faape’ī ona avea mea moni faale-agaga ma gaoioiga faatino faifaipea, ma, o le faatumutumuga o nei mea uma, ina ia mafai ona fefa’asoaa’i e lē gata i a’oa’oga lea o le a faafouina ai le lalolagi, ae i le talatalanoa foi e uiga i Lē na folafolaina maia nei a’oa’oga – o Baha’u’llah lea. O tala o Lona soifua ma Lona faapologaina ua folafolaina atu nei i le anoanoa’i o gagana e tagata matutua, talavou ma fanau laiti, ma ua pā’ia ai le lē mafaitaulia o agaga. O nisi o nei agaga fou ua faailoa mai lo latou sauniuni lea e sailiili atili i Lana Fuata’iga. O isi ua ofo mai e galulue faatasi ma Bahaí. E tele foi ē ua talia ma ua faaosofiaina e faailoa atu lo latou faatuatuaga.

2. O se tasi o molimau maumaututū o lenei auiluma, o le tele lea o nofoaga eseese ua manino mai ai le Faatuatuaga, ae ua lē o toe taotaomiaina i totonu o atunu’u. Na i ai ta’ita’i o malo ma i latou e mamao le tōfā ua o latou faailoa atu faalaua’itele – ma i nisi o taimi sa latou faamamafaina atu i faatasiga ai’ latou lava- e faapea: ua matua’i mo’omia lava e le lalolagi a’oa’oga a Baha’u’llah ma o taumafaiga Baha’i uma lava ua tatou tosina iai, ua tatau ona fa’alauteleina. Ua fa’afiafiaina i matou i le vaai atu e lē na o Baha’I o loo faamamaluina Baha’u’llah ma faamanatuina Lona Soifua – sa i ai foi ni faatasiga faapitoa na faatinoina e nisi e le o ni sui o le Faalapotopotoga Baha’i. I atunu’u o loo sauāina ai le Faatuatuaga, sa lē faavaivaia ai uō, ae sa faailoa atu lo latou maumaututū, ma sa latou faalaeiau atu foi i ō latou tagata-a-nuu ia latou su’esu’eina le mea moni e i latou lava, ma e to’atele i latou nei sa auai ma le fiafia i nei faatasiga. O nei foi faamanatuga, ua manu ae’ ai le tele o taleni ma faafiafiaga eseese lē mafaitaulia, o ni fa’ailoga mata’utia ia o le puna faavai mai o le agaga alofa na tupuga mai i ia gaoioiga. O faatinoga e le Faalapotopotoga Baha’i o lenei faamanatuga ua molimauina ai lesona tāua sa maua mai i galuega na faatinoina i tausaga e luasefulu talu ai a’o faasolo mai lenei Fuafuaga fa’ale-kelope. Ua ofo mai lava Baha’I ta’ito’atasi latou e galulue, ua tula’i faatasi foi le faalapotopotoga, ma ua galulue ma le malosi uō uma e lagolagoina fuafuaga sa faia e Tino Pulea. O se faamanatuga iloga lea ua faailogaina ai le mavae atu o ni seneturi se lua, ma ua maua mai ai se malosi’aga e faaosofiaina ai le galuega o le fausiaina o faalapotopotoga mo le seneturi o loo lumana’i. I lenei la vaitaimi a’o tatou aga’i atu i le faamanatuga lona lua o Senetenari Sautualua, ia avea fatu laau na lūlūina ma le alofa i le fa’amanatuga muamua, ia faafaileleina ma le onosa’i ina ia fua mai.

3. I le lua tausaga talu mai ona amataina lenei Fuafuaga, e eseese lava ‘ausiaga mai lea atunu’u i lea atunu’u, ae o le aofa’iga o polokalame-mo- le-ola-atia’e i le lalolagi atoa ua latalata atu nei i le ‘afa o le lima afe lea sa faamoemoeina mo lenei Fuafuaga, ma o le saosaoa o le si’itiaga o lenei numera o loo alu alu pea i luga. 2 Pe a taga’i toto’a i ai, o lo’o i ai faailoga faaalia o le malosi’aga ma agava’a o tagata ta’ito’atasi, faalapotopotoga ma tino pulea, o lo’o atagia mai ai. Mo tagata talitonu i so’o se nofoaga, o le faatinoga o le Faamanatuga talu ai ua faailoa mai ai o le tele o a latou talatalanoaga ma tagata, o loo fusia faatasi lea ma le agaga tala’i. A’o faatupula’ia galuega i le afe ma afe o nu’u ma tuaoi, ua maitauina le tutupu o a’a o ni faalapotopotoga ola. O le numera o kalasa o faatinoina ai nei gaoioiga ua fa’ateleina, ma ua faalauteleina atu i nofoaga eseese, ua lava tāpena, ua mafai ai e uō ona pāsiaina le ma’a maila lona tolu i le fa’aauauina lea o atina’e, ma ua uluola tele lava. Ma o ‘ī tonu, i le ta’imuaga o le a’otauina o le lalolagi Baha’i, aemaise lava i le gasolo mai o tagata e to’atele e mata’itūina le tofā mamao a Baha’u’llah, auā e le gata i le to’atele ua latou taliaina faalaua’itele gaoioiga Baha’i, ae ua a’oa’oina nei foi ni uō se toātele ua avea o se vaega o le faalapotopotoga, ua latou taliaina le Suafa Silisili Ese. Ua matou maitauina le avea o polokalame faalea’oa’oga a le Faatuatuaga o ni a’oa’oga mautū i nisi o nei nofoaga, a’o faagasolosolo atu le fanau mai lea vasega i lea vasega, ma ua suia foi mai lea la’asaga i le isi la’asaga o le polokalame faale-agaga mo talavou tauamata. I nei nofoaga, o le polokalame mo a’oa’oga o lo’o taumafai pea ia lava le ‘aufaigaluega ua tapenaina e tula’i atu e lagolago nei a’oa’oga faale-agaga ma uiga lelei o tamaiti ma talavou tau-amata, lea ua faatupula’ia le to’atele. O le ‘āuai i nei gaioiga amata ua matua’i tūtūmau lava i tū ma faiga ua avea nei ma vaega tāua i le olaga o ia faalapotopotoga. Ua manuae’ mai ai ni malosi’aga fou iā i latou o loo gafataulimaina lo latou lava atina’eina, ma ua latou fausia ai se malosi’aga e tete’e atu ai i vaivaiga o le lalolagi e fanauina fete’enaiga. Ua mafai foi ona auiluma i le faale-tino ma le faale-agaga. Ua amata ona suia tagata.

4. Uo peleina e, ua matuā tatau lava ona tatou si’i a’e nei loa le faafetai i le Pele Sili. E anoanoa’i le tele o mafuaaga iloga e faaosofia ai i matou. Peita’i matou te iloa lelei lava le telē ole galuega o lo’o totoe. O le mea moni, e pei ona matou faailoa atu muamua, ua tatau ona tula’i mai i selau ma selau o ni kalasa se faatupula’ia o le tele o tagata talitonu latou te mafai, atoa ai ma nisi o lo’o latou mau faatasi, e faamautūina pea le faafaileleina o le tuputupua’e ma le fausiaina o agava’a, ma o nisi ua tulaga ese mai ai lo latou agava’a ma lo latou loto pūlea e tōmanatu pea i gaioiga sa fai, atoa ma iloa sa maua mai i ia galuega. O le faatūina ma le tauto’aluaina o se amataga tuputupua’e o ni tagata i se nofoaga - e lē faapea na o totonu I kalasa ae faapea foi i tuā’oi ma nu’u – o se lu’itau tele ma se mo’omiaga tāua lea. Ae o nofoaga o lo’o vaaia ai nei tulaga, o taunuuga o ā latou galuega e tautala mo’i latou lava.

5. E faamafanafanaina lava i matou i le vaai atu o loo mata’itūina pea lenei mana’oga tāua e tino pūlea o le Faatuatuaga, ma o loo tapenaina ni auala lelei e faaaogāina ai ni iloa fou o loo maua mai i ia gaoioiga, ma o loo faasafua atu i le lautele. I lea lava taimi, o le tele o iloa o maua mai i gāioiga fai, ua vaaia atu ai e ia atunu’u, itu lagi, ma nu’u se vaaiga lautele mamao. Ua latou militino faatasi i vaega uma o le atina’eina o faalapotopotoga ma o loo amana’iaina e lē na o Baha’i ae o tagata uma lava. Ona ua latou malamalama lelei i le tāua tele o le Polokalame-o-A’oa’oga mo le auiluma o tagata uma, ua latou mata’itūina atili ai lona faamausalīina. E lē o galo ia i latou le faatāuaina pea o le mata’itūina e le Faalapotpotoga o vaega tāua o le Fuafuaga, ma ua valaau atu ai i uō ua to’atele mai, ina ia faamautūina pea le tāua o le ‘aufaatasiga. O loo latou tūtūmau pea i ā latou matāfaioi ina ia faaleleia atili tulaga tau pule’aga, ma faale-tupe ina ia mafai lava ona lagolagoina lelei polokalame o le faalautelega ma le faamautūuga. O le autū o nei galuega uma o le suōtosinaina lea i totonu o le faalapotopotoga ni ala e faamatuuina atu ai malosi’aga faaleagaga.

6. A’o faatuputeleina le galuega o le fausiaina o faalapotopotoga, ua faaaogāina e uo agava’a fou na o latou atia’eina ina ia faaleleia ai tulaga o le sosaiete o lo’o si’osi’omia ai i latou, ma o le faaosofiaina o lo latou tinoū e maua mai lea i lo latou su’esu’eina o Tusitusiga Paia. Ua faatuputeleina polōketi pupu’u, ua faalauteleina foi polokalame masani, ma ua i ai nei le tele o polokalame mo le atina’e na afua mai i a’oa’oga Baha’i, i itū tau a’oa’oga, tau soifua malōlōina, tau faatoaga, ma isi vaega. Ua alia’i mai i le tele o nei suiga vaaia i tagata talitonu ta’ito’atasi, ma mai i le soifuaga o tagata lautele, le mata’utia o le malosi o le Fuata’iga a Baha’u’llah, e fusia faatasia ai tagata ola uma. O suiga uma nei ua alia’i mai i fefaasoaa’iga a tagata lautele – pe to’alaiti pe to’atele, pe mo sina taimi puupuu pe faaumiumi – ua avea ma ala ua faaosofia ai le Ofisa Faava-o-mālō o le Bahaí i la latou matafaioi ole fefaasoaa’í ma tagata ā lautele i mataupu tāua e faapei: o le tutusa o alii ma tama’ita’i; femalaga’i faavā-o-malō; o le nafa o talavou i le liuga o tagata lautele; ma le fealofani o tapua’iga; ma isi – o loo faatinoina lea matafaioi ma le loto toa tuputupua’e, atamai ma le tofā mamao. Ma, o fea lava e soifua, galulue, ma ao’oga ai, o tagata talitonu uma, pe o le ā lava le matutua ma faasinomaga, o loo i ai lava lo latou sao ‘ānoa i soalaupulega mo le auiluma, e momoli atu ai mo le silafia e i latou o loo latou mau faatasi, le fu’a taualuga o talitonuga ua na fa’atulagaina mai i le Faaaliga atulasi a Baha’u’llah.

7. O le mau a le Faatuatuaga i soo se mataupu tāua ua talanoaina faalaua’itele, o loo faasalalauina atu e lana aufaigaluega i luga o lana ’upega tafā’ilagi, o se sao ua matuā i faateleina lava e tauala atu i ‘upega tafa’ilagi a atunu’u eseese ua i ai nei, faatasi ai ma nisi ’upega tafa’ilagi e fesoota’i ma le ’upega tafa’ilagi o le Bahai.org. E tāua tele lenei taumafaiga, e lē gata mo le tala’iga, ae mo le puipuiga foi o le Fuata’iga. I ni nai aso ititi lava, na matua to’atele lava tagata o le lalolagi na tōsina mai e maimoa i ni faaaliga o ni matā’upu sa lelei tapenaina e uiga i le Faatuatuaga, sa faasalalauina e le ’upega tafa’ilagi o le Faamanatuga talu ai, ma sa faasalalauina lea i ni gagana se iva. Ua faalauteleina atili le tele o itulau o ‘upega tafa’ilagi a atunu’u ta’itasi ma ua faaailoa mai ai le felanulanua’i o nei faamanatuga Bahaí ‘ese’ese. Ua tele le tapenaga e faalauiloa atu ai se itulau o ‘upega tafa’ilagi e maua ai faamaumauga mo le Faatuatuaga (Baha’i Reference Library Site) ma o le a mafai ai ona faasalalauina ni tusitusiga e le’i faaliliuina muamua ma ni tapeleti ma Tusitusiga Paia o le a tu’uina atu i luga o lenei ‘upega tafa’ilagi i le lumana’i. O le a faasalalauina atu ai foi ma nisi o Tusitusiga a Baha’u’llah ma Abdul Baha o lea faato’ā faaliliuina i le gagana fa’a-Peretania.

8. E faato’ā uma atu talu ai nei ‘ona faaulufaleina ni Maota Tapua’i i Santiago i Chile, ma Battambang i Cambodia, ma ua avea nei ma nofoaga e tosina atu i ai tagata, ma o ni faailo mo o latou tagata le tāua o le Faatuatuaga. Ma o le a fa’ato’ateleina pea. Ua faafiafiaina foí i matou e faalauiloa atu le faaulufaleina o le Maota Tapua’i i Norte del Cauca i Colombia, ia Iulai. E le o toe mamao foi i le lumana’i ae amata fauina nisi Maota

Tapua’i. O loo faatalatalanoaina nei mo se faatagaga o le amataga o le fauina o le Maota Tapua’I i Vanuatu. I Initia ma Congo, ua maua nei ni fanua i le mae’a ai o ni fefa’asoaina fitā. O se agaga fiafia tele ina ua maua mai le ata o le ulua’i Maota Tapua’i Tau Atunu’u i Papua Niukini, soso’o mai ai ma le ata foi o le Maota Tapua’i Tau Atunu’u o Kenya. O le tu’ufa’atasiga o otootoga mai tusitusiga mo Maota Tapuai’ (Mashriqu’l-Adhkar) sa saunia e la tatou Matagaluega mo Su’esu’ega, ma sa faasoaina atu talu ai nei, matou te naunauta’i tele o le a faateleina atili ai le malamalama o uo i le tāua tele o tapua’iga i le soifuaga fa’afaalapotopotoga. Auā o galuega faatōina, aemaise ai lava mafutaga tatalo faifaipea, o loo fauina ai e Baha’i ni faavae faale-agaga mo Maota Tapua’i mo le lumana’i.

9. Ua toe tolu nei nai tausaga o totoe o se taumafaiga o le kuata o le seneturi lea na amata mai i le 1996, sa mata’itūina ai se sini e tasi; o le siitia iloga lea o le ulufale mai faavaegaau o tagata. O le Risivani 2021, o le a amataina ai e tagata talitonu ia Baha’u’llah se fuafuaga na o le tasi le tausaga. E ui ina pu’upu’u ae matuā tāua lenei taumafaiga e tasi le tausaga, auā o le a amata ai le faasologa o Fuafuaga e fa’aooina atu le sā o le Fuata’iga i le amataga o le seneturi lona tolu o Vaitausaga Baha’i. O le faasologa la o lenei sefululua masina faapitoa, o le a faamanatuina ai e le lalolagi Baha’i le atoa o le seneturi talu ona Afioa’e AbdulBaha. O nei faamanatuga o le a aofia ai se faatasiga faapitoa i le Nofoaga Tutotonu o le Lalolagi Baha’i,ma o le a valaauina ai ni sui o Fono Faale-Agaga Tau Atunuu ma Fono Faa-Itumalo uma. Ua na o se amataga lea o le faasologa o faatasiga e saunia ai tagata talitonu mo moomiaga mo ni ta’i sefulu tausaga o lumana’i. O Ianuari o le tausaga e soso’o ai, o le a atoa ai le selau tausaga talu ai le faitauga muamua faalaua’itele o le “Mavaega & Molimau”(Will & Testament) a le Matai. O le a faia ai se Koneferenisi i le Aai Paia e faatasi uma atu ai Konesula mai Fono a Konesula faa-Konetineta ,ma sui Konesula mo Tala’iga ma le Puipuiga. O malosiaga faale-agaga uma o le a maua mai i nei fonotaga taua e lua, e tatau ona faaooina atu i uo uma a le Atua i so’o se laueleele o aumau ai. Mo lea lava faamoemoe, i ni masina o le a soso’o ai, o le a usuia ai ni koneferenisi i le lalolagi lautele, ma o le a avea ia ma faamalosi’au i ni galuega mo le tele o tausaga e

mulimuli mai i lenei Fuafuaga e Tasi le Tausaga.

10. O lea la, ua lalata mai le amataga o se faasologa fou o le Fuafuaga Paia a le Matai. Peita’i o loo i ai se vaaiga faafiafia loto lea ua lalata mai. O le Faamanatuga lea o le luaselau tausaga talu ona Soifua mai le Bab, lea ua toe tasi ma le afa tausaga ona tatou aulia lea. O le vaitaimi lenei tatou te toe tomanatu ai i le mata’utia o le toa o le Teuteu-ala-sa-Faamaturo ona o la tatou Faatuatuaga, ma o Lana folafolaga uiga ese lea sa amataina ai se vaitausaga fou i le tala faasolopito o le lalolagi. E ui lava e lua seneturi e va ai lea taimi ma le tatou taimi nei, ae o le tulaga o tagata i le vaitaimi o soifua mai le Bab e tai foliga tutusa ma le tulaga o tagata o le lalolagi o loo tatou i ai nei, i le lagona taotaomia lea o agaga, ma le naunau o le to’atele ia maua ni tali e faamalieina ai le galala o agaga e fia malamalama. A mafaufau atu i le tāua tele o le faamanatuga o lenei luaselau tausaga, ua matou talitonu ai o nei faamanatuga e tūmatila lava le uiga ese. Ui i lea, e matou te iloa o le faamanatuga o le a faia, ia le itiiti ifo lona fa’atamaoaigaina ma lona fa’aatoatoaga ma le faamanatuga ua mavae atu nei. O se faatasiga o le a faatalitali uma i ai ma agaga naunauta’i faalapotopotoga uma, aiga ma agaga ta’ito’atasi.

11. O ia masina o lo’o lumana’i nei, o se vaitaimi foi lea e tatau ona tatou manatuaina ai soifua ma le loto tetele o so’o o le Bab – o le faatuatua o ia toa manumanu tama’ita’i ma alii, e le ma faatusalia, ma o ā latou galuega faatōina o ni pale ia o le tala fa’asolopito o le Fuata’iga. O o latou loto totoa, lo latou faatōina, ma lo latou tūtūmau tau lava o le Atua, ua maofa ai tagata uma ua iloa la latou taumafaiga. E matuā ofoofogia fo’i le itiiti tele o tausaga o le to’atele o nei toa pei o ni leona, o le ala lea, o le a lē mafai ai ona fa’agaloina ia talavou i talafaasolopito. Ia avea faata’ita’iga a nei toa ma faalaei’au i le Faatuatuaga atoa i taimi o muamua nei – aemaise lava i talavou ia ua toe valaauina nei e fai ma ta’imuaga o le gaoioiga taula’i mo le liuaina o le lalolagi.

12. O lea la, lo matou faamoemoega pupula, pupula tele lenei. O le ono o ta’availiga i le va o lenei Risivani ma le Fa’amanatuga o le Luaselau Tausaga o lo’o loloma nei – o tausaga fo’i lava ia e tolu o loo totoe o lenei Fuafuaga – ia avea le alofa lē fa’atusalia, le Alofa Silisili lea sa fa’atotoaina ai so’o o le Bab i le tatala mai o le malamalama faaleagaga, ia faaosofiaina ai outou ia faia ni galuega tetele. O la matou faatoga i Loa Paia, ia avea outou ma ē mauvaega mai i fesoasoani fa’ale-lagi.

A’o taulalata mai le Fa’amanatuga Aupito Silisili, ua matua faagaeetia i matou i lagona o le loto fa’afetai ma le naunauta’i - loto fa’afetai mo faiga ofoofogia ua tuuina mai e Bahá’u’lláh ina ia ausia, ma le pulunaunau atu i mea o lo’o folafolaina mai i vaitaimi e le o toe mamao atu i le lumana’i.

O le malosiaga sa maua mai i faamanatuga aoao o Faamanatuga sautualua o le Soifua mai o Bahá’u’lláh ua faatuputupulaia talu mai ia taimi. O le telelise o le atinaeina o le fa’alapotopotoga Bahá’í, o lona malosiaga manu ae, ma lona mafai e faaaogaina ai malosiaga o le toatele o ona sui auai o loo faatamaoaiga mai pea mai se aotelega o ana faa’aega lata mai faalekelope. Ona o nei vaega, ua tulaga ese/tumatila mai ai lava se siitaga, aemaise lava i gaioiga mo le atina’e faa – fa’alapotopotoga. O le Fuafuaga Lima Tausaga sosoo mai ai ma le luasefulu tausaga o ni taumafaiga a le lalolagi Bahá’í e fetuuna’i i se faiga faatulaga lelei ma faateleina nei gaioiga – peitai o se tulaga ese, ona e oo mai i totonu o le uluai lua tausaga ma le afa o le Fuafuaga, ua silia ma le afa le aofaiga o gaioiga tetele lava latou. Ua fa’aalia e le fa’alapotopotoga aoao le malosiaga e auai ai, i soo se taimi lava e tuuina mai ai, le silia ma le miliona o tagata i totonu o nei gaioiga, ma mafai ona fesoasoani atu iai latou ina ia sailiili ma tali atu i uiga loloto moni o mataupu faaleagaga. I totonu lava o lenei vaitaimi sa’asa’a, na toetoe lava a faaluaina le aofaiga o fa’atasiga mo talotaloga – se tali atu ua matua mana’omia tele mo le faatupulaia o le sese ese mai o tagata soifua mai le Pogai o le mautinoa ma faamanuiaga. O lenei atina’e, o loo iai se folafolaga faapitoa, aua o mafutaga tatalo latou te puaina atu se agaga fou i totonu o le ola o le fa’alapotopotoga. O le vaavaalua ai pea ma taumafaiga faaleaoaoga mo vaitausaga uma, ua fa’amalosia ai le sini taualoa o nei taumafaiga: ina ia faafaileleina ni fa’alapotopotoga e tulaga ese mai i lo latou tapuai atu i le Atua ma a latou auaunaga i tagata soifua. E leai se isi nofoaga o iloa gofie ai lenei tulaga maualuga vagana ai totonu o kalasa lea o loo mafai pea ona faatumauina ai i faiga faatulaga lelei aofaiga tetele o tagata o loo auai i gaioiga Baha’i ma ua maea ausia ai e uo le maamaila lona tolu o le atinaeina o a latou fa’alapotopotoga. Ua faagaeetia i matou i le vaai atu i le aofaiga o kalasa ua siitia maualuga ai le faagaioiga o le ola tuputupuae ua leva ona sili atu ma le faaluaina talu ona amata mai le Fuafuaga, ma o lea ua tula’i mai ai nei tusa ma le lima selau kalasa

O lenei iloiloga puupuu e le’o mafai ona amiotonu pe a faatusatusa atu i le fua maualuga o le feliuaiga o loo faagasolo nei. O le vaaiga lata mai mo tausaga e lua o loo totoe o le Fuafuaga e faafiafia loto. E tele se galuega ua mafai ona ausia i totonu o le tausaga ua mavae atu e ala i le faasoaina faalautele atu o lesona/aoaoga mai polokalame o le ola tuputupuae malolosi atu, i totonu o kalasa, pei ona matou fa’amoemoe iai, lea ua avea ma faatanoa o le poto ma meafaigaluega. E le o toe mafai ona toe taofia mai le Maota Tutotonu Faavaomalo mo Talaiga, o Konesula, ma a latou fesoasoani faatoina mai le mautinoa o loo faamanuiaina uma uo i totonu o vaega uma o le lalolagi mai lenei siitiaga i aoaoga ma faata’ita’ia aoaoga loloto o loo mafai ona maua i totonu o latou olaga moni. Ua faafiafiaina i matou i le vaai atu i le manu ae o vaega laiti o uo mai se vaega tele o kalasa ma totonu o tuaoi ma nuu o loo iai, lea ua avea gaioiga ma tomanatunatuga ua maua ai vaega o loo moomia, aemaise lava i ni itu faatauaina, ina ia mafai pea ona auiluma le faagaioiga o le ola tuputupuae i totonu o latou siosiomaga. O loo latou faaaogaina le mana faaupegaina o polokalame faaleaoaoga, lea e ala mai ai malosiaga e saofaga atu ai i le auiluma o le ola lelei faaleagaga ma faaletino o le fa’alapotopotoga, ma a o latou galulue ai, o loo faapena foi ona siitia aofaiga o i latou o loo latou galulue faatasi. O le tulaga masani lava, e eseese lava faiga mai lea nofoaga i lea nofoaga faapei lava foi o uiga fa’aalia o le ola tuputupuae. Peitai, ona o le faaaogaina o faiga faatulaga lelei, e mafai ai e soo se tagata ona faia soo se sao taua mo le galuega o loo faatinoina. I soo se faataatiaga lava, o loo iai lava le olioli faamamaina i le auai atu o isi agaga i totonu o talanoaga anoa ma faaosofia lea e o’o atu ai i le u’unaiaina o lagona faaleagaga. O le atili ona susulu o aloiafi o loo faamuina i totonu o le loto o le tagata talitonu, o le tele atu foi lena o malosiaga o le tosina mai o loo lagonaina e i latou o loo latalata atu i lona mafanafana. Ma o se loto ua faamuina i le alofa mo Bahá’u’lláh, o le a ea la se isi galuega e mafai ona toe sili atu i se vaaiga nai lo le saili atu o agaga ua tosina mai, faalaeiauina latou ao ulufale atu i ala mo auaunga, ma tautoaluaina latou ao mauaina o latou agavaa – poo le olioli aupito silisili o nei mea uma – le vaai atu i agaga ua mausali i lo latou faatuatua, tulai ae taitoatasi, ma fesoasoani atu i isi i lea lava folauga e tasi. O taimi faapenei o le a sili ona avea ma faamanatuga faapelepele e manatuaina pea ua mafai ona faia i lenei lalolagi le tumau.

O vaaiga moomia mo le faateleliseina o lenei gaioiga faaleagaga, ua atili faafiafiaina i le taulalata mai o faamanatuga Sautualua o le Soifua mai o le Báb. Faapei lava o le faamanatuga Sautualua ua mavae, o lenei faamanatuga o se vaitaimi e le mafaitaulia lona maualuga. Ua tuuina mai ai i Baha’i uma ni avanoa ofoofogia mo le fafaguina ae o i latou o loo siomia ai i latou i le Aso o le Atua, i Manogi sasala o le alofa faalelagi lea ua faailogaina i le vaaia ai o Faifaaaliga e lua o

Tagata Faapaiaina, o Fetu faamanuiaina ua Laua faamalamalamaina le tafa’ilagi o le lalolagi.

O le fua o galuega talafeagai mo ta’aviliga e lua o loo lumana’i ua iloa uma mai agavaa maua mai faamanatuga sautualua i le lua tausaga talu ai, ma o mea uma sa aoaoina mai lenei sauniga e ao ona faaliliuina i totonu o fuafuaga mo Aso Soifua Paia Masaga i lenei tausaga. Ao taulalata atu i le faamanatuga o le luaselau tausaga, o le a matou ofoina atu faifaipea talotaloga mo outou i totonu o Loa Paia, ma talosia ia manuia a outou taumafaiga uma o loo manatuaina ma faasilisiliina ai le Bab mo le auiluma o le Fuataiga sa Ia valoiaina.

O le latalata mai o le uluai seneturi o le Augatupulaga mo Feliuaiga e le o toe mamao, ma ua toe nei o le lua ma le afa tausaga. O le a faamaufaailogaina ai le selau tausaga o taumafaiga faamanuiaina ina ia fa’amalosia ma faalautele le faavae sa faataatia mai ona o le agaga faatoina i vaitaimi o le Augatupulaga o Toa Manumanu o le Faatuatuaga. I lea foi vaitaimi, o le a faailogaina ai e le fa’alapotopotoga Bahá’í le selau tausaga o le Afio a’e o ‘Abdu’l-Bahá, lena taimi sa faasaoloto mai ai mai noataga o lenei lalolagi ina ia faatasi atu i Lona Tama i totonu o lafitaga o mamalu faalelagi. O Ona toe sauniga lea sa faia i le aso sa sosoo mai ai, o se sauniga “faapei o se sauniga e lei mafai ona vaaia muamua e Palesitina”. I le faaiu ai o lenei sauniga, sa lagomau ai loa Lona tino i totonu o se potu o le Loa o le Báb. Peitai, sa faatatauina lava e Shoghi Effendi o lenei faiga ua mo na o se taimi le tumau. O le a mafai ona fausia se Loa paia, se faaeaea ua alagatatau ma le tulaga Silisiliese o ‘Abdu’l-Bahá, i le taimi ua talafeagai ai.

O lena taimi lenei ua oo mai. Ua poloaiina le lalolagi Bahá’í ia fausia se nofoaga o le a lagomau tumau ai i totonu nei toega fa’apaiaina. O le a Fausiaina i totonu o siosiomaga o le Togalaau o Risivani, i luga o ogaeleele sa fa’apaiaina e tulaga aao o le Pele Sili, ma o le Loa o

‘Abdu’l-Bahá o le a ta’atia tonu i le afa lio o le a tusiaina i le va o Loa Paia i totonu o ‘Akká ma Haifa. O galuega uma mo fuafuaga mo ata tusitusia o le a faasoaina atu i masina o loo mulimuli mai.

O lagona faagaeetia faasilisiliina ua faatumulia ai o tatou tagata, ao tatou faatalitali faanaunau atu i le tausaga o i luma ma mea uma o loo folafolaina mai ai. Matou te fa’amoemoe atu ia te outou uma taitoatasi – outou o loo galulue i le ofo ina atu o auaunaga mo Bahá’u’lláh, o loo gapatia ai totonu o soo se malo mo le u’unaia o le filemu – ina ia ausia lo outou vala’auina sili.

E lua ni tulaga moni o loo manua’e ua faaosofia ai i matou e faailoa atu upu nei. O le tulaga moni muamua, o le faatuputupula’ia lea o le silafia i le lalolagi atoa o aafiaga taufaamata’u ma le mata’utia o loo feavea’i solo e le faama’i pipisi o le korouna. I le tele o atunuu, e ui lava i le anoanoai o taumafaiga aoao totoa ma le maumaututu e taofiofia ai le pepesi atu o le faama’i, peita’i ua oo atu lava i le tulaga ogaoga, ma avea ai ma puapuaga mata’utia i aiga ma tagata ta’ito’atasi, ma ua matua goto atu ai le sosaiete atoa i le fememea’i. O galu malolosi o puapuaga ma faanoanoaga ua fafati atu i lea nofoaga ma lea nofoaga ma o le a oo atu ai ina faavaivaia le tele o malo eseese i vaitaimi eseese, ma auala eseese.

O le tulaga moni lona lua, lea o loo manino mai pea i aso uma, o malosiaga e tali atu ma le lȇ faavaivaia o le Lalolagi Baha'i i le taulotoa’iga o ni lu’itau e leai sona tusa i le olaga faale-mafaufau. E ma’eu lava le maoa’e o la outou tali atu. Ina ua matou tusi atu ia te outou talu ai i le Naw Ruz, na o matou naunau lava e faailoa atu uiga faagaeetia o loo faaalia e ni faalapotopotoga ua faavaatu’ia le faagasologa masani o a latou gaioiga. O tulaga uma sa mafai ona faaalia i vaiaso na sosoo mai ai, lea sa toatele uo sa tausisia ma mulimulita’ia le tele o tapu, ua matua faateleina ai lava lo matou lagona o le faamalo. O a’oa’oga mai tomai sa maua mai i isi vaega o le lalolagi ua maua ai e nisi o faalapotopotoga auala malupuipuia ma le fetalaa’i e siitia ai le silafia i tulaga manaomia faalesoifua maloloina lautele i totonu o aofaiga tetele o tagata. Sa mafai ona tuuina atu faapitoa le faamamafa mo i latou sa sili ona aafia gofie i le vairusi aemaise o faigata faaletamaoaiga ua manua’e nei ona o lona pepesi lautele atu; o taumafaiga o loo faalauiloa atu i luga o Auaunaga mo Tala Fou a le Lalolagi Baha'i, e faatatau i nei gaioiga ua na'o sina otootoga mai le anoanoai o taumafaiga o loo faagasolo nei. O nei lava tulaga o loo faaatoaatoaina e taumafaiga e su’esu’e, siitia ma faafaileleina nei uiga faaleagaga lea o loo sili ona moomia i taimi faapenei. O le tele o nei taumafaiga e ao foi ona faatinoina i totonu o aiga po o le mafutaga lilo a le tagata lava ia, ae o le a lava le tulaga e mafai ai po le faaaogaina o auala o fesootaiga, o le a faapena lava ona faafaileleina ai se agaga maualuga o le aufaatasiga i agaga uma o loo tauaveina nei taualumaga eseese. O malosiaga talafeagai eseese o loo una’ia ai le ola o faalapotopotoga, e matua taua tele mo le auiluma aoao, o le a le mafai ona toe taofiofia.

Ua faagaeetia lava o matou agaga i le vaavaai atu i le mafai ai e Fono Faaleagaga Tau Atunuu, o taitaiau finafinau a le Malamalama ona latou ta’ita’ia atu a latou faalapotopotoga ma faatulaga a latou tali atu i le fememeai. O loo lagolagoina malosi i latou e Konesula ma a latou fesoasoani e pei lava ona masani ai ona tula'i ae ma le loto toa e sisiina a’e tulaga taualoa o auaunaga alofa. Ao nofo malamalama lelei ai la i suiga e tele o taualumaga i totonu o latou atunuu, ua mae’a tapenaina e Fono Faaleagaga ni fetuuna’iga talafeagai mo le faafoeina o mataupu a le Fuataiga, aemaise lava mo le faatautaia o faiga filifiliga, i totonu o nofoaga o loo mafai ai. O loo maua lava foi e ala i fesoota’iga faifaipea, laolao e ofoina mai ai e tinopulea ma lala eseese, fautuaga poto, le faamafanafanaga maumaututu ma le faamalosiau e le muta. I le tele o faataitaiga, ua latou mafai foi ona mataituina ni autu taua o loo manua’e mai nei taualumaga o loo matala mai totonu o le sosaiete. O matou faanaunauta’iga sa faailoa atu i la matou feau o le

Naw Ruz, o lenei tofotofoga o le faatuatua o tagata soifua o le a tuuina atu ai se vaaiga sili atu e pei ona o loo molimauina. Ua amata ona su’esu’e e ta’ita’i, o le au faitofã, aemaise o le au faasalalau mataupu e faatatau i talitonuga faavae ma faamoemoega maualuluga, lea sa matua lȇ aofia lava i totonu o fefaasoaaiga lautele. E ui lava foi ua na oni ataata tauamata ua vavala mai i nei taimi, ae peita’i o loo latou taulimaina ni avanoa e ono mafai ai ona vaaia se vaitaimi o le silafia aoao.

O lo matou mafanafana i le vaavaai atu i le agaga fetalaa’i o le lalolagi Baha’i o loo faaalia ia latou lava gaioiga ua faavaatu’ia e lo matou agaga nutimomoia mo tagata soifua ona o aafiaga ogaoga o le faama'i matautia. Talofa e, e moni o loo matou iloaina le aafia faatasi ai foi o uo talitonu ma a latou aumea mamae i lenei tiga. O le nonofo valavala mai ai o uo ma aiga ona o aiaiga mo le saogalemu lautele, lea ua tausisia atoa e le toatele o tagata i le lalolagi, o le a avea ma afuaga o ni mafutaga vava mamao tumau mo nisi. I tafaoata

ta’itasi e foliga mai ai o le a tele atu nisi tiga e talitalia ao lei gagaifo le la. Avea ia folafolaga o le toe faatasia i le malo e faavavau e ofoina atu le faamafanafanaga mo i latou uma ua motusia mafutaga ma latou pele. Matou te tatalo pea mo se mapusaga o latou loto ma ia siosiomia pea e le agalelei o le Atua i latou uma ua aafia a latou a’oa’oga, tamaoaiga lautele, aiga e oo lava i le faamutaina o nai ala eseese mo le tausiga o latou soifua. Matou te tulivae faatauanau atu ia Baha'u'llah ma faatoga atu mo Ana faamanuiaga ma Lona agaalofa mo outou, aemaise i latou uma e pele ia te outou ma a outou tagata nuu uma lava.

E ui ina umi ma gaoa le ala e ao ona savalia ae matou te mautinoa atoaatoa i lo outou agaga lavatia ma lo outou finafinau malosi e uia ai pea faigata o le faigamalaga. O loo outou toina mai tuugaoa o faamoemoega, faatuatua ma le agalelei silisili e faamuamua ai pea manaoga o isi nai lo outou lava, ma mafai ai e’i latou ua tuulafoaina ona tausia faaleagaga, ia faamalieina i latou o loo faatuputupula’ia le galala mo ni tali mautu, ma ofoina atu vaega talafeagai uma mo i

latou o loo moemiti pea e galulue mo le faaleleia o le lalolagi. Mai tagata talitonu faamaoni o le Faaatoatoaga Faamanuiaina, e faapefea ea ona o tatou toe mafaufau i ni mea e itiiti ifo?

1. Ua tusiaina nei upu faaiu o se vaega aupito faagalogata i totonu o le talafaasolopito o le Fuataiga, ma ua susueina nei le isi itulau. O lenei Risivani ua faamaufaailogaina le faaiuga o se tausaga uiga ese, o se Fuafuaga Lima Tausaga, ma se faasologa atoa o Fuafuaga sa amata mai le 1996. Ua faailo mai nei se faasologa fou o Fuafuaga, faatasi ma ni folafolaga o le a avea o se sefululua masina taua tele lea o le a tomatauina le amataga o se taumafaiga iva tausaga o le a amatalia i le Risivani o le a sosoo mai. O loo tatou vaaia nei i o tatou mata se faalapotopotoga sa vave tapu’eina lona malosi ma ua lava tapena e laasia ni laasaga mao’ae i le aga’i luma. Peita’i e le tatau ona iai se faanenefu i le tele naua o le loto finafinau sa moomia ina ia ausia mai lenei tulaga aemaise le tofasaili oni tauiviga fita i luga o le ala: o lesona sa maua mai ai, o le a mamanuina le lumana’i o le faalapotopotoga, ma o taualumaga uma sa o latou aoaoina mai ai, o le a maua ai se malamalama i mea o le a oo mai.

2. O le fia sefulu o tausaga e oo atu i le 1996, sa faatamaoaigaina i a latou lava faa’aega ma vaaiga, lea e le’i taumateina le lava tapena ai o aofaiga tetele o tagata e ulufale atu i lalo o le tagavai o le Faatuatuaga. Peita’i, e ui ina faaosofiaina i aofaiga-tetele o e sa ulufale mai, ae latou te le’i aofia uma i se polosesi mautu o le ola tuputupuae lea e mafai ona faafaileleina i totonu o le tele o siosiomaga eseese. E anoanoai fesili sa fetaia’i ma faalapotopotoga, i na taimi, ae sa itiiti le tomai mo ni tali manino lelei. Sa faapefea e taumafaiga sa taulai atu mo lona faalautelega ona o faatasi ma le polosesi o le faamautuuga ma foia lu’itau faaumiumi, sa avea pea ma faasalavei i le ola tuputupuae faifaipea? Sa faapefea e tagata ta’itoatasi, tinopulea ma faalapotopotoga ona aotauina ina ia mafai ona faaliliuina aoaoga a Bahá’u’lláh i ni gaioiga? Ma sa faapefea e i latou sa tosina atu i aoaoga ona avea ma poutu galulue i totonu o se alamanuia aoao faaleagaga?

3. O lena tonu lava, i totonu o le kuata seneturi ua mavae atu, o se faalapotopotoga Bahá’í sa faitauina pea Aao o le Fuataiga a le Atua e to’atolu i lana vaegaau pito i luma i le aga atu i se Fuafuaga Fa Tausaga, sa tulaga ese mai i isi na muamua atu ona o lona taula’i atu i se sini autu e tasi: se siitiaga auiluma maoae i le polosesi o le ulufale faavaegaau. O lenei sini sa avea ma faatomuaga o le faasologa o Fuafuaga sa mulimuli mai ai. Ua loa ona malamalama le faalapotopotoga o lenei gaioiga ua le na’o le faaulufaleina mai o ni vaega tetele i totonu o le Faatuatuaga, po o le manu ae foi faafuase’i; ae e moomia iai le faalautelega ma le faamautuuga uluola, faifaipea ma televave. O lenei galuega o le a moomia ai le auai malosi o ni agaga se to’atele, ma i le 1996, sa valaauina ai loa le lalolagi Bahá’í ina ia talia le lu’itau tele faaleaoaoga o loo moomia. O lenei valaau e mo le faavaeina o se upega fesoota’i o polokalame faaleaoaoga e taula’i atu i le fausiaina o se faasologa tuputele o tagata taitoatasi ua iai agavaa talafeagai mo le faatumauina o le gaioiga o le ola tuputupua’e.

4. Sa aga atu loa uo i lenei galuega ma lo latou iloa, e ui lava i ni o latou manumalo ua tuana’i i le malae o talaiga, ae o le tulaga moni lava e tele atu nisi mea e ao ona aoaoina ai i ni agavaa e ausiaina aemaise ai lava pe faapefea ona ausiaina nei agavaa. O le tele o auala, o le a aoao mai ai lava le faalapotopotoga i faatinoga, ma lesona ua maua mai, pe a oo ina fetuuna’i, toe iloilo ma faaleleia e

ala i le faata’ita’ia i totonu o ni faatulagaga eseese mo se taimi talafeagai, ma faaiu atu ai lava i le tuufaatasia e avea ma mataupu suesue o le polokalame faaleaoaoga. Sa iloaina ai o nisi o gaioiga o se tali masani atu i manaoga faaleagaga o se aofaiga o tagata. O li’o suesuega, aoga a tamaiti, mafutaga tatalo ma kulupu o talavou tauamata lea sa mulimuli mai, sa iloga le tulaga ese mai ma avea ma totonugalemu faatauaina i nei gaioiga, ma ina ua lalagaina faatasi ma isi gaioiga, sa manu a’e ai se malosiaga e mafai ona aumaia se siitaga maualuga i le mamanu o gaioiga uluola o le olaga faalefaalapotopotoga. A’o tuputupua’e pea aofaiga o e auai i totonu o nei gaioiga autu, sa faapena lava ona faaopopo atu iai se isi alafua fou i ona sini sa sau ai. Sa avea ma faitotoa sa mafai ai e talavou, tagata matutua ma aiga mai le sosaiete lautele ona fesootai atu i le Faaaliga a Bahá’u’lláh. Sa faapena lava foi ona faaalia le faigofie ona iloiloina faiga talafeagai lelei mo le galuega o le fausiaina o faalapotopotoga i totonu o faatulagaga o “kalasa”: o se eria faalesiosiomaga e faigofie ona gafataulimaina lona faitauaofai ma e tulaga ese foi lona atinaega lautele ma faaletamaoaiga. Ua amata ona faafaileleina se agavaa mo le tapenaina o fuafuaga faigofie i le tulaga tau kalasa, ma mai nei fuafuaga, sa manu a’e ai polokalame mo le ola tuputupua’e o le Faatuatuaga, faamaopopoina i totonu o se faiga ua avea ma taaviliga tai tolu masina o gaioiga. O le manu vave ae o se itu taua tele : le faasolosolo malie atu o tagata taitoatasi i se faasologa o mataupu lea sa maua ai faaosofiaga, ma faatumauina e le una’iga atu o kalasa i se faasologa faaauau pea o le atina’ega. O lenei sootaga paleni sa fesoasoani i uo i soo se nofoaga i le iloiloina o malosiaga o le ola tuputupua’e i totonu o latou lava siosiomaga ma faataatia ai se alafua aga’i atu i le faateleina o le malosi. A’o faagasolo mai pea, sa molimauina le aoga tele o le mataituina o taualumaga i totonu o se kalasa ua le gata i se vaaiga mai gaioiga autu e tolu faaleaoaoga— auauna ai mo tamaiti, talavou tauamata, faatasi ma talavou ma tagata matutua—aemaise se vaaiga i taaviliga o gaioiga e talafeagai ma faiga faatulaga lelei o le ola tuputupua’e. I nisi o vaega mai totonu o taumafaiga luasefululima tausaga, o le tele lava o faiga sa sili ona tumatila i le polosesi o le ola tuputupua’e, o loo tatou vaaia i nei aso ua lelei ona faavaeina.

5. A’o faateteleina pea taumafaiga a uo, o aoaoga tupito eseese, o manatu autu ma faiga aoao e talafeagai lelei ma gaioiga o le ola tuputupua’e, ua amata nei ona faaalia i totonu o se auivi faavae o gaioiga lea sa mafai ona fesuisuia’i e fua i elemeni fou. O lenei auivi faavae sa faamaonia le matua taua tele i le faamatuuina atu o malosiaga tetele. Sa fesoasoani i uo i le faasafuaina atu o latou malosiaga i auala, ua faaalia i tomai le tele o le sao i le ola tuputupua’e o faalapotopotoga maloloina. Peita’i o sea ‘auivi faavae e le o se faiga tāmau. E ala i le tagatagai toto’a i elemeni eseese o le auivi pe a oo ina vailiili lelei taualumaga moni o se kalasa, se faalapotopotoga, pe na’o se nofoaga tuaoi fo’i, e mafai ona atina’eina ai se mamanu o gaioiga e fua i mea o loo aoaoina mai i le loaloa o le lalolagi Bahá’í a’o gafa pea ma tali atu i manaoga tupito o lena nofoaga. O se feteena’iga i le va o manaoga tamau i le tasi itu ma fiafiaga le gata mai tau le tagata lava ia i le isi itu, ua tuuavanoa atu ai i se malamalamaaga e sili atu ona fetu’utu’una'i i faiga eseese e mafai ai e tagata ta’ito’atasi ona lagolagoina se polosesi, o loo ogatotonu ai faiga tagatasi ma faauauina pea ona faaleleia atili a’o faateleina pea le tomai. Ia aua lava ne’i iai se masalosalo i le auiluma manuia ua faaalia mai i le manu ae o lenei auivi faavae: o aafiaga o le fegalegalea’i ma le autasi o taumafaiga a le lalolagi Bahá’í atoa ma le ‘una’iaina o lana lava savaliga agai i luma, e matua ogaoga le faatauaina.

6. E faapei lava ona faamanuiaina le tasi Fuafuaga ona o le isi, ma faapena lava fo’i ona faalautele atili atu faavae o le auai i galuega mo le fausiaina o faalapotopotoga, ma iloa gofie ai le auiluma i totonu o tu ma aga masani. Mo se faataitaiga, o le faatauaina o le aoaoina o tupulaga lalovaoa ua tele ina amanaia lautele, e faapei foi o malosiaga ofoofogia o loo aumaia faatasi ai aemaise lava i talavou tauamata. O loo faaauau pea le tatala atu o li’o o le galulue feoeoeai o agaga o loo fesoasoani ma tautoaluaina isi agaga i ala o auaunaga fai faatasi, ua avea ma alafua masani, ua taula’i uma atu iai taumafaiga mo le atina’eina o agavaa mo auaunaga moomia. E oo lava fo’i i fesootaiga faisoo a uo lava latou ma i latou o loo latou mafuta ua iai foi se suiga, ina ua siitia le malamalama e uiga i le mana o talanoaga anoa mo le faamumuina ma le tapiliina o le ola o agaga mu’amu’a. Ae faasilisiliina ai, le masani atu o le faalapotopotoga Bahá’í i le faaaogaina o se vaaiga sili ona tatala atu i fafo. Soo se agaga lava ua tali atu i le vaaiga mamao a le Faatuatuaga e mafai ona avea ma sui auai galue— e mafai fo’i ona avea ma tagata faalauiloa po o se taiala— o gaioiga faaleaoaoga, mafutaga mo tapuaiga ma isi elemeni taua o le galuega mo le fausiaina o faalapotopotoga; aua o nei agaga, o le to’atele o le a faapena lava ona faailoa lo latou talitonuga ia Bahá’u’lláh. O lona taunuuga, o le manu ae ai o le amataga o se gaioiga o le ulufale faavaegaau lea e itiiti sona faalagolagomaga i manatu faafilosofia ma manatu feteena’i ae mafuli atu i agavaa moni i auala e mafai ai ona maua e ni aofaiga tetele o tagata le Faatuatuaga, faamasani atili atu iai, iloa ona faamoemoega, auai faatasi atu i ana gaioiga fai ma felafolafoaiga, ma taliaina loa e faapei lava i le tele o faataitaiga o loo tutupu mai. E mautinoa lava, a’o faamalosia pea gaioiga o polokalame faaleaoaoga i totonu o lea itumalo ma lea itumalo o le a siitia foi aofaiga o tagata taitoatasi o loo lagolagoina galuega fai a le Faatuatuaga ma faalautele atu ai i ni aofaiga tetele tainane i latou faatoa amata faamasani atu i le Faatuatuaga. Ae o lenei faiga e le’i unaia e na’o sina naunautaiga mo ni fuainumera. O le vaavaalua o se vaaiga mamao mo feliuaiga faaletagata lava ia ma feliuaiga fau faatasi, sa mauaina mai le sailiili atu i Afioga a le Atua ma le talisapaia o agavaa o tagata ta’itasi ina ia avea ma poutu malosi i totonu o se gaioiga faaleagaga iloga, lea sa mafua ai le manu a’e o se lagona autasi mo taumafaiga fai faatasi.

7. O se tasi o uiga aupito i tulagaese ma le faafiafia loto o lenei vaitaimi umi e luasefululima tausaga, o auaunaga ia sa faia e talavou Bahá’í, o e sa taupati atu ma le faatuatua ma le loto toa i a latou lava matafaioi tausi e taulamua ai i taumafaiga a faalapotopotoga. O talavou mai konetineta e

lima sa tau fai tutula’i ae e tautua a latou faalapotopotoga ma le faatoina ma le loto fuatiaifo - e avea ma faiaoga o le Fuataiga e aoaoina tupulaga lalovaoa, o ta’iala feasiasiai ma ta’iala i fanua, o faatonu o kalasa ma sui o lala Bahá’í, O le faamatuaina sa o latou faaalia, i le faamatuuina atu o latou tiute lea sa faamoemoe iai le auiluma o le Fuafuaga Faaleatua, sa matua faaalia ona o o latou malosiaga faaleagaga ma lo latou naunautaiga mo le puipuiga o le lumana’i o tagata soifua. Ona o le amanaia tele o lenei faamatuaina ua molimauina, o lea ua matou manatu ai, i le mae’a ai o lenei Risivani, talu ai o loo tumau pea i le luasefulutasi tausaga e mafai ai e se tagata talitonu ona aloaia e auauna i Fono Faaleagaga, o lea ua tuu ifo ai i lalo i le sefuluvalu tausaga, ona mafai lea ona saofaga atu se tagata talitonu i faiga filifiliga Bahá’í. Matou te le taumateina o le a mafai e soo se Bahá’í talavou i le matua ua faatulagaina i soo se nofoaga ona faamaonia lo matou faatuatuaga i o latou malosiaga e faataunuu ai ma le “faamaoni ma le filifiliga” le “tiute pa’ia” ua valaauina iai soo se tagata palota Bahá’í. *

8. O loo matou malamalama lava i le eseesega tele o taualumaga moni o faalapotopotoga, e pei ona masani ai. E eseese uma lava faalapotopotoga tau atunuu, ma e eseese uma foi nofoaga i totonu o nei faalapotopotoga, e eseese uma foi vaega o atina’e sa amata mai ai i totonu o lenei faasologa o Fuafuaga; talu mai lena taimi, sa eseese foi le saoasaoa o a latou atia’ega ma ausia ai le auiluma manuia i laasaga eseese. Ma o lenei la tulaga, e le o se mea fou. Sa sau mai lava i le amataga le eseesega o taualumaga i totonu o nofoaga, faapena fo’i le maualuga o le agaga fiafia mai o loo maua mai ai. Peitai, ua tatou vaaia foi le tai o’o’o’o, i le siitiaina o malosiaga, loto toa ma le tomai faatuputupula’ia o le tele o faalapotopotoga ma faatumauina e ala i ausiaga a o latou uso a faalapotopotoga taulalata mai ma taumamao atu. E fai ma faataitaiga, a’o tutulai a’e ni agaga e tatala aloa’ia se faalapotopotoga i le 1996, sa matua leai se mea e faaitiitia lo latou agaga lototele, faatuatua ma le faatoina, lea ua tuufaatasia i nei aso e o latou uso-a-galulue i soo se nofoaga, nei lava uiga faatasi ai ma le malamalamaaga, manatu loloto ma agavaa i se tuufaatasiga faatuputupula’ia o taumafaiga mai le luasefululima tausaga a le lalolagi Bahá’í e faatulaga ma faaleleia atili ai galuega o le faalautelega ma le faamautuuga.

9. Poo le a lava la se tulaga amata mai o se faalapotopotoga, ua mafai lava ona ia unaia le gaioiga o le ola tuputupua’e pe a aofia uma iai uiga o le faatuatua, tutumau ma le faamaoni faatasi ai ma se naunauta’iga e fia a’oa’oina. O le mea moni, o se pine faamau faapelepele o lenei faasologa o Fuafuaga o le talisapaia lautele lea, mo soo se taumafaiga lava ina ia auiluma, e amata lava i le faamasani atu i le ola fia-a’o’aoina. O le faigofie o lenei ta’iala o loo ta’oto mai ai aafiaga tetele o vaaiga o loo mulimuli mai ai. Matou te le masalomia, i soo se kalasa lava, i soo se taimi, o le a auiluma atu i atina’e faaauau; o faalapotopotoga sa vave ona auiluma i le 2021, e faapena foi i faalapotopotoga e tutusa taualumaga ma avanoa, ua faaalia se malosi e faafailele ai le aufaatasiga o manatu ma a’oa’o mai i aafiaga o faatinoga. Ma o lea sa faapea lava ona latou faia e aunoa ma le toe faatali ae galulue loa.

10. O se naunautaiga e fia a’oa’oina, o lona uiga o le lava tapena foi lea e feagai ma le tele o mea sese— o le mea moni i nisi o taimi, o mea sese e oo mai ai le le fiafia. Ae o tulaga masani lava, o faiga ma metotia fou, e lē lelei ona faatinoina i le taimi muamua ona o le le lava o le tomai; o nisi taimi, o se agavaa fou lava faatoa atina’eina, ua leiloa atu ona ua naunau tele atu le faalapotopotoga i le atina’eina o le isi. O le iai o le manatu mo le fia faia o mea silisili, e le faamaonia ai le leai o ni mea sese, ma o le aga’i ese mai ai, e moomia ai le loto maualalo ma le vavaeesea. Pe a oo ina faatumauina pea le filifiliga o le faalapotopotoga e faalia le onosai ma a’oa’o mai i mea sese o loo masani lava ona alia’e mai, o le a le pine lava le taunuu atu i le auiluma manuia.

11. O le ogatotonu o le faasologoga mai o Fuafuaga, o le auai atu o le faalapotopotoga i le olaga faalesosaiete sa amata ai ona avea ma faamamafa o se sootaga e sili atu ona tuusa’o. Sa unaia tagata talitonu e manatunatu i lenei vaaiga i ni vaega fesoota’i se lua o taumafaiga—gaioiga lautele ma le auai atu i soalaupulega o mataupu masani a le sosaiete. O le mea moni, o nei vaega e le suitulaga i

gaioiga faalautele ma faamautu, ma e le ese mai ai foi: o nei vaega sa aumai ai lava i totonu o nei gaioiga. O le to’atele lava o tagata faigaluega a se faalapotopotoga e mafai ona auai atu iai, o le tele foi lena o lona malosiaga e aumaia le tofa faaleatua o loo i totonu o le Faaaliga a Bahá’u’lláh e tali atu i lu’itau o nei aso —ina ia faaliliuina ai Ana aoaoga i galuega ma gaioiga vaaia. Ma o mataupu faasalavei uma a le lalolagi o tagata soifua mai lena vaitaimi umi sa iloa ai lona matua manaomia tele o le fofo o loo tuuina mai e le Foma’i Faapaiaina. O loo faaalia mai ai nei mea uma le amataga mai o tapuaiga, e ese mai i e o loo umia le pule i le lalolagi lautele: se amataga o loo taliaina ai tapuaiga o se malosiaga o loo faataavilia se soifuaga auiluma faifaipea. Sa manino mai foi o lenei soifuaga auiluma faifaipea o le a le mafai ona oo mai faafuase’i, na o ia lava—o le misiona tonu lena a soo o Bahá’u’lláh ina ia galulue punoua’i mo lona manu ae. O lenei misiona sa moomia iai le faaaogaina o le polosesi lava e tasi o le a’oa’oina faifaipea i gaioiga lautele ma le auai atu i soalaupulega o mataupu lautele.

12. O se vaaiga mai le luasefulu ma le lima tausaga talu ai, le siitia maoae ai o malosiaga mo le faatinoina o gaioiga lautele, ma oo atu ai i le fua mai o gaioiga. A faatusatusa atu i le 1996, i le tau faatumauina o le 250 o nisi o atinae mo le soifuaga ma tamaoaiga lautele mai lea tausaga i lea tausaga, lea ua iai nei tusa ma le 1,500, ma le faafaina o le aofaiga o le siitaga o faalapotopotoga e faavae mai aoaoga Bahá’í e sili mamao atu i le 160. E silia i le 70,000 taumafaiga o gaioiga mo soifuaga lautele i totonu o nofoaga e faatinoina mo ni taimi pupuu i tausaga taitasi, se siitaga ua faa lima-sefuluina. E fiafia lava e tilotilo atu i le faatuputupulaia a’e pea o nei taumafaiga uma ona o le lagolago faatoina ma faaosofiaga ua tuuina mai nei e le Faalapotopotoga Faavaomalo mo Atina’e Bahá’í. O le taimi nei, ua matua faatuputupula’ia foi le auai o Bahá’í i soalaupulega o mataupu a le sosaiete. E ese mai le tele o avanoa ua mafai ai e uo ona ofoina atu ni manatu Baha’i i totonu o talanoaga i fale faigaluega poo fesootaiga lava faaletagata, ae ua matua siitia lava foi le auai aloaia atu i totonu o soalaupulega o mataupu lautele. Ua le gata i lo matou manatuaina o le faalautelega maoa’e o taumafaiga ma le siitaga maualuga o sao faapupulaina a le Faalapotopotoga Bahá’í Faavaomalo — lea ua faaopopoina ai i totonu o nei tausaga Ofisa i Aferika, Asia ma Europa— aemaise foi o faaosofiaga mai siitiaga maualuluga o faiga faa- paaga a Ofisa Tau atunuu mo le Va-i- Fafo, lea o loo avea pea lea vaega o taumafaiga ma manulauti; ma e faaopopo atu foi i le sao anoa ma le taualoa sa faia e tagata talitonu taitoatasi mo auaunaga faapitoa. O nei mea uma e toe talatalaina uma mai ai le maoa’e, amanaia ma le faaeaea sa faaalia pea lava pea e le aufaitofā ma isi tagata taualoa i soo se tafa lava o le sosaiete mo le Faatuatuaga, o ona tagata talitonu ma a latou gaioiga.

13. I le iloiloga atoa la o lenei luasefululima tausaga, ua matou maofa tele ai i le lasi o faaeaga eseese ua faia e le lalolagi Bahá’í i totonu o nei lava tausaga. Ua totogo a’e lona ola faalemafaufau, e pei ona faaalia mai, ua le gata i ana matati’a ausia i totonu o vaipanoa uma o taumafaiga ua maea talatalaina atu, aemaise foi o le tele o tusitusiga maoa’e ma le taualoa ua lomiaina e tusitala Bahá’í, o le atinaeina o avanoa mo le suesuega o mataupu faapitoa e tusa ma aoaoga, ma aafiaga maua mai semina tau amata ma maualuluga atu o loo ofoina mai se faiga faatulaga lelei e le Polokalame mo Suesuega i Soifuaga o tamaoaiga Aoao tetele, lea e galulue vaavaalua ai ma tinopulea a le Fuataiga, lea o loo tautuaina talavou Bahá’í mai le silia ma le 100 atunuu. O taumafaiga uma e fausia ai Maota Tapuai sa maitauina le vave ona auiluma. Ua fausiaina le Maota Tapuai Faatina mulimuli i Santiago,

Chile, faatasi ai ma le amatalia o atina’e mo le fausiaina o Mashriqu’l-Adhkár tau atunuu e lua ma tau nuu e lima; o Maota Tapuai i totonu o Battambang, Cambodia, ma Norte del Cauca i Colombia, lea ua maea tatalaina atu o latou faitoto’a. O Maota Tapuai Bahá’í uma lava, tusa pe faatoa faaulufaleina poo ua leva foi ona fausiaina, o loo tuputupu a’e pea o latou tulaga ma avea ma fatu o le ola o faalapotopotoga. O le lagolagosua faaletino sa ofoina mai e le anoanoai o tagata talitonu mo taumafaiga faatoina o loo faatinoina e uo a le Atua sa matua fesoasoani tele. Se vaaiga ua maitauina o se fua faaleagaga o malosiaga autasi, le agaga foai ma le faatoina, e oo mai lava i taimi faigata o fevesiaiga faa-le-tamaoaiga, ae o loo faatumauina pea taualumaga o fo’ai—se malosi toe faafoisia e ao ona faailoa atu. I mataupu faataupulega Bahá’í, ua matua siitiaina ai malosiaga o Fono Faaleagaga Tau Atunuu i le faafoeina o mataupu a latou lava faalapotopotoga i vaega lavelave uma o le ola tuputupu ae. Ua faamanuiaina faapitoa i latou mai faaaega maualuluga fou o le galulue soosootauau ai ma Konesula, o e sa matua fesoaosani malosi tele i le faatulagaga o le aoaoina mai lea o manogi o le lolo mai faalapotopotoga o le lalolagi ma mautinoa o loo faasoaina lautele atu. O le vaitaimi tonu foi lea sa manu ae ai Fono Faaitumalo Bahá’í o se tinopulea aloaia galue a le Fuataiga, ma i totonu o le 230 o itumalo ua iai nei, ua molimauina ai lo latou sao taua tele mo le siitia a’e o gaioiga mo le ola tuputupuae mai fono ma polokalame faaleaoaoga o loo latou gafataulimaina. Ina ia faalauteleina atu i le lumana’i matafaioi tausi a le Tausi Mavaega Sili o le Ḥuqúqu’lláh, le Aao o le Fuataiga a le Atua ia ‘Alí-Muḥammad Varqá, le Fono Faatonu a Tausi Mavaega o le Ḥuqúqu’lláh lea sa faavaeina i le 2005; lea e oo mai le asō o loo faatulagaina mai taumafaiga i le lē itiiti ifo ma le 33 Fono Faatonu tau Atunuu ma faa-Itumalo o Tausi Mavaega lea ua faasopolia ai le kelope, ma limataita’ina ai galuega a le silia ma le 1,000 Sui tofiaina. E tele naua foi atina’e o loo faagasolo pea i le Laumua o le Lalolagi Bahá’í i totonu o lenei lava foi vaitaimi: sa molimauina le faamaeaina o Alafaafasitepu o le Loa o le Báb ma fale tetele e lua i luga o le Afa li’o ma le amatalia o le fausiaina o le Loa o ‘Abdu’lBahá, ae lē nāmalelaina ai foi le tele o atinae mo le faamalosia ma le faatumauina o Nofoaga Paia faapelepele a le Faatuatuaga. O le Loa o Bahá’u’lláh ma le Loa o le Báb sa lauiloa o ni Mataaga Taualoa i le Lalolagi, ni nofoaga e faasilisiliina ma aoaotetele mo tagata soifua. Sa lolofi atu le ta’i selau o afe o tagata lautele i nei nofoaga pa’ia, ma taulalata atu ai i le tasi ma le afa miliona i nisi o tausaga, ma le fia selau o tagata malaga asiasi atu i se taimi se tasi e faafeiloaia e le Laumua o le Lalolagi, ma o nisi o taimi e oo atu ai lava i le silia ma le 5,000 I le tausaga, faatasi ai ma se aofaiga tutusa o malo asiasi Bahá’í; matua faafiafiaina ai lava i matou i aofaiga faatupulaia e faapei foi ona faafiafiaina aofaiga tetele o tagata ma malo eseese o i latou sa mauvaega i faamanuiaga o malaga asiasi tapuai mai. Ua maoae foi le siitiaina o faaliliuga, lomiga ma le fefaasoaaiga o Tusitusiga Paia, lea o loo o gatasi lava ma le atina’eina o le Faletusi mo Tusitusiga faavae Bahá’í, se tasi o sui iloga o le aiga uluola o upega tafailagi o loo vaavaalua ma le upega o faamatalaga i luga o le Bahai.org lea ua mafai nei ona faagaioia i gagana e sefulu. Ua faavaeina nei le tele o ofisa ma lala, ma o loo i totonu o le Laumua o le Lalolagi Baha’i ma isi nofoaga, ma ua nofo sauni mo le lagolagoina o faatulagaga o gaioiga o aoaoga o loo fofolaina mai pea, mai le anoanoai o taumafaiga i le loaloa o le lalolagi Bahá’i. O nei mea uma, nai o matou tuafafine ma uso e i le faatuatuaga, ua na’o sina vaega o le tala tu’u ua mafai ona matou manatuaina mai o lo outou faatoina atu ia te Ia o Le sa avea ma Tagata Ta’useseina o le Lalolagi. Matou te mafai, ae ua na o le toe faaleo atu o upu faamomoiloto a le Matai ina ua ulufiaina e lagona o le fiafia, sa Ia tagi leotele atu ai: “E Bahá’u’lláh e! O le a ea le mea ua faia e Lau afio?” *

14. Mai le faasologa o ata vaaia o se kuata seneturi iloga, ua tuuina atu nei la matou vaaiga taula’i i le Fuafuaga Lima Tausaga o loo taufaaiu nei, se Fuafuaga ese mai i le tele o auala mai fuafuaga sa muamua atu. I lenei Fuafuaga, ua matou tuutuulaau tumanu atu ai i Bahá’í o le lalolagi ina ia galueaina loa mea uma sa aoaoina mai tausaga e luasefululima ua te’a atu ma faaaogaina lelei i se mafai atoatoa. Ua faagaeetia lava i matou ona ua sili atu ona faamalieina o matou faamoemoega i lenei vaega, ae o le a faanaunau atu foi lava pea i isi mea sili atu mai soo o le Matagofie Faamanuiaina, ni foliga o mea sa ausiaina ona o a latou taumafaiga iloga sa matua sili ona maoa’e, sa avea ma faatumutumuga o se matati’a a’ea mo le luasefululima tausaga o lona galueaina.

15. O lenei Fuafuaga sa sili ona tofatuina ona sa vaetolu tutusa lelei e ni faamanatuga pa’ia se lua, lea sa sa mafai e faamanatuga ta’itasi ona faaosofiaina faalapotopotoga i fanua i totonu o le loaloa o le lalolagi. Sa mafai ona faaalia mai e ‘au a le faamaoni, i le matua toafimalie, se alafua e le’i mafai ona molimauina muamua, o se malosiaga sa auai atu uma iai tagata mai vaipanoa uma o le sosaiete i le faamanatuina o le soifua o se Faifaaliga a le Atua. Sa avea lea ma faailoilo malosi o se mea sili atu: se agavaa e faaui atu ai le faamatuuina atu o malosiaga faaleagaga maoae mo le siitiaina o le Fuataiga. Maeu le maoae o le tali mai sa mafai ai ona faaea a’e mai le faaleiloga i totonu o atunuu le tele o nofoaga o le Faatuatuaga. I totonu o nofoaga sa le mafaufauina, pe le’i iloa foi, ae sa iloa gofie ai lava le agaga talitali mai i le Faatuatuaga. E faitau afe ma afe ma afe sa momolina mai lo latou naunautai faatasi ma ni agaga faatoina lea ua avea nei ma foliga vaaia o faalapotopotoga Bahá’í i soo se mea. O se vaaiga mamao o ni ausiaga e ono tutupu mai e ala i le faamamaluina o se Aso Pa’ia Bahá’í sa iloga ona salalau mamao atu.

16. O ausiaga o le Fuafuaga i ni na’o ni faamatalaga faa fuainumera, sa vave ona a’ea ai fuainumera o Fuafuaga uma na muamua atu talu mai le 1996. I le amataga mai o lenei Fuafuaga, o malosiaga sa iai mo le faatautaia o le na o le silia ma le 100,000 o gaioiga autu i se taimi faatatauina, se malosiaga maua mai o ni fua vaaia o taumafaiga aoao tetele o se luasefulu tausaga. O le taimi nei, ua faatumauina uma i le taimi e tasi gaioiga autu e 300,000. O le auai i totonu o nei gaioiga ua siitia ane i luga atu o le lua miliona, lea foi ua taulalata atu lava ina faatoluina e siitia ai. E 329 polokalame faaleaoaoga tau atunuu ma faaitumalo o loo galulue, ma o latou malosiaga o loo molimauina mai le tusa ma le tolukuata o le miliona o tagata ua mafai nei ona maea se tusi se tasi o le faasologa; i le aotelega, o le aofaiga o mataupu ua maea suesueina e tagata taitoatasi ua tula’i mai nei foi i le lua miliona— se siitaga tele ua silia ma le vaetolu i totonu o le lima tausaga.

17. O le malosi siitia o loo faatinoina ai polokalame mo le ola tuputupuae i le lalolagi atoa ua faamatalaina mai ai lava se tala faagaeetia loto tele. O totonu o lenei taimi faatatauina e lima tausaga, sa matou valaauina ai ina ia faateleina le ola tuputupuae i totonu o le 5,000 o soo se kalasa lava lea sa amata mai ai. O lenei fua faatatau sa avea ma faaosofiaga mo taumafaiga filifiliga i totonu o le lalolagi atoa. I le taunuuga, o le aofaiga atoa o polokalame mo le ola tuputupuae sa faaluaina ona sili atu ma o lenei ua tula’i mai ai i le tusa ma le 4,000 polokalame. O faigata sa iai i le tatalaina mai o nuu ma nofoaga tuaoi fou i le Faatuatuaga i le totonugalemu o se faafitauli faale-soifua maloloina aoao, poo le faalauteleina atu foi o gaioiga sa tauamata ina ua osofai le fa’ama’i, sa taofiofia ai se aofaiga tele atu mai le ausiaina i totonu o le tausaga faaiu o le Fuafuaga. Peitai, e tele atu nisi tala e fai atu nai lo lenei. I le amataga mai o le Fuafuaga, sa matou faamoemoe o le a siitiaina pe sili atu foi i le ta’i selau aofaiga o kalasa o loo iai uo ua aeaina maa maila lona tolu i ni atinae faaauau o le ola tuputupuae, i le mafai ai lea ona aoaoina i le taliaina aloaia o ni aofaiga tetele ia taliaina a latou gaioiga. O lena aofaiga sa tula’i mai ai le 200, lea sa salalau atu i totonu o sina 40 o atunuu. I le mavae ai o tausaga e lima, ae siitia ma le ofoofogia lenei aofaiga i le 1,000 i totonu o le lata i le 100 atunuu— se kuata o polokalame o le ola tuputupua’e mai le lalolagi ma se ausiaga ua matua sili atu na i lo matou faamoemoega. Ae peita’i e oo lava i nei fuainumera e le o faaalia mai ai tumutumu maualuluga ua aea e le faalapotopotoga. E silia ma le 30 kalasa o loo mafai ona faatumauina ai gaioiga autu lea ua silia ma le 1,000; i nisi nofoaga, a tuufaatasi, o isi foi ta’i afe, e aofia ai ma le auai o le silia ma le 20,000 o tagata i se kalasa e tasi. O se vaega tele o Fono Faaleagaga Tau Nuu ua fegai nei ma le taulimaina o le faamatuuina atu o polokalame faaleaoaoga o loo mafuli tele atu mo tamaiti ma talavou tauamata i totonu o se nuu; se tulaga moni ua amata ona vavala mai totonu o nisi o nofoaga tuaoi tu taulaga. O le faamasani atu i le Faaaliga a Bahá’u’lláh ua iloa gofie i totonu o le tele o faataitaiga, le siitia ae o tagata taitoatasi, aiga ma sootaga lautele— o le itu ua molimauina o le gasolo atu lea o aofaiga o tagata agai se nofoaga tutotonu se tasi. I nisi taimi, ua ti’ai ese feteenaiga ua āutausagā i kulupu faatautee, ma ua liua nei faavasegaga lautele ma ona vaega eseese e le malamalama o aoaoga faalelagi.

18. Ua le mafai ona taofiofi lo matou fiafia tele ona o nei auiluma faagaeetia loto. O le mana mo le fausia o sosaiete o le Faatuatuaga a Bahá’u’lláh ua faalia manino tele mai nei, ma o se faavae mautu o le a fausiaina ai le Fuafuaga Iva Tausaga o loo fotuai mai. O kalasa ua iai malosiaga iloga, faapei ona faamoemoe iai, ua avea nei ma faatanoa o le poto ma tamaoaiga mo latou tuaoi. Ae o itumalo o loo sili atu ai le fuainumera o nei kalasa ua faigofie nei ona atina’e auala e faateleina ai le ola tuputupuae mai lea kalasa i lea kalasa. Ua matou lagona e toe faailoa atu pea, e ui lava, ua taulalata mai le aoao tetele o faaaega ua iai; ae o le eseesega i le auiluma i se tasi nofoaga ma le isi o loo iai pea. Ua siitiaina nei i ni laasaga e le’i mafaufauina i tausaga e fia ua mavae malamalamaaga autasi o le faalapotopotoga e faatatau i le gaioiga o le ulufale faavaegaau ma lona mautinoa i le mafai ona faaosofia ai lenei gaioiga i lalo o soo se taualumaga. O fesili tetele sa alia’e mo se taimi faaumiumi, lea sa faaalia manino mai i le1996, ua mafai nei ona taliina ma le mautinoa e le lalolagi Bahá’í. O loo iai se augatupulaga o tagata talitonu o le a tauaveina i totonu o latou olaga atoa faamaufaailoga o le auiluma o le faalapotopotoga. Peita’i, o le alafua atoa lava o mea sa tutupu i totonu o le tele o nei kalasa lea sa tele ina salalau atu iai poutu o le aoaoina ua matua iloga ona siitia le auiluma i gaioiga o le ulufale faavaegaau e matua taua tele i vaevaega faa - talafaasolopito.

19. E toatele ua masani atu i vaevaega a le Faatama i Tausaga o le Faatuatuaga i ni epoka eseese’ le epoka lona lima o le Augatupulaga Tauatia’e lea sa amata mai le 2001. E le’i iloa tele ae sa faia foi e le Faatama ni faamatalaga faapitoa o le iai o ni epoka o Fuafuaga Faapaiaina, ma laasaga i totonu o nei lava epoka. O le taofia ai mo le luasefulu tausaga a’o tau faavaeina ma faamalosia a’e itutino tau nuu ma tau atunuu o le Tulafono Faapuleaga, sa aloaia ai loa le amatalia o le Fuafuaga Faaleatua lea sa faataoto mai e‘Abdu’l-Bahá i le 1937 i le amataga o le uluai laasaga o lona uluai epoka: lea sa auina atu ai e le Faatama le Fuafuaga Fitu Tausaga i le faalapotopotoga Bahá’í a Amerika i Matu. Sa tapunia le uluai epoka ina ua maea le Fuafuaga Sefulu Tausaga i le 1963, O laasaga amata o le epoka lona lua lea sa avea ma pogai o le totoina o le tagavai o le Faatuatuaga i le lalolagi atoa. O le amatalia o le epoka lona lua sa iai le uluai Fuafuaga Iva Tausaga, ma le le ititi ifo ma le sefulu o Fuafuaga sa sosoo mai ai i ona faaaega, o Fuafuaga sa faasolo mai mo se umi pe sefululua masina e oo atu i le fitu tausaga. I le tafaoata o lenei epoka lona lua, ae amata loa ona molimauina mai e le lalolagi Bahá’í le vavala mai o amataga o le ulufale mai totonu o le Faatuatuaga i vaegaau lea sa valoaia mamao mai e le Tusitala o le Fuafuaga Faaleatua; i le fia tausaga ua mavae atu, lea sa galulue le malolo ai tupulaga o tagata talitonu faatoina mai le faalapotopotoga a le Suafa Silisiliese mo le faafaileleina o tulaga moomia mo le faatumauina o le ola tuputupuae i aofaiga tetele. Ua tatou iai nei la i lenei vaitau faapupulaina o le Risivani, ma e maeu le tamaoaiga o le fua mai o nei galuega! O le maoae tele o aofaiga o loo faalauteleina atu ai gaioiga a le faalapotopotoga, ma tapu’eina mai ai aloiafi o le faatuatua ma tutula’i malie a’e e auauna i faatumutumuga fita o le Fuafuaga ua agai ese mai fuafuaga taumate e faavae i le faatuatua ae agai atu i tulaga moni o mea o loo tutupu. O lenei siitiaga iloga ma le mautinoa e moomia ona faamaufaailogaina i totonu o le talafaasolopito o le Fuataiga. Mai ni loto faagaeetia, matou te folafolaina atu ai le amatalia o le epoka lona tolu o le Fuafuaga Faapaiaina a le Matai. O le a faapea lava foi ona fofolaina atu mai lea laasaga i lea laasaga, mai lea epoka i lea epoka, se’ia oo ina faapupulaina uma soo se loto i le malamalama o le Malo. *

20. Uo peleina e, e le mafai ona faaiuina se iloiloga o faaaega autasi o le lima tausaga lea e faaiuina ai le epoka lona lua o le Fuafuaga Faaleatua e aunoa ma se faamatalaga faapitoa i faigata sa tautoaluaina ai lona tausaga faaiu ae sa faauau atu pea lava pea. O vavao i fesootaiga faaletagata sa alia’e ma toe mou atu i totonu o le tele o atunuu i nei vaitaimi sa tatau ona matua aafia ma motu ai taumafaiga fai faatasi a faalapotopotoga, ma e ono tele ai ni tausaga e toe faatinoina ai, ae peita’i e lua ni mafuaaga sa le mafai ai ona aliae mai lenei tulaga. O le tasi o le faasalalauina tele atu o le iloa e faatatau i le tiute o Bahá’í e auauna ai i tagata soifua, sa matua sili atu ona manaomia i taimi o puapuaga ma faigata. O le tasi, o le tulaga iloga o le manu ae o agavaa mai le lalolagi Bahá’í e tuuina ma faaalia atu lenei mafaufauga. O le masani atu i le tele o tausaga i le faaaogaina o faiga mo gaioiga faatulaga lelei, lea sa aumaia ai e uo lo latou mataala sogasoga ma lagona o faamoemoega ola e

tauaveina ai puapuaga le maalofia, a’o mautinoa pea o faiga fou ia sa o gatasi ma faiga faavae sa gapatia mai ai isi Fuafuaga ina ia faaatoatoaina. E le faapea ai la o le a galo ai faigata matautia o loo fetaiai pea ma Bahá’í, e faapei lava foi o latou soatau galulue i totonu o soo se nofoaga; ae mai le tele o nei faafitauli matautia, sa faatumauina pea le vaaiga taula’i a uo talitonu. Sa faamatuuina atu meafaigaluega i faalapotopotoga sa manaomia, sa faataunuuina pea faiga filifiliga i soo se nofoaga sa talafeagai ai, ma poo le a lava taualumaga sa iai, sa faauau pea le faataunuuina o tiute a tinopulea a le Fuataiga. Sa mafai lava ona laasia ni laasaga tetele mo le agai i luma. O le a toe faavaeina i lenei Risivani Fono Faaleagaga Tau Atunuu a São Tomé ma Príncipe, ma e lua ni poutu o le Maota Aoao o le Faamasinogatonu o le a tula’i mai: o le Fono Faaleagaga Tau Atunuu a Croatia, faatasi i lona nofoaga i totonu o Zagreb, ma le Fono Faaleagaga Tau Atunuu aTimor-Leste, i lona nofoaga i totonu o Dili.

21. Ma ua amatalia ai loa ma le Fuafuaga Tasi Tausaga. O ona sini ma manaoga ua maea tuuina atu i la matou feau sa auina atu i le Aso o le Feagaiga; ma e ui la i le saasaa o lenei Fuafuaga, ae ua lava ma totoe mo le tapenaina o le lalolagi Bahá’í mo le Fuafuaga Iva Tausaga o le a sosoo mai ai. O se vaitaimi o malosiaga faapitoa, sa tatalaina ai le selau tausaga talu ona faailoaina mai Tapeleti o le Fuafuaga Faaleatua, lea e le o toe mamao ae tapunia loa i le faamanatuina o le senetenari o le Afio a’e o ‘Abdu’l-Bahá, ma faailogaina ai le faaiuga o le uluai seneturi o le Augatupulaga Tauatia’e ma le amataga o le seneturi lona lua. Ua ulufale atu nei ‘au a le faamaoni i lenei Fuafuaga fou i taimi tonu o le iai o tagata soifua i le palaai ona o tulaga aafia gofie, ma ua iloa ai ma se manaoga mo le galulue faatasi e tali atu i nei lu’itau faalekelope. Peita’i, o le lagonaina pea o tu faatautāvā, manatu faapito, faailoga ituaiga ma mafaufauga tamau o loo faauau pea ona faasalaveia le gaioi atu aga’i le aufaatasiga, e ui i le faatuputupulaia pea o aofaiga o le sosaiete ua faaalia i upu ma galuega lo latou mafai foi ona faananau atu mo le taliaina atoatoa o le tafatasi faatatauina o tagata soifua. Matou te tatalo ina ia manumalo mai le auaiga o malo uma i le lafoesea uma o latou feeseeseaiga mo ni manaoga o le lelei aoao. E ui lava i le faamalumalu mai o le lē mautonu i masina o lumana’i, ae matou te faatoga atu ia Bahá’u’lláh ina ia avea faamautuuga sa fatumauina ai Ona tagata talitonu mo se taimi umi e faatamaoaiga ai pea outou, ina ia mafai ona outou aga atu i la outou misiona, ma outou agaga le maluelue e fesouaiga o se lalolagi ua matua faalia tino mai ona manaoga mo Lana savali faamalie agaga.

O loo ua ulufale atu nei le Fuafuaga Faaleatua i totonu o se epoka ma se laasaga fou. Ua susu’eina nei le isi itulau.

Ua faaiuina nei se tausaga o tapenaga ma tomanatunatuga, aemaise o gaioiga tetele, sa tulaga ese ona o taumafaiga a uo i le loaloa o le lalolagi mo le faamanatuina o le senetenari o le Afioa’e o ‘Abdu’l-Bahá, lea sa aofia ai le auina atu o sui usufono e auai i se faamanatuga faapitoa mo Ia i totonu o le Aai Paia. Ona o nei taumafaiga, sa mafai ona lagonaina ai e le lēmafaitaulia o agaga e le na’o Bahá’í, se faaosofiaga ona o le soifuaga o ‘Abdu’l-Bahá. O Lona gaualofa mo soo se tagata taitoatasi o le aiga o tagata soifua, o Ana galuega faa-talaiga, o Lona faalauiloaina o gaioiga mo aoaoga ma le soifua manuia lautele, o Lona sao tulaga ese i soalaupulega o mataupu lautele i Sasa’e ma Sisifo, o Lona una’iaina o atina’e e fausia ai Maota Tapuai, o Lona fofoaina a’e o ulua’i faatulagaga faataupulega Bahá’í , o Lona faafaileleina a’e o itu eseese o le ola o le faalapotopotoga – o nei vaega felagolagoma’i uma o Lona soifuaga o se ata vaaia o Lona faatoina mausalī ma le atoatoa mo le tautuaina o tagata soifua. I tua atu o le avea ai ma tagata tulaga ese o se tofā māmā ma se faautaga loloto faaleagaga, sa avea ‘Abdu’lBahá ma alavai māmā sa mafai ai ona gaioi atu i le lalolagi malosiaga sa faamatuuina mai e le Faaaliga a Bahá’u’lláh. Ina ia mafai la ona malamalama i le mana mo le fausiaina o sosaiete o loo aumaia e le Faatuatuaga, e manaomia ai ona tatou le toe vaai atu i se isi vagana ausiaga a

‘Abdu’l-Bahá i taimi o Lana misiona ma aafiaga feliua’i o ta’ita’iga na tatafe faaua mai i Lana peni. E tele naua atina’ega maoa’e ua ausiaina e le faalapotopotoga Bahá’í i nei aso—e faapei ona sa iloiloina atu i totonu o la matou feau ia te outou i le Risivani ua mavae atu — e afua ma faapogai mai gaioiga, faaiuga fai, ma ta’ita’iga a ‘Abdu’l-Bahá.

Pe le ua alagatatau ea la le ave o le faaeaea aoao a le faalapotopotoga Baháí i lo latou Faata’ita’iga Sili e faavae ai le amataga o se gaioiga tele e taula’i atu i le faamatuuina atu o le mana mo le fausiaina o sosaiete a le Faatuatuaga i ni fuataga sili atu? O vaega o taumafaiga o loo patinotonu i manaoga o le Fuafuaga Iva Tausaga ma le soloa’iga o Fuafuaga o loo faagasolo nei, o loo agai atu pea i le ausiaina o lenei sini aoao tele. Ua avea foi ma vaaiga taula’i o le silia ma le 10,000 koneferenisi o loo faagasolo i le lalolagi atoa e faailogaina ai le amataga o lenei alamanuia tele faaleagaga. O nei koneferenisi, ua famoemoe e taliaina ai aofaiga tetele o sui auai, ua le gata ina aumai faatasi ai Bahá’í, ae faapea le toatele o isi e alofa faanaunau i tagata soifua, o e o loo latou faasoaina faatasi se naunautaiga mo le faafaileleina o le aufaatasiga ma le faaleleia atili o le lalolagi. O lo latou filifiliga ma ni lagona naunautai o le faamoemoe ola o loo vaaia i totonu o agaga o loo maua mai nei faatasiga ua mae’a ona faatinoina, lea sa matua faamuina ai sui auai e faapei ona atagia i feutagaiga tulaga ese sa latou fai saofaga iai e pei ona iai le vaaiga mamao aoao tele sa iloiloina i totonu o nei faamanatuga faaosofia loto. Matou te faatalitali ma le faanaunau atu i mea o le a tutupu i masina ma tausaga o fotua’i mai.

Talu mai la matou malelega o le aso 30 o Tesema 2021 i le Koneferenisi a Konesula, sa iloiloina e Fono Faaleagaga Tau Atunuu ma Fono Faaitumalo Bahá’í ma le naunautai avanoa mo le faateleliseina o le polosesi o le ola tuputupua’e i totonu o kalasa o loo i lalo o la latou puleaga mo le faagasologa o le Fuafuaga Iva Tausaga. Ua matou lagona o le a fesoasoani tele i le faamoemoe mo le mataituina o le auiluma mai lea taimi i lea taimi, le faavasegaina ma le fofolaina mai o le Fuafuaga i laasaga e lua o le fa ma le lima tausaga, ma le valaauliaina o Fono Tau Atunuu ina ia tagataga’i i le auiluma o loo latou faamoemoe e vaaia i totonu o a latou faalapotopotoga taitasi i le Risivani 2026 faapea ai ma le Risivani 2031. O lenei gaioiga sa aofia ai foi ma se toe iloiloga o tuaoi o kalasa, ma o le taunuuga o nei fesuia’iga lea ua siitia ai i le kuata le aofaiga atoa o kalasa i totonu o le lalolagi ma ua tulai mai ai i le silia ma le 22,000 kalasa. I le tilotilo atu e tusa ai ma vaaiga mamao ua taulimaina, e faamoemoe e oo atu i le faaiuga o le Fuafuaga, o le a iai se polokalame o le ola tuputupuae i totonu o le 14,000 o nei kalasa. Mai lenei aofaiga, o le fuainumera o kalasa e ono faitauina ai polokalame o le ola tuputupua’e i se tulaga malosi ma le telelise o loo faamoemoe e oo atu i le 11,000, i lea lava taimi. Ma e mai nei lava kalasa, ua faamoemoe e pasia le maamaila lona tolu, o le a siitia i luga a’e o le 5,000 i le 2031. E le tau fesiligia, le avea ai o nei fuataga maoa’e ma ala o le a moomia ai se taumafaiga tele ma le maoae i le taimi atoa o faagasolo ai lenei Fuafuaga. Peitai ua matou iloa o ni faamoemoega ua alagatatau ma aoga e moomia ai le taumafai filifiliga, aua o loo latou aumaia se iloiloga naunautai ma le moni o mea e mafai ona ausiaina.

O loo atagia mai i nei taumafaiga se mea moni. O nei sini e le’i mafai ona iloa tino mai pe ana le mafai e tinopulea ma tinofaafoe ona tuputupu malolosi ae, ma faauuina latou e ni malosiaga iloga ma maualuluga e faafoeina ai mataupu a se faalapotopotoga o loo faatuputupulaia vave pea ana gaioiga, ma taliaina aofaiga tetele o ituaiga o agaga. E le mafai ona magafagafaina lenei faamoemoe mo le ola tutupua’e pe ana le seanoa le iai o se naunautaiga e aoao pea – e faatino, e tomanatu, e tapu’e iloiloga loloto o le malamalama, ma taliaina aoaoga loloto o loo manu ae mai isi nofoaga – lea ua faafaileleina i soo se vaega ma soo se tulaga ma faasafua atu i le muaiaa o le faalapotopotoga. Ma o taumafaiga foi ua faaalia mai nei fuafuaga mamao o le a faafaigata ona faataunuu pe ana faapea e le faatuputupulaia le iloatino mai o se faiga faatulaga lelei faifaipea mo galuega faa-talaiga ma le atinaeina o tagata faigaluega mai totonu o le lalolagi Bahá’í. O nei taumafaiga uma ua aumaia i le faalapotopotoga Bahá’í se auiluma o le iloaina o lona lava faasinomaga ma lona faamoemoega. O se naunautaiga ina ia lautele le vaai atu i le gaioiga o le fausiaina o faalapotopotoga lea ua avea ma vaega mautu o le aganuu i totonu o le tele ma le anoanoai o nofoaga; lea ua totogo ae nei, i totonu o se aofaiga tele o faalapotopotoga, i ni lagona o ni matafaioi moni mo le auiluma faaleagaga ma faaletino o vaega tetele o loo i totonu o le sosaiete, lea e i fafo atu o sui auai o le faalapotopotoga Bahá’í lava ia. O taumafaiga a uo mo le atinaeina o faalapotopotoga, ia auai atu i gaioiga mo le lelei lautele, ma le fai saofagā atu i mataupu aoao o le sosaiete ua tuufaatasia i se faiga faakelope, ma fusia faatasi e se faavae aoao mo gaioiga, e taula’i atu i le fesoasoani atu i tagata soifua i le faavaeina o ana mataupu i luga o se faavae o aoaoga faaleagaga. O le tulaga maualuga o atinae ua matou faamatalaina atu, e oo mai i lenei taimi o le lua selau tausaga talu mai le faavaeina o le Tulafono Pulea, e le mafai ona faagaloina. I le manu ae la o malosiaga tulaga ese sa ausiaina i le luasefulu tausaga talu ai – lea sa mafai ai e le lalolagi Bahá’í ona mataitūina ana taumafaiga i le faamatuuina atu o le mana o le Faatuatuaga mo le fausiaina o le sosaiete – ua iloa ai pine faamau le siligia o le ulufale atu o le Fuataiga a le Atua i le epoka lona ono o lana Augatupulaga Tau Atiae. Sa matou faailoaina atu i le Risivani talu ai le maualuga-ausia o aofaiga tetele e auai atu i gaioiga Bahá’í, ua faamuina i le faatuatua, ma ausiaina agavaa ma tomai e tautuaina ai a latou faalapotopotoga, o se faailoga o le amataga o le epoka lona tolu o le Fuafuaga Faapaiaina a le Matai; o lenei la o le Fuafuaga Tasi Tausaga mai lona amataga seia oo mai i lona faaiuga, ua avea ma faailoga o se tuufaatasiga o ni auiluma faa-talafaasolopito ua ausia e le au faatuatua. Ma i le amataga o se gaioiga fou ma le malosi, ua aga atu lenei tino-aufaatasi e tapu’e avanoa ua fofola lautele mai i luma o o latou mata.

O se vaaiga silisili o le epoka ua faamaeaina nei o le fausiaina lea o le Maota Tapuai mulimuli ma le amatalia o atinae mo le faavaeina o Maota Tapuai i vaega tau atunuu ma tau nuu. E tele naua aoaoga maua mai, e Baha’i i le lalolagi aoao, e faatatau i uiga loloto o le Mashriqu’l-Adhkár ma le vaavaalua o tapuaiga ma auaunaga o loo ofoina faatasi mai ai. I le faagasolo ai o le epoka lona ono o le augatupulaga Tau Atiae, o le a tele nisi aoaoga e uiga i le ala e oo atu ai mai le atinaeina o se soifuaga tapuai uluola i totonu o faalapotopotoga – ma auaunaga e faapogai mai ai – seia oo atu i le faatuina o se Mashriqu’l-Adhkár. Ua amatalia nei feutagaiga ma Fono Faaleagaga Tau Atunuu eseese, ma ao faagasolo ai, o le a matou faapea lava foi ona faailoa atu faavaitaimi nofoaga o le a faavaeina ae ai se Maota Tapuai Bahá’í i tausaga o muamua.

O lo matou fiafiaga i le vaavaai atu ao agai atu pea le faalapotopotoga a le Suafa Silisiliese mai lea malosi i le isi malosi, e faagagaseina i lagona ootia o le faanoanoa i le tilotilo atu i le faatuputupulaia pea o taualumaga ma faalavelave o loo maua ai pea le tagitu’i ma le puapuaga i le lalolagi – aemaise lava, le matau atu i le toe ola mai o malosiaga lepetia ua talepeina ai mataupu faavaomalo ma feagai ai le toatele o tagata ma mafatiaga. O loo tatou iloa lelei ma ua faamautinoa mai ia i tatou, ma o loo faaauau pea ona molimauina galuega a le faalapotopotoga

Bahá’í i totonu o nofoaga eseese, le agaga filifiliga ma le faatoina o tagata mulimulitai ia

Bahá’u’lláh e ofoina atu fesoasoani ma le lagolago mo latou o loo latou lata ane, tusa lava poo le a foi le faigata o tulaga o loo i ai i latou lava. Sei vagana lava ua galulue tagata soifua o se tino atoa se tasi i le faavaeina o ana mataupu i luga o faavae o le faamasinogatonu ma le faamaoni, o le a faapena lava ona faamanualia ma agai tausulusulu atu mai le isi faalavelave i le isi faalavelave. Matou te tatalo, pe afai lava o le a fua mai fevesiaiga o taua o loo iai nei i totonu o Europa nisi o lesona mo le lumana’i, o le a a avea lea ma faamanatu moomia vave o mataupu ua tatau i le lalolagi ona tausisia pe afai e fia ausia le filemu moni ma le faavavau. O aoaoga sa folafolaina mai e Bahá’u’lláh i taitai ma peresitene o Ona taimi, faatasi ai ma matafaioi mamafatu sa Ia apoapoai atu ai i taitai ua mavae ma o loo iai nei, atonu ua sili atu ona matua talafeagai ma talafeuga mo nei aso na i lo taimi sa uluai faamauina ai e Lana Peni. Mo Bahá’í, o le auiluma le mataofia o le Fuafuaga sili a le Atua – o loo aumaia faatasi ai puapuaga ma fevesiaiga, ae silisili atu ona taitaiina atu ai tagata soifua agai i le faamasinogatonu, filemu ma le aufaatasiga – o se faavae o loo fofola mai ai le Fuafuaga Laititi a le Atua, lea o loo taula’i uma iai gaioiga a uo talitonu. O le tulaga malepelepe o le sosaiete i nei onapo ua unaia ai ma le manino ma le telelise le manaoga mo le faamatuuina mai o le malosiaga e fausia ai sosaiete o le Faatuatuaga. E le mafai ona tatou iloa tonu nei, ma o le a faaauau pea ona pagatia le lalolagi i faigata ma fatia; ma o le a le masalomia ai lo outou taliaina mai, o le afuaga o soo se tulivae atu ma le faanaunau matou te ofoina atu mo fanau uma a le Atua ina ia faasaolotoina mai le fememeai ma le puapuaga mamafatu ma faatasi ai foi ma ni talotaloga mafana e tutusa lava foi mo le manuia o auaunaga matua moomia tele o loo outou ofoina atu mo le Fuataiga a le Perenise o le Filemu.

I totonu o soo se kalasa o loo faaauau pea ona faatupulaia ai le malosi mai gaioiga o le Fuafuaga, o loo matou vaaia ai le atinaeina o faalapotopotoga i uiga taualoa sa matou faamatalaina atu i totonu o le feau o le aso 30 o Tesema 2021. Ao faaauau ai pea ona fetaiai le sosaiete ma ituaiga eseese o tofotofoga, e ao ai i soo a le Matagofie o Abhá ona tumatila pea lava pea ona o o latou uiga lavātia ma le faapupulaina, aua o a latou amioga faaalia ma lo latou tausisia o aoaoga, ma lo latou faapalepale, vavaeesea, ma le agaga talitali o loo latou faalia i totonu o a latou taumafaiga mo le aufaatasiga. Matou te toe faamanatu pea lava pea, o uiga faasilisiliina ma amioga e faaalia e uo talitonu i totonu o vaitaimi o faigata matautia ua unaia ai tagata ina ia liliu atu i tagata Bahá’í mo faapupulaga, fautuaga, ma se fesoasoani, aemaise lava pe a oo ina faalavelavea le ola o le sosaiete ona o faigata ma faafitauli e le’i mafaufauina. O le faasoaina atu o nei vaaiga, faatasi ai ma lo matou mautinoa ai foi i le fetaiai pea o le faalapotopotoga Bahá’í ma aafiaga o malosiaga o le faataapeapeina o loo iai nei i le lalolagi. O le isi tulaga, o loo matou mautinoa, o le tele lava o taumafaiga a uo e siitia ae ai le Afioga a le Atua, o le malosi atu foi lea o malosiaga faasagatau mai o le a o latou vave fetaiai, pe mulimuli mai foi mai i itu eseese. E ao ai ona faafouina o latou mafaufau ma agaga e tetee atu ai i tofotofoga ua mautinoa lava le oo mai, ma ia le talepeina e nei mea le faaeaina o a latou taumafaiga uma. Peitai o loo iloa lelei lava e uo talitonu poo a lava afā o tau foufou mai, e tutusa lelei lava lo latou malosi ma le sā o le Fuataiga. O soo se laasaga lava o lana folauga, sa vaaia le feagai ma le sou ma folau mai ai i luga o galu fafati. O lenei la ua agai atu nei i se tafailagi fou. O faamautuuga a le Malosi Uma o matagi ia e iligiaina ona la ma uunaia lana folauga seia taunuu i lona faamoemoega. Ma o le Feagaiga o lana fetu ta’iala lea, e taitaia lenei va’a pa’ia i luga o lona alava’a mautu ma le mautinoa. Ia tō mai i ‘au a le lagi faamanuiaga i luga o le auva’a atoa o loo folauina lenei va’a.

1. Ua matua fa’atumuliaina o matou loto i le fiafia e tuuina atu lenei malelega i se fa’alapotopotoga e maoa’e lona tulaga tamali’i ma le maumausalī ua talafeagai ma le fa’amoemoega taualoa ua valaauina i ai. E maoa’e, e maoa’e naua le telē o lo matou alofa mo outou, ma fa’agaeetiaina o matou agaga i le molimauina o a outou taumafaiga mamā a’ia’i ma le fa’atoina e ola i se olaga o loo atagia ai A’oa’oga a Bahá’u’lláh ma mauvaega i vai o le fa’aolataga o Lana Fa’aaliga i se lalolagi o loo matua galala. O lo outou agaga fa’amisiona e ausia se fa’amoemoega maualuga o loo ua matua manino mai lava. O le fa’alautelega ma le fa’amautu’uga, auaunaga mo le soifuaga lautele ma le auai i fefa’asoaa’iga i mataupu a le sosaiete o loo fa’asolosolo lelei lava, ma o le auiluma fetala’i o nei gaioiga uma i le tulaga fa’a-le-kalasa ua fa’asilisiliina nei lona tino mai. E leai lava se nofoaga o loo manino ai nei vaaiga sei vagana nofoaga o loo maitauina ai se faitau aofai fa’atuputupula’ia o tagata o lo’o auai i le tele o ituaiga eseese o gaioiga o loo ua taitasi ona avea ma auala e fa’amatu’u atu ai malosiaga o le Fa’atuatuaga mo le fausiaina o le sosaiete.

2. I le sefululua masina ua mavae atu nei talu mai le amataga o le Fuafuaga Iva Tausaga, ua matou fiafia lava e vaaia le fa’aosofiaina ma le u’unaiaina o uo i lenei galuega fa’akelope tele fa’aleagaga ma ua fa’amalosiaina ai ni laina o gaioiga fa’apitoa. O le ulua’i la’asaga ua ave iai le fa’amuamua o le galuea’ina lea o fuafuaga ina ia mautinoa ai le manu a’e, i atunuu ma itulagi taitasi, o se kalasa ua ausia le ma’amaila lona tolu: o se nofoaga o loo auai ai se aofaiga toatele o tagata o loo galulue fa’atasi ma faisaofaga atu i le siitiaina o le soifuaga o se fa’alapotopotoga uluola. O le manatunatu pea i le sini o lenei periota e lua sefulu lima tausaga ina ia ausia e kalasa taitasi uma lava se polokalame o le ola atia’e ua ausia le tulaga telelise, ua tu’uvaa atu nei foi tagata talitonu e tatalaina kalasa fou i le Fa’atuatuaga ma fa’amalosia a latou taumafaiga i kalasa o loo ua iai nei se polokalame o le ola atia’e. Ua iai nei se malamalama’aga lautele i avanoa e paionia ai i vaega uma o le lalolagi – o le to’atele o agaga o loo latou mafaufau pe faapefea ona tali atu i nei avanoa ma e to’atele foi ua aumau nei i o latou nofoaga fa’apaionia, ae maise lava i totonu o latou lava laufanua ae faapea foi i le tulaga fa’avaomalo ua va’aia nei foi lona fa’atuputupula’ia. E pei ona matou fa’amoemoe iai, o se tasi lenei o auala e fa’aalia ai le agaga o le fesoasoania’i o uo i soo se nofoaga. Ua vaaia nei le galulue punouai o fa’alapotopotoga ua ausia le tulaga malosi e lagolagoina le atina’eina o isi nofoaga – poo se isi kalasa, itulagi, atunuu, e oo foi i isi konetineta – ma ua maua auala eseese ma le fetala’i e ofoina atu ai le fa’amalosiau ma fa’asoaina tu’usao a’oa’oga e tusa lava po o le a le mamao. I le taimi lava fo’i e tasi, o alafua faigofie o le fa’amauina o mea o lo’o a’oa’oina i totonu o se kalasa ma fa’asafua atu ina ia mafai ona fausia ai fuafuaga fa’alenu’u po’o so’o se nofoaga lava, ua fa’agaioiaina nei i le loaloa o nofoaga. Ua fa’afiafiaina i matou i le va’ai atu ua ave le fa’amamafa i le a’oa’o pe fa’apefea ona si’itia le tulaga o lo’o fa’atinoina ai gaioiga a le polokalame fa’alea’oa’oga. A o’o ina maua’a le polokalame fa’alea’oa’oga i totonu o se fa’alapotopotoga e matua maoa’e lava suiga e tulai mai ai. E fai ma fa’ata’ita’iga le molimauina ai i totonu o nofoaga mata’ituina o gaioiga uluola le iai o le si’itiaga o le va’aiga taula’i o tagata aumau i nei nofoaga o i latou lava e ana le polokalame fa’alea’oa’oga: o le atina’eina auiluma lelei o lenei meafaigaluega o la latou matafaioi aupito sili ona taua. E pei ona iloa lelei o faitotoa o le Fa’atuatuaga e matala lautele pea, ma o loo a’oa’oina e tagata talitonu pe faapefea ona fa’alaeiauina i latou ua saunia e ulufale ma le loto mautinoa. O le savavali fa’atasi ma nei agaga, ma le fesoasoani atu ia te i latou e ulufale i le faitoto’a o se fa’amanuiaga maualuga ma se fiafiaga faapitoa; i soo se nofoaga lava, e tele ni vaega eseese e ao ona a’oa’oina e fa’atatau i lenei taimi taua o le taliaina ma le auai aloaia. Ma e lē na o le pau lena. E ui lava o taumafaiga i le tele o kalasa e faisaofaga atu i le liuaina o le soifuaga lautele o loo iai i se tulaga mu’amu’a, o loo taumafai filifiligā Fono Fa’aleagaga Tau Atunu’u fa’atasi ai ma le lagolago malosi a Konesula e a’oa’o atili pe fa’apefea ona manu a’e nei taumafaiga mai gaioiga mo le fausiaina o fa’alapotopotoga. O fefa’asoaa’iga faatatau i le auiluma fa’ale-soifuaga lautele ma le faa-le-tamaoaiga o tagata o lo’o fa’afaileleina i totonu o kulupu o aiga ma i totonu o fa’alapotopotoga, ma o lo’o taumafai foi uo e saili auala e auai ai i talanoaga anoa o loo manu malie a’e i nofoaga taulalata ane.

3. Mai le tele o mea sa matou tolaulauina, e susulu pupula lava galuega a talavou. E mamao lava mai le na’o le taliaina o soo se suiga – e tusa lava po o se suiga e leai sona aafiaga ogaoga tele pe iai foi – ua fa’amaonia o i latou lava o poutu totoa ma le fa’autauta o le Fuafuaga. I nofoaga ua maitauina ai lenei vaaiga a le fa’alapotopotoga fa’asaga i talavou ma fausiaina le si’osi’omaga talafeagai mo lo latou auiluma, ua matua fa’amaonia ai e talavou le tulaga fa’atuatuaina o lo’o fa’aalia ia te i latou. O lo’o latou tala’iina le Fa’atuatuaga i a latou uo ma faia auaunaga ma fa’avae a latou so’otaga mafana ma le ‘ānoa. O le tele o taimi, e fa’aalia nei auaunaga e ala i le a’oa’oina o tamaiti laiti – ofoina atu ia i latou a’oa’oga o uiga tausili ma le fa’aleagaga fa’apea fo’i ma le lagolagoina o i latou ia auiluma i le a’oga. O lo’o fa’ataunu’uina nei e talavou Bahá’í lo matou fa’amoemoega maualuga ia fai ma o latou matafaioi fa’apa’iaina le atina’eina o le polosesi fa’alea’oa’oga.

4. O nei taumafaiga uma o loo fa’atinoina i totonu o se augatupulaga matuā lē mautonu ma le femoumoua’i. E i ai le malamalama’aga lautele o fa’atulagaga uma o loo i ai i nei onapo i le sosaiete ua lē talafeuga lea e tali atu ai i manaoga o tagata soifua i ana tauiviga i le taimi nei. O le tele o vaega sa manatu e maumausalī ma e lē maluelue ua fesiligiaina nei, ma ua tupuga mai ai se fa’anaunauta’iga mo se vaaiga mamao autasi. O le tu’ufa’atasiga o leo e lagolagoina le tafatasi, avanoa tutusa ma le amiotonu o lo’o fa’aalia mai ai le toatele o tagata latou te momo’o i nei fa’amoemoega mo lo latou sosaiete. O le mea moni, e lē o se mea fou i se tagata mulimuli i le Matagofie Fa’apa’iaina le fa’anaunau o loto i mataupu fa’avae fa’aleagaga ua Ia folafolaina mo tagata e manatunatu i ai. E lē fa’aitiitia ai lo matou maofa, e ui sa tau lē manino pe fa’ape’ī le auiluma fa’atasi o tagata soifua i le la tausaga e tasi ua tuana’i atu, ae sa susulu pupula le malamalama o le Fa’atuatuaga i ni koneferenisi e silia a’e ma le sefulu afe sa auai ai le latalata i le tasi ma le afa miliona tagata, sa taula’i lo latou vaai i auala e fa’asalalauina ai nei lava mataupu fa’avae fa’aleagaga. O le vaaiga mamao a Bahá’u’lláh ma Ana poloa’iga i tagata soifua e galulue fa’atasi mo le lelei auiluma o le lalolagi, sa avea lea ma ogatotonulemu na fa’atasitasi ai ma le naunauta’i ituaiga eseese uma o le sosaiete – a leitioa foi saunoa ‘Abdu’l-Bahá, “O soo se fa’alapotopotoga lava o le lalolagi e mafai ona latou mauaina le fa’ataunu’uga o o latou fa’amoemoega maualuluga i nei A’oa’oga Fa’aleatua”. O nisi o tagata alolofa i le lalolagi o tagata soifua e ono tosina muamua mai i le fa’alapotopotoga Bahá’í o se nofoaga e sulufa’i iai, o se malutiaga mai se lalolagi fevaevaea’i ma le leai o se ola. Ae i tua atu o lenei malu, o le a latou maua ai agaga o lo’o galulue e faapei o se aiga se tasi e fausia se lalolagi fou.

5. E tele vaega e fia fa’amatalaina e fa’atatau i le loaloa o nofoaga eseese o le lalolagi sa fa’atinoina ai nei koneferenisi, o le tuleiga maoa’e sa o latou u’unaia ai lenei Fuafuaga fou, po o le fa’aaliga faagaeetia loto o le olioli ma le naunauta’i sa o latou totoina i loto o i latou sa auai. Ae i ni nai fuaiupu e matou te fia fa’amamafaina ai le tulaga na atagia mai i nei koneferenisi e fa’atatau i le atina’eina o le Fuata’iga. Sa o latou fa’aatagiaina mai se fa’alapotopotoga Bahá’í e taulai la latou vaai i le lalolagi o se aiga e tasi, e aunoa ma se fa’aeseeseina o tagata. O lenei vaaiga sa fa’afaigofie ai ona fefa’asoaa’i i le Fuafuaga Iva Tausaga i nei faatasiga lea sa tatalaina mo so’o se tagata e fia auai. Sa mafai ai e uo ona manatunatu fa’atasi ma isi faapea ma aiga i manaoga o lenei Fuafuaga i totonu o o latou lava sosaiete, ae le gata i lea o le auai ai o ta’ita’i o nu’u faapea foi i latou o loo iai le pule. O le aumai fa’atasi o le toatele o tagata i se nofoaga se tasi na fa’afaileleina ai se si’osi’omaga mo se talanoaga fa’afouina ma le si’itiaina e fa’atatau i le auiluma fa’aleagaga ma le fa’alesoifuaga lautele o tagata, ma o se talanoaga o loo fa’atinoina i le loaloa o le lalolagi. O le sao fa’apitoa o nei fa’atasiga – saoloto ma tatala fa’alaua’itele, fa’agaeetia agaga ma le fa’atumuliaina i ni fa’amoemoega maualuluga – i se mamanu fa’alauteleina o le atina’ega o fa’alapotopotoga i totonu o se kalasa, o se lesona taua lea mo tinopulea Bahá’í uma e ao ona mafaufau i ai mo le lumanai.

6. Ma o lenei la ua ulufale atu le vaega’au a le au fa’atuatua i le tausaga lona lua o le Fuafuaga ma se va’aiga taulai fou ma se malamalamaaga loloto i le taua o le fa’amoemoega o loo latou taumafai e ausia. Pe o le a se vaaiga i gaioiga eseese pe a silasila iai ma le malamalama lelei i le mana-fausia o sosaiete o loo latou faamatuuina atu! O lenei vaaiga lautele e mafai ai e se galuega fa’aauauina faifaipea ona auiluma e aunoa ma se vaaiga o se auaunaga tutoatasi po o ua na o se fuainumera lava. Mai lea nofoaga i lea nofoaga, o galuega o loo fa’atinoina ai, o lo’o atagia mai ai se faitau aofai o tagata o lo’o a’oa’o pe fa’apefea ona si’itia o latou lava agava’a e tauaveina le matafaioi o le sailia lea o le ala mo lo latou lava auiluma manuia. O le liuga fa’aleagaga ma suiga o le soifuaga lautele o le a tulai mai o le a fa’apena lava ona atagia mai i le soifuaga o tagata i le tele o auala eseese. I le fa’asologa o Fuafuaga ua mavae atu, sa atagia manino mai ai i gaioiga mo le fa’alauteleina o le a’oa’oina fa’aleagaga ma mafutaga fai fa’atasi mo talotaloga. I lenei fa’asologa fou o Fuafuaga, ua mo’omia ai nei ona ave le fa’amamafa i isi polosesi o lo’o taumafai e sailia auala e siitia ai le soifuaga o le fa’alapotopotoga – e fai ma fa’ata’ita’iga, o le siitiaina o le soifua maloloina o tagata lautele, o le puipuia o le si’osi’omaga, po o le fa’aaogaina tatau lea ma le talafeagai o le malosiaga o loo i faiga fa’atufugaga, taleni ma faiva alofilima. Ina ia mafai ona siitia auiluma nei vaega felagolagoma’i eseese o le soifuaga o le fa’alapotopotoga e moomia ai ona siitia agava’a e auai ai i se polosesi fa’atulaga lelei faifaipea o le a’oa’oina mo nei vaega eseese uma – o se agavaa e maua mai lea i le su’esu’eina o manatu loloto o lo’o fa’aalia mai i A’oa’oga atoa ma tu’ugaoa o le poto fa’aletagata o lo’o fa’atuputupula’ia pea e ala i sailiiliga fa’asaienisi. A’o fa’atuputupula’ia lenei agavaa, o le a tele foi ni fa’aeaga o le a ausia i le faitau fia-sefulu tausaga o fotua’i mai.

7. O lenei va’aiga mamao lautele mo le fausiaina o le sosaiete e iai ona fa’amoemoega e lēmafuatiaina le tele. O fa’alapotopotoga uma lava taitasi o lo’o latou savalia lo latou lava ala mo lona fa’ataunu’uina. O le auiluma o le tasi nofoaga e vaaia ai elemeni e tutusa lelei ai ma le auiluma o le isi. O se tasi o nei elemeni o le fa’afaileleina lea o taualumaga e talafeuga lelei mo le manu a’e o se Mashriqu’l-Adhkár i se taimi talafeagai e pei ona matou tu’uina atu i le Risivani 2012, ao fa’atuputupula’ia pea agava’a, ma fa’ateteleina malosiaga o le fa’alapotopotoga i le tulaga fa’a-le-nu’u ma le fa’a-le-atunu’u. E pei ona matou fa’ailoa atu i la matou feau i le Risivani ua tuana’i atu, o le a matou filifilia mai i lea taimi i lea taimi nofoaga o le a fa’atuina a’e ai se

Malumalu Tapua’i Bahá’í. E matou te fiafia e vala’auina i lenei taimi le fa’atuina o Malumalu Tapua’i fa’alenu’u i Kanchanpur, Nepal ma Mwinilunga, Zambia. E faapea foi ona matou vala’auina le fa’atuina o Malumalu Tapua’i Faa-le-atunu’u i Kanata i totonu o laufanua o le Ḥazíratu’l-Quds Fa’a-le-atunu’u ua autausagā nei ona fa’avaeina i Toronto. I le lumanai, o nei poloketi fa’apea ma isi, o le a faamanuiaina mai le lagolago e tuuina atu e uo mai soo se laueleele, i le Foa’i Fa’apitoa mo Malumalu Tapua’i,

8. E lē-mafaitaulia le anoanoa’i o fa’amanuiaga ua filifilia e le Alii alofa tunoa e faatotõina ifo i luga o Ana pele. E maualuga lenei vala’auina, ma e ofoofogia le matagofie o lenei avanoa. E utiuti le taimi o loo vala’auina iai tatou e auauna ai. O le ala foi lea o le fa’atagitu’i ma le fa’anaunau o talosaga o loo matou fa’atoga ai, e fai ai matou ma outou sui, mo a outou taumafaiga lē-faalogologotigā i le Loa o Bahá’u’lláh.

Ua mou vave atu tausaga e lua o se iva-tausaga o taumafaiga fitā. Ua teufatuina i loto o uo a le Atua ona sini ma faamoemoega. I le loaloa o le lalolagi Baha’i o loo iai nei se siitaga loloto o le malamalama e faatatau i vaega moomia e faalautele atili ai le polosesi o le fausiaina o faalapotopotoga aemaise lona sao taua i le feliua’iga o le sosaiete. Peita’i o le mavae atu o lea aso ma lea aso, ua tatou vaaia ai foi le tulaga o le faatuputupula’ia atili o le lē mautonu i le lalolagi, ma ona fevaevaeaiga ua faatuputupulaia le ogaoga. O le faateteleina o feeseeseaiga i totonu o sosaiete ma le va o malō e aafia ai tagata ma nofoaga i auala eseese.

O lenei e manaʻomia ai mai agaga magafagafa uma se tali. E tatou te iloa uma lava e lē mafai e le faalapotopotoga o le Suafa Silisiliese ona faʻamoemoe e le aafia i mafatiaga o le sosaiete. Ae peitaʻi, e ui ina aafia i nei mafatiaga, ae e lē o fenumia’i ai i nei mea e tutupu; e faanoanoa i puapuagatia o tagata soifua, ae e lē o faavaivaia ai i latou. O le mamafatu o nei mafatiaga i o latou loto e tatau ona faateleliseina ai taumafaiga faifaipea mo le fausiaina o faalapotopotoga e ofoina atu le faamoemoega e suitulaga i le lē mautonu, ma le aufaatasiga e suitulaga i feteenaiga.

Ua faamatalaina manino e Shoghi Effendi o le polosesi o loo “faavaivaia faifaipea ai mataupu a tagata” o loo tutupu faatasi ma le isi polosesi, se polosesi o loo faamaopopoina ana mataupu, lea o loo fausia ai le “Vaa o le faaolataga o tagata” le “maluapapa malosi’ o le sosaiete. Ua faafiafiaina i matou i le vaʻai atu i atunuʻu uma ma itulagi, o loʻo galulue tagata faʻamaoni o le filemu i le fausiaina o lenei maluapapa. Matou te vaaia i soo se faamatalaga lava se loto ua faamumuina i le alofa o le Atua, o se aiga e tatalaina lo latou fale i uo fou, o le liliu atu o uo galulue i aʻoaʻoga a Bahá’u’lláh e foia ai se faafitauli faale-soifuaga lautele, o le faamalosia e se faʻalapotopotoga o se aganuu o le galulue felagolagomai, se nofoaga tua’oi poo se afioaga o loo a’oa’o e amataina ma faamautu gaioiga talafeagai mo lona auiluma faaleagaga ma faaletino, se nu’u ua faamanuiaina i le tula’i a’e ai o se Fono Faaleagaga fou.

O metotia ma meafaigaluega o le Fuafuaga ua mafai ai e soo se agaga ona tuuina atu se sao i mea e manaʻomia e tagata soifua i le aso lenei. E mamao lava mai le ofoina atu o se fofo le tumau mo maʻi o le taimi nei, o le mulimulita’ia o le Fuafuaga, o le puna’oa lea e faagaioia polosesi faaumiumi ma le uluola o loo faagasolo i le fia o augatupulaga, o lenei ua amatalia i totonu o sosaiete uma. O nei mea uma e faasino tonu i se faai’uga faanatinati ma lē ma-alofia: E tatau ona faatutupulaia pea lava pea i se taimi vave le siitia o le fuainumera oi latou o loo faatoina atu o latou taimi, lo latou malosi aemaise lo latou vaaiga taula’i mo le manuia o lenei galuega.

O fea ea se isi mea se’i vagana ai le mataupu faavae a Bahá’u’lláh’ o le tafatasi o tagata soifua e mafai ai e le lalolagi ona maua se vaaiga mamao e sili ona lautele e mafai ona tuufaatasia ona elemeni eseese uma? E faapefea ea se’i vagana ai le faaliliuina o lena vaaiga mamao i se faatulagaga e faavae i luga o le aufaatasiga o eseesega e mafai ai e le lalolagi ona faamaloloina le malepelepe o ana mataupu lautele o loo fevaevaea’i ai? O ai ea e mafai ona avea ma fefete e mafai ai e tagata o le lalolagi ona maua se auala fou o le olaga, se auala e ausia ai le filemu faavavau? Tatala tele atu nei loa i soo se tasi aao o le fefaauoai, o taumafaiga aofaatasi, o auaunaga tausoa faatasi, o a’oa’oga tuufaatasi ma auiluma faatasi ai.

Matou te mafaufau pea i le tele o le loto-faananau ma le malosi o loo faatupuina i totonu o soo se sosaiete e ala i ona talavou ua fafaguina i le vaaiga mamao a Bahá’u’lláh ma avea ai ma tagata faigaluega autu o le Fuafuaga. Ma o lea, faatasi ai ma le faasilisiliina o le agalelei, lototele, ma le faalagolago atoatoa i le Atua e tatau ai i talavou Bahá’í ona filifili e aapa atu ia latou uo ma aumai i latou i totonu o lenei galuega! E tatau ona uunaiaina tagata uma, ae o talavou e tatau ona felelei a’e.

O manaoga faanatinati o le taimi lenei e le tatau ona punitia ai fiafiaga faia’e e maua mai i auaunaga. O le valaauina mo auaunaga o se samania e faagaeetia agaga ma e feofoofota’ia uma ai tagata. E tosina mai ai agaga faamaoni uma, e oo lava ia i latou ua faavaivaia i atugaluga ma matafaioi tauave. Aua o auala uma o loo gapatia ai lena agaga faamaoni e mafai ona vaaia ai se faatoina mauaa ma se soifuaga atoa e vaaia ai le lagona mamafatu e faataua le manuia o isi. O ia uiga taualoa e aumaia le paleni felagolagomaʻi i se olaga o le anoanoa’i o matafaioi tauave. Ma o taimi e sili ona matagofie o na taimi mo soʻo se loto ua faamumuina, o taimi ia e mafuta ai ma uso ma tuafafine faaleagaga, o loo fesoasoani i se sosaiete ua matua moomia le faafouina faaleagaga.

I loto ua taumasuasua, matou te faafetaia ai Bahá’u’lláh i totonu o Loa Paia mo le tausiaina o outou ma a’oa’oina outou i Ona ala, ma matou te aioi faatauanau atu ia te Ia ina ia auina atu ia te outou Ana faamanuiaga.

1 I le toe tasi ai o le tausaga o totoe a o le’i faaiuina le vaega muamua o le Fuafuaga Iva Tausaga, ua matou naunau e ripoti atu lona agai ai i luma—pe faapefea, e ala i faataitaiga pupula o taumafaiga taualoa, ona faatumulia le tele ma le tele o loto i faamoemoega i le vaaiga mamao o loo ofoina atu e le Faatuatuaga.

2 O loo faaauau pea ona auiluma le polosesi o le ola tuputupu aʻe. O faaeaga maoa’e sa mafai ona tutupu i siosiomaga eseese, lea e le'i molimauina muamua le taua tele o le auiluma manuia, a’o faatupu a’e e le fatu o le Faatuatuaga ni tatupu meamata fou ma le agavaa o le galulue faatasi ma ni agaga se tele i le taimi e tasi, ua amata ona alia'e mai. O nei atinaega auiluma manuia e masani ona ausia e paionia faatoina o ē, ua faamumuina o latou loto i le alofa i lo latou Alii, ua faanatinati atu e auauna faataiala i fanua ma faavaomalo i ni aofaʻiga mataʻina. I totonu o kalasa ua loa ona amata ai se polokalame o le ola-tuputupu aʻe, ua toe faafouina le silasila toto’a i le faaaogaina, i tulaga fetalaaʻi ma le atamai, o auala ma metotia masani aemaise laina o gaioiga lea o le a mafai ai e uo ona pasia le maamaila lua ma le tolu. Ma o kalasa ua faamaonia le malolosi, o ataata o le mana malosi e fausia ai sosaiete a le Faatuatuaga ua faapea lava ona faaalia atili a’o taliaina ai e se vaega faatuputupula’ia o agaga faaosofia se mamanu o feliuaiga ma ola malaulau o le olaga Baha’i.

3 I le taimi nei, o le galulue faatasi ai o le mua’iaa ma le sosaiete ua maitauina le aga’i pea i luma. O taumafaiga faavae Faalefaalapotopotoga i auaunaga lautele e taulaʻi atu i aʻoaʻoga, ua faateleina ise tulaga sili ona televave, ae o loo faapea foi ona auiluma isi taumafaiga, i vaega e pei o faatoʻaga, soifua maloloina, siosiomaga, faaaupegaina o tamaitai, ma faiga faatufugaga. O lea ituaiga auiluma manuia o loo sili ona manino i kalasa malolosi, lea o le toatele o se nuu po o se nofoaga tuaoi—e oo lava i se magãala e tasi po o se fale mautotogi ua matua faatumulia—e nonofo ai se faitau aofaʻi o loo malamalama lelei i le tulaga faaeaea lea e sau mai le faaliliuina o a’oa’oga faavae a le Faatuatuaga i taualumaga moni e mafai ona ausia. I isi nofoaga, o taʻitaʻi o nuu ma tagata taʻitoʻatasi o loo tauavea matafaioi mo aʻoaʻoga a tamaiti poo le atinaʻeina o le soifuaga lautele i le tulaga faalotoifale e le naʻo le liliu atu i Bahá’í mo ni fautuaga poo manatu faaalia, ae o loo taumafai e galulue faatasi i le sailiga o auala ma metotia talafeagai. E le gata i

lea, ua matou fiafia lava e vaai atu i tulaga faale-atunuu ma faavaomalo, o metotia Bahá’í e fitoitonu i nisi o soalaupulega o mataupu lautele taua, o loo faapea lava ona tosina mai iai se vaega faatuputupulaia o faatofalaiga ma le faaaloaloagia.

4 O le Fuafuaga Iva Tausaga e faalagolago i le tele o polosesi o le a'oa'oina faakelope lea e aoga tele i nofoaga maualuluga o Polivia faapea talafatai o Sini. O lenei polosesi o le a'oa'oina ua tula'i mai ai metotia ma gaioiga e fetaui lelei ma soo se faatulagaga. E faatulagaina lelei faifaipea; e faalenatura; e aoga i taualumaga uma. E na te fausiaina sootaga, ma avea ma sootaga malolosi, i le va o aiga, o tuaoi, va o tupulaga talavou aemaise i latou uma ua sauni e avea ma tagata faigaluega autu o lenei galuega faapupulaina. E na te siitiaina faalapotopotoga e faatumulia i tomai ma agavaa. E na te tomatauina le faataunuuina o mana'oga maualuluga ua faaalia e tagata sa tuu'eseeseina i faafanua, gagana, aganuu, poo isi tulaga ae o lenei ua faʻalogo ma tali atu i le valaau aoao a Bahá’u’lláh’ “ia taumafai e le aunoa mo le faaleleia o olaga o le tasi ma le isi”. Ma e matua faalagolago atoa i le mana malosi o le Upu a le Atua—lena “malosi autasi”, “le sapenapaenea o agaga ma fusifusia ma faatonuina le lalolagi o tagata soifua”— ma luga o gaioiga maumaututu e faaosofiaina.

5 I le tetee atu i le pogisa o se tafailagi louloua, e maʻeu le pupula o le malamalama o loo susulu mai i a outou taumafaiga faatoina! E tusa lava poo se afã sili ona matautia i le lalolagi, o maluapapa e malu iai tagata soifua ua faapea lava ona fausia i totonu o atunuu, itulagi, ma kalasa. Ae peitai e anoanoa’i mea e ao ona fai. E tofu lava le atunuu ma lona faamoemoega mo le auiluma manuia i le vaitaimi lenei, le ulua’i laasaga o le Fuafuaga. O loo alu lava le taimi. Uo peleina e, faapea failauga o a’oa’oga faaleatua, aemaise toa a le Matagofie Faamanuiaina— o a outou taumafaiga ua moomia nei. Soo se faaeaga lava e faia i nai masina a'o lumana'i ai le isi Risivani, o le a sili atu ona faaauupegaina ai le faalapotopotoga o le Suafa Silisili mo vaega e tatau ona ausia i le vaega lona lua o le Fuafuaga. Tau ina ia tuuina atu ia te outou le manuia. Ona o lenei, matou te tatalo faatauanau atu i le Alii pule-aoao; ona o lenei, matou te faatoga atu i Lana fesoasoani lē mavae; ona o lenei, matou te aioi atu ia te Ia ina ia auina atu Ana agelu filifilia e fesoasoani ia te outou taitoatasi.